مشكلة في صاج كبوت الاكسيل
يا جماعة الخير انا عندي مشكلة كبيرة في صاج الكبوت لعربيتي الاكسيل مو97
طبعا الاولاد الحلوين اللي ماليين الشوارع ما يحلاش ليهم قعدة ولا لعب الا على كبوت عربيتي بالذات مش عارف ليه - بيعملوها زحليقة
والكبوت صاجه خفيف جدا وكل يوم الصبح اصبح الاقيه متطبق زي ما يكون نازل عليه صخرة من الجبل ده غير الجروح والخرابيش
وكل يوم ارده وامسحه بالفوطة ويرجع تمام - مش تمام اوي عشان منظر العضعضة والتطبيق اللي فيه
رحت للسمكري عمل فيها لواء ونصايح وبيقول لي ابعدها عن العيال (ازاي؟؟؟) طيب حطها في جراج (مفيش، انا في منطقة شعبية مافيهاش الكلام ده وحتى لو فيه انا لا اامن صبيان الجراجات بيبهدلوا العربيات عن تجربة سابقة)
خلاصة الكلام طلعت انا غلطان
وطبعا عمل عليا شغل بشوية دقدقة ومسح عالبارد للكبوت وشوية خبطات بسيطة بالرفارف وبعدين لحم العضم بالكبوت بانبوبة سيلكون كاملة (25جنيه) ولهف مصنعية 70جنيه
ثاني يوم كان جمعة وصبحت كالعادة لقيت شياطين الليل لعبوا على العربية برضه وطبقوا الكبوت وفكوا لحامات السيلكون وراحت عليا المصاريف اونطه
السؤال هو
حد عنده حل لتحميل صاج الكبوت بحيث يستحمل لعب العفاريت بتوع الشوارع؟؟
افيدونا افادكم الله