كلمة ونص- 12 مارس 2008

منذ عدة سنوات رأيت بعينى رأسى الموقف التالى
داخل احدى محطات البنزين الواقعة فى منتصف طريق القاهرة الإسكندرية الصحراوى باتجاه القاهرة، واثناء قيامى بتعبئة خزان السيارة بالوقود، دخلت سيارة حمراء من طراز المازدا 323 متوسطة الحالة وزجاجها قد تم تسويده بالكامل برقائق الفيميه ، يقودها شاب صغير السن يبدو انه من خريجى كلية الشرطة ويبدو انه يعتز بشدة بهذا الموضوع وذلك لقيامه بتعليق البدلة البيضاء ذات النجوم النحاسية القليلة على كتفيها على شماعة شباك السيارة الخلفى ولصق نسور من كافة الالأحجام والأشكال على كل مكان يسمح بذلك فى سيارته، جاءت وقفة المذكور بجانبى ، ونافثا دخان سيجارته المشتعلة فى وجه صبى المحطة طالبه بأن يملأ خزان سيارته بالوقود، فرد صبى الوقود عليه قائلا:" لو سمحت يا باشا اطفى السيجارة" وهنا ابدى الشاب الأرعن اغرب رد فعل يمكن تخيله، حيث اشار بمنتهى القرف الى البدلة التى يعلقها خلفه فى اشارة واضحة لصبى الوقود انه فوق التعليمات، فما كان من صبىالوقود سوى ان رد عليه بصوت تعمد ان يسمعه كل الواقفين قائلا:" على راسى من فوق يا باشا بس البنزين معندوش فكرة"

البعض يغرهم وهم السلطة فيتصورون انهم فوق القانون ، اما ان يمتد هذا الوهم ليصور لهم انهم فوق قوانين الفيزياء، ؟؟؟؟؟ لا ادرى ماذا اقول

الشرطة فى البلد دى فاكرة نفسها فوق كل القوانين حتى قوانين الطبيعة
وخصوصا الى معلقين نجمتن تلاتة بس

دا ان دل علي شئ يدل علي التخلف و النقص للشخصيه دي اللي فاكره نفسها فعلا تقدر تتحدي اي حاجه بسلطتها

بالمناسبه
كنت ماشى جنب صيدليه افريقيا فى مكرم عبيد
المهم عربيه 405 روا متفايمه كسرت عليا و على عربيتين غيرى عشان يعدى هو
المهم بقى ماشى و احنا الثلاثه مشين وراه و تشاء الاقدار ان العربيتن القدامى يدخلو يمين و ابقى انا وراه لوحدى
المهم انا كانت دماغى رايقه اليوم ده وقولت اديله درس صغير و ببساطه
الطريق كان زحمه رحت داخل بهدوء شديد جنب منه و و الطريق يدوب حاره واحده
لما الطريق مشى و كما كنت مخطط انه اكيد هيحاول يكسر عليا
و بالتالى لم اعطه الفرصه لذلك (البوز بيز)
فخبط المريه بتاعتى بايده و قد يزعق سبتو يعدى والطريق و قف تانى
و عمل شى غريب
اولا قعد يشتم بالفاظ قليله الادب
ثانيا رجع بالعربيه لورا عشان يخبط عربيتى
هنا انا رحت نازل و قافل العربيه (الطريق اصلا و اقف)
لقيت البيه الضابط مجرد ملازم اول ماشى يبلطج على خلق الله و بما انى محترم
فكلمته بمنتهى الزوق و هو بمنتهى قله الادب كاننى فى القسم عنده
شديت معاه و عملته بنفس اسلوبه و بقيت انا الضابط و هو المواطن عن طريق نرفذته بذوق و ادب
و اخيرا اكتشفت انه جبان جدا جدا جدا و مجرد انسان عديم المسئوليه
و بالتالى لا يستحق المعناه بس انا كل القولتهوله ان يحاول يحترم الناس عشان الناس تحترمه
و للاسف مفيش فايده

الحقيقة الكلام ده بقى بيحصل من ناس كتيرة مش من ظباط الشرطة فقط اللي فيهم ناس كتير مؤدبين و قمة في التواضع,,واكيد فيهم الوحش زي اي قطاع..

حضرني موقف مع واحد من اياهم أيضا الذين يتعاملون مع المواطنين العاديين علي أنهم حثالة المجتمع.
في صباح أحد الأيام وصلت لمقر عملي في مدينة نصر, و لكم أن تتخيلوا حجم المعاناة التي أتكبدها للفوز بالجائزة (الركنة).
و بعد محاولات مضنية لم أجد سبيلا الا أن أركن في طريق مسدود فرعي بجانب أحد البنايات.
و من هنا بدأ الموقف, بعد أن اتخذت المكان المناسب علي جانب الطريق, خرجت من سيارتي و هممت باغلاقها. فجأه سمعت صوتا أجشا يقول بهدوء شديد: "أنت بتركن هنا ليه؟؟"
نظرت تجاه مصدر الصوت, فوجدت رجلا في العقد الرابع من العمر و يرتدي زيا عسكريا غربيا فتكهنت أنه يتبع القوات الخاصة مثلا أو الحرس الجمهوري, و كان مستندا علي سيارته داخل ذلك الطريق الفرعي
فرددت عليه بابتسامة ودودة: "معلش والله مش لاقي مكان في المنطقة كلها و اتأخرت علي الشغل. "
هو(برزالة): "دة مش جراج علشان تركن فيه. الأماكن هنا علشان الناس اللي ساكنة في العمارة دي."
أنا(بصبر و أدب): "انا اسف . بس لو فيه أماكن بره كنت ركنت فيها طبعا. أنا مش بركن هنا دايما بس مضطر معلش."
هو(مهددا): "شيل العربية دي من هنا. و لو شفت العربية دي هنا تاني مش هيحصل كويس. "

صراحة أنا فوجئت بالرد بهذا الأسلوب, خاصة أني تعمدت الحديث بحرص و أدب شديدين كي لا يصل كلامي بصورة خاطئة أو يتصيد هو الأخطاء فيه. وشعرت وقتها باحتقار شديد تجاه هذا الرجل الذي يحتمي بمنصبه و زيه, و صراحة شعرت أيضا بقلق شديد ازاء هذا التهديد.

و بين احتقاري للرجل و قلقي من التهديد كان لابد أن اتخذ قرارا عقلانيا يرد لي جزء من كرامتي و في نفس الوقت يجنبني أي قرار طائش قد يتخذه هذا المتعال.
كل هذه الأفكار دارت في رأسي في أجزاء من الثانية, و توصلت لقرار ثم رددت عليه قائلا:
"مفيش مكان بره الحقيقة دلوقتي, ان شاء الله لما انزل أصلي الظهر هبقي أنقلها لو لقيت مكان"
وأعطيته ظهري وغادرت المكان و سمعته يقول "أنا حذرتك" , فلم ألتفت اليه و استمريت في السير و خرجت من هذا الطريق الفرعي و أنا في قمة غضبي و اندهاشي من هذا الأسلوب المستفز.
و قبل وصولي لمقر عملي وجدت مكان يصلح لركن السيارة بجانبه, فكرت للحظات في أن أترك سيارتي في مكانها لبعض الوقت, و لكن صوت العقل أخذ يلح علي كي أنقلها و أن "أقصر الشر" كما يقول المثل.
و فعلا عدت للسيارة و نقلتها, و لكني لم أجد هذا الشخص موجودا لحسن الحظ لأني لم أكن أضمن رد فعلي لو كان تحدث معي ثانية.

هذا الموقف مر علي حوالي عامين. ولكنه محفور في ذاكرتي بكل التفاصيل, و كلما رأيت أو سمعت موقفا مشابها, يزداد اشمئزازي و غضبي من تلك الفئة من المجتمع التي تتعامل مع المواطن العادي علي أنه مجرم و يستحق الموت حرقا.

عادى و احسن تعامل مع الناس دى هو التجاهل التام او التكبر و الاحتقار اذا لزم الامر و خالوا بالكو من القاعدة الذهبية "اذا تطاولت الايدى و الالسنة تساوت الروؤس"
يعنى لو شتم اشتم لو مد ايده مد ايدك