الموضوع ده انا قابلته حديثا و تقريبا كلنا مر بالاختيار بين كام شركة و حدد حسب أولوياته
فتخيلت نفسي قاعد فى الكافيه بتاع Soma و قلت أطرح السؤال بصفة عامة نشوف الأراء :Oc_sun1[1]:
مش كل الشغل بنلاقى فيه كل حاجة احنا عايزينها
بتحسب أولوياتك فى الشغل ازاي؟
يعنى المرتب أهم عندك عن الخبرة العملية؟ قرب الشغل من البيت أهم و لا التأمين الصحى؟
اسم الشركة مهم و لا لأ؟
بالنسبة لى أنا قابلنى خيارين كالتالى
الأول شركة فى القاهرة يعنى هأتغرب عن أهلى و أأجر شقة و الحياة الأجتماعية هتضعف بس باخد هناك خبرة حلوة أوي و الشغل ممتع و الشركة فيها منظومة ادارية و Environment كويسة
و التانى شركة فى محل أقامتى و انا قاعد وسط أهلى و بشوف صحابى و كمان المرتب أعلى بس الشغل مبيديش خبرة خالص و منظومة الشغل بطيئة زي المصالح الحكومية و يخنق حبتين.
انا من النوع اللى بيحب الشغل و البحث و الطموح بس انا شايف للخيار الأول التمن مش كفاية و العائد المادي يستاهل التضحية و ترك العائلة؟ خصوصا أن والدي و والدتى بيكبروا فى السن و بقيت احس بالندم لما أبعد عنهم كأنى مقصر لأنى مش معاهم
الخيار التانى انا مش حاسس بالامان لأنى مبخدش خبرة و مش ببقى على بعضى من غير شغل خصوصا انى شايف ان عقلى عنده استعداد يكتسب خبرة بسرعة لو الفرصة متاحة و صعبان عليا مستغلش الامكانيات اللى عندي بس عايش حياة اجتماعية أحسن وسط العيلة و المرتب كويس (حاليا و الله أعلم بعد كده معدل زيادة الراتب فى الخيارين عامل ازاي)
عايزين نشوف بقى:
- أولوياتكم فى الشغل بصفة عامة
- ايه سبب تفضيلكم للأولوية دي و لو مكانى تختاروا ايه؟ :)