ببساطة : حنفضل نجمع و عمرنا محنصنع - و لازم تكونوا واقعيين !
انا كل شوية بلاقة موضوع او تعليق عن عدم امكانية مصر من صناعة سيارة
وليه فولان سبقنا و علان عملنا ...
ياجماعة انا اتكلمت مع كذا واحد في السوق المصري و الايراني و الماليزي و الانجليزي كمان !
واشرحلكم الاسباب .
اولا :
انتوا فاكرين انا احنا سوق سيارات كبير او علي الاقل موجود و قوي .. عايز اقلك ان انت اضعف في مبيعات السيارات من اليمن و ليبيا و المغرب و تونس و طبعا كل دول الخليج... احنا يادوبك متفوقين علي الافارقة الغلابة باستثناء " جنوب افريقيا " الي هي اكبر سوق سيارات في افريقيا .
و ده موضوع مفيهوش جدال .. دي حقائق و ارقام ..
حتقولوا الصين و ماليزيا و ايران سابقانا ليه ؟
مصر مبيعات السيارات الملاكي فيها لسنة 2007 كانت حوالي 250 الف سيارة . منهم 35% او اكتر مش متذكر بالتقسيط .
- شيري - و هي شركة صينية صينينة جديدة من 1997 باعت في سنة 2007 350 الف سيارة !!!! و هي الرابع في الترتيب في لائحة مبيعات الصين ( مبيعات الصين في 2007 تقريبا 3 مليون سيارة ) .
- ايران خدرو ( بيجو الايراني ) بتنتج 200 الف سيارة سنويا .. يعني اكيد المبيعات في ايران فوق الرقم ده الضعف علي الاقل .
- بروتون في ماليزيا بتصدر فوق ال 100 الف سيارة سنويا لانحاء العالم كما انها من انجح .
يعني لو لاحظته . انا احنا منعتبرش " زلطة " جنب الجبال دي .
ثانيا :
اقتصاديا . وده باجابة الخبراء
علشان تعمل مصنع سيارات مصري مربح
بعد طبعا كم الرشاوي و التظابيط و الوسايط و العك ..
محجتاج اولا تصميم شاسيه سيارة ..
و في الحالة دي يا اما حتحتاج تصمم واحد من الصفر و ده بيتكلف من 500مليون دولار فما فوق !
ياما حتستعين بتصميم قديم من شركة اخلرى و حتفدفع مبلغ محترم بالاضافة الي نسبة من ارباحك حسب العقد .
مفيش مصنع في العالم بيعمل كل حاجة بنفسه بمعنى لازم يكون في منطقة لصناعات مغذية للسيارات ( انتاج فعلي لمعظم اجزاء السيارة )
وده مش موجود في مصر .. فيا اما حتطر تستورد .. وبالتالي حترجع تجمع مش تصنع يا اما عايزلك رأس مال كل اغنياء العالم .
نيجي لاهم حاجة !
اي مصنع سيارات جديد لازم يكون فيه هدف معين مثلا بتصنيه علي الاقل 150 الف سيارة سنويا .علشان ده اقل رقم ممكن يطلع " اقل ربح "
طب اذا كان مبيعات السيارات في مصر كلها مستورد و مجمع - 250 الف سيارة ! حتحط انت 150 الف في السوق مين حيشتريهم ؟ النتيجة : حتقفل المصنع و تفلس !
ثالثا : المنتج
و بما اني خبرة التصنيع شبه منعدمة .. حتيجي مسألة الجودة
شركة زي شيري مثلا عندهم "هامش " يقدرو يبوظوا فيه زي ماهما عايزين .. رأس مال شغال - مبيعات شغالة .. معجبتكش عربيتاهم في 300 الف صيني حيشتريها .
انما انت عندك وقت او مال او زبون ! يستحمل خطأ او عيب تصنيع ؟ لأ !
---------
ببساطة الي بيفكر في مصنع مصري 100% يصنع ماركة مصرية 100% بيضحك علي نفسه !
سوقنا ضعــييييييييييييييييييييي يييييييييييييف جدا جدا جدا جدا جدا !
حتقلي تجميع محلي عندنا كتير .. حقلك ده للهروب من الجمارك
لو الجمارك اتشالت المصانع دي حتقفل .. و لا حيبقى ليها لازمة !
وجمارك الي فوق ال2000 سي سي معمولة لحمياة السيدة مرسيديس و السيد Bmw
من لكزس و انفنتي و اودي .
فياريت ياجماعة نعيش الواقع شوية الا وهو افتح اي جرنان اتصل بمعظم توكيلات مصر.
السيارة في الخارج بتنزل باكتر من 10 موديلات
ده كمان ممكن تعمل موديل خاص بيك باضافات خاصة و الكلام ده من الماروتي !! لحد الرولس رويس !
ليه مش موجود في مصر ؟ استكراد ؟
لأ ! بس المبيعات لا تكفي علشان التوكيل يفتح علي نفسه باب الموديلات و الاضافات !
سيارة مثل الفيات 500
باختلاف الاضافات ممكن تعمل منها اكتر من 500.0000 موديل مختلف ! والله مش بهزر ! ده بجد !
حتبيع انهي واحد في مصر ؟ و ازاي ؟
قبل منصنع سيارة كاملة
لازم نبدأ بصناعات المغذية للسيارات .
و في فعلا من بدأوا بس في مناطق حرة و للتصدير
شركة ليوني الالماني - محدش يعرفها كتير
فاتحة في المنطقة الحرة ... عارفين بتنتج ايه ؟
اسلاك كهرباء __ عارف لمين ؟
فورد و استون مارتين و جاجوار
و ده مصنع مغذي مباشر ! و الوحيد الي بيورد اسلاك الكهرباء للشركات دي !
بعمالة مصرية مدربة علي ايد المان ! في ارض مصرية ولكن حرة مش مصرية اوي يعني
هيا دي المصانع " الواقعية " الي ممكن تناسب سوقنا و نفكر فيها .. انما كلام الاحلام ده ننساه .. علي الآقل في الوقت الحالي .