أنا حصل معايا موقفين ....
الموقف الأول:
كنت في شبرا في شارع شبرا عند الدوران و كان معايا واحد صاحبي راكب جنبي وأنا سايق في أمان الله لقيت ميكروباص اللي على يميني زنق عليا و حكلي البابين اليمين رحت راكن أنا و نزلت أنا وصاحبي نتخانق .... الناس إتلمت وخلاص ياباشا حصل خير دي جات في الصاج و شوية كلام من دول وكل واحد راح لحاله .... رجعنا العربية و مشيت وبعدها ب 5 دقايق بأدور على الموبايل ( كنت حاطه في الجراب اللي بيتعلق في هواية التكييف على التابلوه ) ملقتوش .... فص ملح وداب ... كان موبايل نوكيا 6600 اللي بيقولوا عليه الباندا وكان ساعتها لسه نازل السوق وشاريه ب 4300 جنيه ......
الموقف التاني :
كنت في التجمع الخامس جنب البيت وماشي على رجلي رايح الجامع اللي جنبنا .. لقيت عربية لانوس فضي فيها إتنين شباب وقفوا جنبي بيسألوني ( ما تعرفش فين دار أيتام أحباب الله اللي في التجمع؟؟ قلتلهم ما أعرفش قالولي هي دار هنا عايزين ندفع فيها فلوس زكاة ..قولتلهم أول مرة أسمع عنها قالولي طب تسمحلنا نعمل مكالمة من تليفونك نكلم واحد نسأل على العنوان علشان تليفونا فاصل شحن قولتله آسف مش معايا رصيد قام مطلعلي شريحة موبايل وقالي طب ممكن نحط الشريحة دي في تليفونك و نعمل مكالمة قولتله إتفضل و أخدت منه الشريحة بتاعته وحطيتها في تليفوني و أديته التليفون من هنا وده راح جايب الأولاني وطااااااااااااااااااااااا ر .......
كان موبايل نوكيا n95 وكنت شاريه ب 3600 جنيه