الموضوع: شغل عيال صحيييييييييييح

ذكريات الدوم اللي كنا عمالين نفتكرها في موضوع ذكريات تهم مواليد السبعينات فكرتني بالطفولة و سذاجتها.. الواحد كانت الدنيا عنده بيضااااااااااااااااه.. أبيض من اللبن الحليب.. و كل الأفعال بتصدر عنه بعفوية تاااااااااامة.. انا مثلا كان عندي اعتقاد راسخ بإن المدرسين دول مش بشر زينا.. مالهمش بيوت بيروحوا لها و لا بيناموا زينا و لا بيزعلوا و يفرحوا وكده.. يمكن عشان فعلا زمان التدريس كان مهنة مقدسة و المدرس كان ليه هيبته :o

برضه ما كنتش مستوعبة ابدا فكرة الممثلين دول و بيروحوا فين بعد ما نقفل التليفزيون

ابن أختي بأه مرة دخل معايا في حوار حسيت بعدها أد ايه انا كنت باتعب ماما بأسئلتي و هي لذيذة جدا بتجاوب بمنتهى الصبر :o
كنا معديين بالتاكسي من ميدان طلعت حرب.. ده شاف تمثال طلعت حرب و بدأت الأسئلة:
- تمثال ايه ده يا خالتو؟
- تمثال طلعت حرب يا حبيبي
- ده المكان اللي كانوا بيحاربوا فيه؟
- لأ يا حبيبي هو الراجل كان اسمه كده
- و هو ايه اللي خلاه بأه تمثال؟
- لأ يا بابا ده الناس همه اللي عملوا له تمثال.. مش خلوه تمثال
- طيب و ازاي حطوه في التمثال؟
- لأ ماهم عملوا التمثال لما مات
- هو مات في الحرب؟
- يا حبيبي الموضوع مالوش علاقة بالحرب خااااالص الراجل كان اسمه كده.. أبوووووووه سماه كده

هنا بأه انا بدأت أشيط و الولد شاف ملامح وشي بتنذر بحرب بحق و حقيق مش حرب من اللي هو كان مصر عليها.. فقام سكت خاااااااالص.. مش عارفة ليه