الموضوع: هخبط فى ايه النهارده ؟؟

السلام عليكم ورحمه الله و بركاته
طبعا كلكو عارفين ان انا تخصص حوادث بس ما باليد حيله !!
ده حتى انا عمرى ما خبطت العربيه و انا بجرى عمرها ما تتخبط غير لما اكون ماشى محترم
المهم
العضو kamalsalem لاحظ انى بعمل حوادث كتير و قالى اعمل موضوع مجمع يعنى هو الى "وزنى" على الموضوع و هو المتحمل المسؤليه الكامله ..
قبل ما احكى الحوادث عاوز بس اقولكو انا متعلم السواقه و انا 15 سنه وكنت بسوق عادى بس مش لوحدى يا مع والدى يا اما مع اخويه ..عشان الرخصه ...حاليا عندى 19 سنه ..يعنى معايا رخصه بقالى سنه ..فى خلال السنه دى روحت اماكن كتير و بلاد كتييييييير وكله بيقولى "سواقتك حلوه يا خالد |
ندخل بقى فى الموضوع وكله يمسك قلبه ..ويجيب مناديل عشان الجماعه الى هيعطو و كده

الحادثه الاولى :
دى من سنه تقريبا ...
بطوله العربيه الفيكترا ...وكانت لسه زيييررووووووو ..بالظبط ماشيه 3000 كم
وطالع بيها الصبح بقى ...
مغسوله الغسله التمام ...
ماشى بقى "برنس" قافل الازاز عشان التابلوه ميتوسخش وماشى بالراحه عشان متتخبطش وبالراحه فى المطبات عشان العفشه .. يخرب بيت الحفاظ على العربيه يعنى
وكنت متوجه الى الاسكندريه رايح هناك شغل
وانا لسه على طريق المحله طنطا ..
ماشى فى الشمال
على سرعه 90
واذا بكلب ابن كلب
بيعدى الطريق هههه اه والله جاى من اليمين بيعدى رايح الناحيه الشمال
المهم اول حاجه جات فى دماغى ..الكلب ييجى فى الشمال و انا اروح فى اليمين
وبالفعل ...
بس الكلب غير رأيه وقرر يرجع فى اليمين تانى ..
طبعا قمت انا راجع الشمال تانى ..
قرر بردو يجيلى فى الشمال
مصمم يتخبط ابن ال.......
وفى النهايه لقيت نفسى قريب اووووووى
وقف القلب ادام العربيه ..شامخ الراس عزيز الكرامه ...
طاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااخ
يا نهار اسود
وبعدين ركزت قلت فى ايه يا واد يا خالد اجمممممد مفيش حاجه ده كلب يا عم
يخراااابى ممكن يكون الفوج اتكسر ..
قلت اما اركن و زعلان اووووى عشان غالبا الفوج مكسور
نزلت ..
لقيت الاكصدام دخل جواااااا خد معاه السربنتينه ..والسربنتينه دخلت جوااااااااا خدت معاها الرداتير ..والرداتير دخل جواااااااا كبس المروحه معاه ...وطبعا جاب الميه الى فيه
عشان مطولش عليكو اتصلحت فى التوكيل والتكلفه كانت 11 الف جنيه مصرى فقط لا غير وكانت صدمه كبيييييره سواء الحادثه او المبلغ


الحادثه التانيه:
بطوله العربيه الفيكترا بردو ...
كانت تقريبا ماشيه 15 الف كم لسه زيرو بردو يعنى مفيهاش خربوش بقى
ماشى فى امان الله وسط البلد
كنت فى الشمال ..بدات العربيات الى ادامى تهدى عشان فى ملف هما هيدخلوه ..
روحت انا فى اليمين ...
ماشى عااادى بس على يمين زحمه جامده اوووى عشان الملف
انا كنت ماشى حوالى 40 او 50
وفجاه..موتوسيكل صينى فاخر فرز اول
طلع من الملف ..الى العربيات بتلف منه ..طلع منه عكس الاتجاه ..وداخل عليا انا بقى كمان عكس الاتجاه ..
وباصص وراه عشان يشوف نظره الهزيمه على وجوه قائدى السيارات الى هو طلع منهم عكس اتجاه
وانا وشى بيجيب الوان و ايدى خررررررمت الكلاكس ...
ولسه هفرمل ..(كنت مزنوق بسبب الى ورايا كاااااااابس عليا)
face to face ya prince
وش فى وش يا برنس
الموتوسيكل الفاخر دخل فى الاكصدام وراس الاخ الى كان سايق اترزعت على الكبوت عملت نقره فيه ...
النتيجه
كسر الاكصدام من تحت ..كسر بخاخه الفانوس ..كسر فى الفوج تانى ..وكمان فى حته فى الاكصدام اتطبقت ..(تمن الاكصدام فقط 4000 جنيه)
نزلت لقيت الاخ بيقولى مش تفتح يا عم انت ؟؟ ولا عشان ركبتو ملاكى ؟؟
وهنا بقى فتحت القاموس اللغوى بتاعى و سمع ما فيه الخمر يا عين وطيرت على العربيه اجيب الاليكتريك و راسى و الف جزمه انى هكهربه لكن طبعا الناس اتلمت و مسكونى و بتاع وخدت العربيه و مشيت ...دى بقى مصلحتهاش عشان يومها اتاكدت ان العربيه هتتخبط تانى ..قلت اسيبها بقى وابقى اعملها مره واحده وكمان تأكدت ان الاكصدام تحديدا هيتخبط تانى


الحادثه التالته:
بطوله الفيكترا بردو
نازل فى يوم ...
مزاجى "عنب" والدنيا فل الفل ..
ركبت العربيه و دورت ...والبواب ربنا يباركله ياااااااااا رب فتح بوابه الجراج و عشان تبقو عارفين ..انا بخرج من الجراج بضهرى ..ومش بكون شايف الى رايح و الى جاى فالبواب بيطلعنى ...وبعتمد عليه
المهم
رجعت بضهرى و كالعاده بنزل بالراحه اوى من على المزلقان
وهو يقولى ارجع يا "خلود" متخفش ..
تعاااااااالى يا خلود متخفش مفيش حاجه
وانا رجعت بقى بقلب جامد
طاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا اااااااخ
بس يا خلود انت خبطت
نزلت لقيت ضهر عربيتى حاضن رفرف ماتريكس 2010 كانت واقفه ورايا على اليمين و مش ظاهره فى المرايه ..وانا كنت معتمد على البواب
والماتريكس بتاع معرض عربيات فتح جمبنا ..
المهم نزلت لقيت رفرف الماتريكس بقى "كوفته"
وعربيتى الاكصدام طلع من مكانه..ومتخربش جاااااااامد و البويه مقشره
اساسا بقى كان فى مشكله بينى و بين صاحب المعرض على انه بيوقف العربيات هنا و مش بنعرف نخرج من الجراج و كده ...
حصلت مشكله تانيه و زعيق و شتيمه و قله ادب بس هما الى بدأو ..وانا كنت ناوى اصلحله عربيته بس بسبب قله ادبه معملتش حاجه ..,الحمد لله بعد كام يوم اتصافينا و خلص الحوار ...طبعا برده معملتش حاجه فى الاكصدام لانى عارف انه هيتخبط تانى وقلت الاكصدام الى ادام بيريح شويه و مسلم نمر للى ورا


الحادثه الرابعه:
كالعاده ....
دماغى فل الفل ...مزاجى رايق وعنب على الاااااااااخر
نازل فى يوم مش فاكر والله كنت رايح فين بس كان مزاجى عنب زى ما قلت
ماشى فى شارع رئيسى
والدنيا تمااام
وعلى يمينى شارع جانبى
ونص نقل راجع بضهره داخل على الشارع الرئيسى ..مش الشارع الرئيسى بس ..ده داخل عليا انا ..!!
رد فعل طبيعى حطيت ايدى على الكلاكس ..وقلت ادوس و اجرى انا ..ولكن يشاء السميع العليم يقف ادامى تاكسى ابن حلال ..ينزل الزباين ...
بقيت بزمر زماره دوبل ..للنص عشان يقف ..,التاكسى عشان يمشى ..
ولا ده وقف ...ولا ده مشى
طاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااااااخ
صندوق النص نقل و الاكصدام الخلفى ..
خدو الباب الامامى يمين و الرفرف الى ادام بالحضضضضضضن
لا و البرنس لسه بيدوس ..وبيزق فى عربيتى
نزلت مقلتش ولا كلمه محترمه بصراحه غير 3 كلمات و هما "بصو بقى يا .....)الباقى مش هينفع اكتبه
اتفقت معاه على تصليح العربيه فى التوكيل ...ودفع التكلفه كامله بس الوالد رفض انه ياخد منه حاجه
هنا بقى بدات نفسيتى تتعب و المزاج العنب راح فى داهيه و كرهت العربيه و السواقه وكرهت نفسى
وقررت مركبش العربيه تانى

الكلام ده كان يوم حد


الحادثه الخامسه:
الحادثه الى فاتت زى ما قلنا كانت يوم حد ..

الخميس الى بعده على طول عندى امتحان ..
مستعجل و الجو حر موووووووت
قلت اخد العربيه
خدتها و روحت الامتحان تمام ...
مفيش مشاكل ..
طبعا كالعاده حليت وحش ..
وطالع من الامتحان بردو مقفول مش عشان الامتحان لا ..عشان خبطه الباب و الرفرف ...الى فات عليها 3 ايام
راجع فى الطريق
ماشى 100
فى الشمال ..
العربيات الى ادامى هدو عشان فى يو تيرن
خدت يمينى بكل هدوء
بسسسسسس
فى واحد بنص نقل لالالالالالالالازق على الشنطه
وانا فى اليمين على 100
لقيت جرار زراعى
شادد مقطورتين !!!!
طالع من التراب الى فى اليمين
عاوز يقطع الطريق بالعرض عشان يدخل اليوتيرن الى العربيات داخله فيه
لو فرملت ..ضهر العربيه راااااااح بسبب النص نقل
فقلت مش هفرمل
كبست بنزين على الاخر عشان الحق اعدى قبل ما الجرار يقفل الطريق ..
طبعا ايدى على الكلاكس ..
وهو مصمم يقطع الطريق بشكل غبى
وقفل عليا زياده (كنت هعدى لولا انه قفل عليا زياده والله)
بدات اروح معاه فى نفس الاتجاه ..على اليوتيرن ...
بس لقيت نفسى خلاص هتحشر
وادامى حاجه من اتنين
يا اما اخبط الجنب الشمال فى العربيات الى على الشمال
يا اما اخبط الجنب اليمين فى المقطوره
قررت اخبط اليمين :
1-عشان الباب و الرفرف مخبوطين
2-المقطوره لما اخبطها مش هتتهز ولا هتتاثر انما لو خبطت العربيات هتلف و هتبقى كارثه
بعدت جنبى الشمال عن العربيات ..وظبت المسافه و داخل بجنبى فى المقطوره و مفيش حل
طاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااااخ
سمعت الصوت و مرضتش ابص فضلت ماشى دقيقتين
فى حاله ذهوووووووول
ولقيت العربيه مليانه ازاز مكسر
ركنت لقيت المرايه اليمين جات فى المقطوره والمرايه جات فى ازاز الباب كسرته
وباعجوبه جنب العربيه فلت
تخيلو ان مقبض الباب اتحك فى المقطوره ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟
كده خبطتين فى نفس الاسبوع
قررت اصلح ..
1-الاكصدام من يوم خبطه الموتوسيكل ...صلحت الى كان فيه ورشيته
2-رشيت الباب و الرفرف جبته على البارد
3-المرايه غيرتها
اتكلفت 2000 جنيه

دى كانت حكاياتى مع الاوبل ..
غير بقى ترييحات ...
..طبعا فلت من الموت ييجى 100 مره
باقى بقى حادثه الاوكتافيا الى فى التوقيع ..
انا لسه حاكيها قريب و ليها موضوع منفصل بالصور فى قسم سكودا
زى ما قلت بقى الموضوع على مسؤليه العضو kamalsalem
وهو الى وزنى اعمل موضوع
وارجو محدش يفهمنى غلط ...
الموضوع دردشه و هزار يعنى

لا اله الا الله محمد رسول الله
والله يابنى انتا واخد عين جامدة
وحد قريب منك على فكرة