ياعم حرام يكون معاك من 80 الى 100 الف وتركب عربيه مصرى عندك مستورد كثير ...نيو اكينت - النترا - اوبترا - سيراتو - لانسر امامك الفريق البرنس دة وتروح للمصرى خسارة
عرض للطباعة
ياعم حرام يكون معاك من 80 الى 100 الف وتركب عربيه مصرى عندك مستورد كثير ...نيو اكينت - النترا - اوبترا - سيراتو - لانسر امامك الفريق البرنس دة وتروح للمصرى خسارة
يا جماعة أنتم مكبرين الموضوع ليه
والله صاحب الموضوع لومقتنع أنه يشتري عربية س وقعدنا نقنع فيه أنه يتشري عربية ص مش هيقتنع
وعمتاً أنا عاوز أقولكم علي حكاية شراء عربيتي
أنا كنت خلاص مقتنع 100 % بالأوبترا وروحت أتفرجت عليها وخلاص دفعت عربون للمعرض و كنت هستلم خلاص
بس قالي هو حضرتك ناوى تغيرها في حدود 3 سنين مثلاً قولتله لأ ؟؟ قالي خلاص خليك في الصني
أخدت الكلام وسكت وبعد يومين واحد صاحب والدي كنت بتكلم معاه وهو بيفهم شوية في العربيات و عرضت عليه الموضوع قالي أنت لو ركبت حاجة كوري هتبقي جميله وكل حاجة بس هتحس انك راكب حاجة مايعه لكن لو يباني هتحس انك راكب عربية راسية وثابتة
فغيرت للصني
بس عمتاً الكلام ده في الكوري التحتاني يعني أخرك مثلاً إلنترا لكن بعدها لأ ممكن أركب كوري
الطلكبه راكبه في التنك مفيش خلوص تركب فلتر في النص
على فكرة انا واحد شاب لسه ماعدتش ال 22 سنه ... اول ما اتعلمت اتعلمت على عربيه واحد صاحبي و كانت Benz s63 و للعلم انها عربيه مقارنة بالسوق المصري .. فوق الخيال .. لما فكرت اشتري عربيه و فلوسي فى ايدي .. بالنسبه لواحد شاب عاوز عربيه لذيذه و فى نفس الوقت محترمة .. بصيت عالاوبترا موتورها عفي(عشان وزنها خفيف) .. عافشه ناشفه . تصميم العربيه غريب لما تيجي تركب ورا اول مره لازم تتخبط ... بس هى مش وحشه .. بصيت علي الهيونداي الالنترا .. عربيه كويسه بس خفيفه بزياده و عشان تاخدها كامله هتدفع فوق ال 120 الف . استحرمت لان قيمتها .. مش مجديه .. بصيت على النيسان .. ولاقيت انها عربيه خامات التابلوه متوسطه فعلا .. بس العربيه ناعمه و موتورها محترم و عجبني انها تقيله على الطريق و مش واطيه ولا عاليه . يعنى زى ما بيقولو المثل الاميريكي Best Bang For The Buck او احسن قيمه مقابل المبلغ المالي اللى هتدفعه .. هى نيسان صني
و ردا على الناس اللى بتحكي فى الكوري و الياباني عامة .. السؤال بيطرح نفسه .. هل كوريا عملت ربع اللى اليابان عملته فى مجال خدمة هندسة و تطوير السيارات بشكل عام !!! فــكــر و اكيد هتوصل لقيمة السياره الياباني من ناحيه ال Durability عامة
عاوز تقنعنى ان المصرى افضل من المستورد؟؟؟؟ عمر كان النصر افضل من الفيات لنفس العربيه ؟؟؟ ولا اللادا بتاعه الامل زى الاصلى الروسى ؟؟؟ ولا الافيو المصرى زى الافيو الكورى ؟؟؟ دة ابسط سيارات لاتكنولوجيا ولا بطيخ . بص المستورد حاجه والمصرى حاجه انا لما اشترى نيو اكسنت كورى 100% افضل من الصنى المصرى . ولعلمك الصنى الكورى ال فى السعوديه لكن النسيان منتشر فى ماركات اخرى زى التيما وماكسيما لكن صنى وتيدا فاشلين فى مقابل انتشار كرولا وماذدا وهيونداى وشفروليه .... والموضوع اخد حقه وصاحب الموضوع له القرار فى الاخر :049:
قلبي... راسي..... رجلي! اااااااه يل وركي! ده بيقول التيدا عربيه فاشله! انا خلاص مليش كلام معاك ابدا! انا مقاطعاك ليوم الدين! انا على كده ما بفهمش في العربيات ولا عمري ركبت عربيه في حياتي! طب حتى كلف خاطرك و خش جروب النيسان هنا و شوف ملاك التيدا رأيهم ايه يا اخي! دا حتى اللي جايبها يوسد بيشكر فيها! العربيه الوحيده اللي عليها اجماع انها مظهلاش فيها اي عيوب تجميع او ميكانيكا او كهربا
لا وجه للمقارنة بين العربيتين ثم من الذى أخبرك بعدم توفر قطع الغيار ، الصنى اليوم أصبحت عربية شعبية فى مصر و إنتشارها بات واسعاً للغاية و قطع غيارها و مراكز الخدمة منتشرين فى جميع أنحاء الجمهورية بدون تردد لو جاد فى قرار الشراء توكل على الله و لا تضيع وقت و قسم نيسان هنا غنى بمواضيع ثرية يمكنك الإطلاع عليها
بص يا برنس كل سنة وأنت طيب الأول.
ثانياً أنا اللى خلانى أرد عليك أن فعلاً ردك مستفز وكمان أنا شايف ــ بعد إذنك ــ أن تعليقك لا محل له من الإعراب يعنى صاحب الموضوع دخل قسم النيسان يسأل أصحاب النيسان عن السيارة يعنى اللى امتلكوها واللى ركبوها واللى ـ لا مؤاخذة وبدون زعل ـ بيفهموا فيها، وأنا بصراحة مش عارف موقع سيادتك فين من تلك الفئات بس شكلك كده لا امتلكتها وربما تكون ركبتها ولكن أكيد مبتفهمش فيها وده مش عيب ولا حرام؛ إنما العيب والحرام أننا نجادل أصحاب العلم بدون دليل اللهم إلى المجادلة.
ثالثاً، وأنا بصراحة شاكر سعة صدرك أنك فضلت تقرأ ردى لحد ثالثاً، المهم ثالثاً أن النيسان مش صناعة مصرية إنما هى تقفيل مصرى يا برنس تحت إشراف إدارة يابانية فى مصنع بمدينة ستة أكتوبر؛ يعنى الخامات مستودرة من اللى أنت بتعشقها وبتدافع عنها وبتفضلها عن الصناعة المصرية، يعنى استشهادك بالفيات والادا قياس فى غير محله يا زعيم؛ ثم أن التقفيل مصرى كمثال بسيط زى البى إم والمرسيدس دول برضوا تقفيل مصرى ولا أنت عايز تقول أن أنا لو معايا 500 ألف مشتريش مرسيدس ولكنى اشترى ثلاثة أوكتافيا لأنها مستوردة بصراحة منطق غريب.
رابعاً؛ وأنا مش متخيل أنك هتوصل لحد رابعاً؛ بس المهم رابعاً المقارنة بين السيارات لا تتم من حيث بلد المنشأ أو جنسية الصناعة ولكن من حيث اعتبارات كتيرة جداً من ضمنها الانتشار وقطع الغيار والصيانة والسعر والمعاملة الخاصة بالتوكيل وأماكن انشاره ............ إلخ،
وبعدين أنا عايز أسألك سؤال لو إنت عايز تشترى عربية مستعملة وبتقارن بين نيسان مو 2000، وهيونداى أكسنت مو برضه 2000 ، شوف سعر دى كام وقتها ودى كام وقتها، ثم شوف حالة دى إزاى وحالة دى إزاى، وبعدين سعر وسعر دى الآن، وبعدين إسأل رأى الناس إيه وهيرشحوا لك أى سيارة بين الاثنين، وبعدين خد الجواب وتعال موديل موديل، سنة سنة، واحدة واحدة لحد مو 2010، وإنت تعرف المقارنة تتم إزاى وعلى أى أساس.
وأخيراً وانت بتتقبل تحياتى وردى عليك، عاوز أقولك أن العربيات زى الجواز قسمة ونصيب يعنى كل واحد مكتوب له هيركب عربية نوعها إيه وهيمشى بها فين وقد إيه، يعنى الأمر محدد سلفاً، لو مفهمتش أنا عايز أقولك إيه فإنا بقولك إن أى عربية الواحد بيركبها وبتقضى أغراضه وقادر على مصاريفها تبقى دى أحسن عربية فى الدنيا ومفيش أحسن منه فهمت يابرنس، ومرة أخرى وأخيرة كل سنة وأنت طيب