غريبة

**MMamdouh** · 27-05-2007 03:09 PM

لاحظت فى الشوية البسيطة اللى المنتدى ظهر فيها ان فى اكتر من مرة ناس قفشت على بعض وناس سخنت على بعض و ناس بتاخد كل حاجة على صدرها.... فى حين ان فى المنتديات التانية اللى انا مشارك فيها - و هى منتديات السواد الاعظم من اعضائها اجانب - ملاقتش القصص دى اللا بسيط جدا و نادرا جدا... مع ان المنتديات دى بتضم ناس من كل بلد و ثقافات مختلفة و المفروض يبقى فى فروق اكبر بين الاعضاء عن ما هو موجود فى منتدانا

هل معنى كدة ان العيب فينا؟
هل احنا وحشين و هما احسن مننا؟
هل مستوانا الفكرى اقل منهم و مبنعرفش نتكيف فى مجتمع واحد؟

اكيد العيب فينا بس فين؟؟ و ايه اسبابه ؟ و ايه طريقة علاجة؟ انا اتعملت مع امريكان واستراليين و اوروبيين و مسيحيين و ناس مش مؤمنة بوجود الله اساسا و على الرغم من كدة مخبطناش فى بعض او قفشنا على بعض فى اى موضوع... حتى لما كتبت عن موضوع الرسوم اللى كانت على الرسول صلى الله عليه و سلم الناس تفهمت اللى كتبتة بالرغم ان قليل اوى منهم اللى مسلمين و كانت معظم الردود من الناس دى و كانت بتندد بالرسوم دى كلها... فعلا غريبة ان بالرغم من الاختلافات دى كلها حسوا انى واحد منهم ولازم يساندوه

فى ناس منهم سالتنى كتير عن الاسلام و العرب و الارهاب و القصص دى لانهم شافوا ان اللى بيعاملهم مش زى الفكرة اللى فى دماغهم فا حبوا يعرفوا اكتر المجتمع اللى انا فيه... محدش فيهم هاجمنى او حتى علق تعليق مش ظريف... فى حين اننا بينا و بين بعض بنقفش عشان واحد جازوب اجابة معجبنش واحد تانى او واحد عايز يتريق على الناس و خلاص او واحد بيخش بمليون يوزر و يعمل هيصة على الفاضى.. ليه احنا كدة... و ليه هما كده؟؟ فين الفرق؟

اكيد هما مش انصح مننا ولا اذكيا عنا... انا هناك بالنسبالهم قاموس الدايو و فى قصمين بحالهم انا تقريبا اللى ماسسهم و فى يجى الف واحد ضايفنى على الماسنجر عشان يسالنى فى صيانة و تعديلات يبقى احنا مش اقل منهم ولا حاجة بالعكس احنا احسن... انا مش بقول انا سوبر مان... انا واحد عادى زى زيكم و مش شايق اى ميزة اضافية عندى تفرق عن اى واحد هنا... دا انا مجبتش مجوع يدخلنى هندسة حتى

انا بصراحة زعلان من الموضوع دة جدا و قلت اشاركم حزنى لو حد فيكم عنده راى او مشاركة يمكن يقدر يفهمنى ايه السبب فى كدة

MMamdouh

**PAYOO** · 27-05-2007 03:33 PM

السبب أننا شعب دمه حامي وبيسخن من الهوا وأي حاجه يعملها مشكله من مافيش

وبطبعنا بنميل للتعصب وحماقيين حبتين وانفعاليين تلت حبات

ونحب نعمل من الحبه قوبه (طبعا مش كل المصريين) ، ولو بصيت على الأهلي والزمالك مثلا هاتلاقي إللي بقولك عليه متجسد في الجمهور بتاعهم

بس بالرغم من ده كله أحنا شعب طيب جدا وناس قلبها أبيض وأقل كلمة شكر تكفينا (وأحنا اجدع ناس نطلع نطلع وننزل على مافيش)

وهاقولك مثال بسيط جدا

لو أنت ماشي بعربيتك وواحد زنق عليك مره واحده وكان هايلبسك في عمود هاتلاقي نفسك مش طايقه وهاتجري وراه وتصر على أنك تيجي قدامه وتضايقه أكتر ما هو ضايقك عشان تعرفه أنك أنت كمان تقدر تعمل معاه أكتر ما عمل معاك

ولو نفس الشخص وعمل نفس الموقف بس راح مطلع أيده من الزجاج بعلامة أسف مش قصدي هاتلاقي نفسك ولا كأن في حاجه حصلت وهاتبتسم كمان عشان تحسسه أنك جدع زي ما هو جدع وبيعتذر عن غلطه أنت كمان جدع وبتقبل الأعتذار

ملخص إللي عاوز أقوله أننا شعب لما حد يبلطج علينا نوريه أننا ألعن منه في البلطجه ومافيش حد أحسن من حد
ولو حد طلع زوق وأدب وأخلاق هانظهر له أننا أجدع وأكثر زوقا وأدبا وخلاقا

يبقى أحنا شعب طيب ولا لأه يا عم الحاج؟

**Hossam_Hassan** · 27-05-2007 03:33 PM

كلنا مخنوقين بس مش معترفين بالسبب الأساسى, ياريت تشاركونا فى الموضوع اللى فى اللينك ده, و انا رأي انه ليه علاقة قويه بحالة القفش اللى ماسكة فينا 24 ساعة

http://www.nilemotors.net/Forum/viewtopic.php?t=1876

**د.أحمد سمير** · 27-05-2007 04:05 PM

المسألة تكمن في العاطفة .. فأنت حين تكتب ويرد شخص ما عليك إيجاباً ، تبدأ العاطفة في الظهور ، ثم ينشأ العشم ، والارتباط ، وحين يرد عليك شخص سلباً تبدأ اعاطفة في الظهور ، ثم ينشأ التحفز ، ثم العداء .
في الخارج كل شيء له حدود .. مش معنى ان أنا وانت متفقين اننا نبقى أصحاب ، ونسند بعض على طول الخط ، وده بالضبط يعني ان مش معنى اننا مختلفين اننا نبقى أعداء ونشتم بعض على طول الخط .
وهكذا على قدر الإيجابيات تكون السلبيات .
المسألة تقاس هكذا .. ولكن اسمح لي أنا أفضل العاطفة والحرارة في الصداقة ، والهدوء والعقلانية في التحفز ، هذا هو السبيل الوحيد الذي يجعلنا أفضل . أما أن نكون بلا عاطفة مثلهم أو نكون عاطفيين تماماً بدون عقل فكل هذا محصل بعضه .
تقبلوا خالص مودتي

**عزيز محمد** · 28-05-2007 01:11 AM

السلام عليكم ورحمة الله وبركاته

للأسف معظم الناس تفتقد أبسط قواعد التحاور والتفكير العلمى المنظم

وجرب تقعد فى أى مكان فيه مشكلة محتاجة حل او قرار يجب ان يتم البت فيه وهتسمع العجب العجاب

ولما تيجى تتامل معظم المشاكل الاجتماعية (البيت/ العمل/ الشارع) تكتشف إن أصل المشكلة سوء تفاهم اكثر منه سوء نوايا من الناس

وللأسف قواعد التحاور دى مالهاش دعوة لا بتعليم ولا بسن كبير ولا حتى بالفلوس والمركز الكبير
والدليل على كده العدد الهائل من البرامج الحوارية التى تستضيف أناس يفترض أنهم لديهم ما يقولونه، فتنتهى الحلقة كما بدات ولا تستفيد منها إلا الزعيق والاحتجاج والصداع وهو ده الحوار اللى الناس بتتعلمه

ولا حول ولا قوة إلا بالله

**nabaster** · 06-01-2010 05:10 AM

استكمالا لسلسة رفع المواضيع القديمه ليراها الاعضاء الجدد

الموضوع ده قرب يكمل تلات سنين

ومن اوائل مواضيع الاجتماعي بس كلام محمد ممدوح عجبني بجد

A.Yakout