صوت غريب فى الايبيزا ومش قادر احدد منين

السلام عليكم ورحمة الله وبركاته

انا من يومين وانا ماشي بالعربية بدات اسمع صوت غريب وهى ماشية هو الصوت بالضبط جاى من الناحية اليمين للعربية والصوت بيكون ملحوظ فقط والعربية ماشية لكن لو هى واقفة مافيش اى صوت غريب غير صوت الموتور وهو والحمد لله ناعم ومافيهوش اى حاجة شاذة انا جربت وانا واقف بالعربية ادوس جامد على البنزين لكن الصوت لم يظهر غير بس لما بمشي
والصوت ده عامل زي ما تكون ماسك منشار وبتنشر فى قطعه فيبر سميكة لكن صوت النشر ده مكتوم .

واخر الحاجات الى عملتها الاسبوع الى فات فى العربية :

1. تعديل مستوى ارتفاع دواسة الدبرياج .
   
2. تثبيت البطارية لانها كانت بتتحرك شوية .
   
3. تغيير قربة زيت الباكم بتاع الفرامل .
   
4. تثبيت وربط غطاء الكارتيرة الفيبر الى بيكون فوق العجله وتم ربطه بكولية بلاستيك .
   
5. ومعظم الحاجات ده كنت عامل بيها مواضيع فى القسم .

ملحوظة هامة :

بس المهم انا بعد ما خلصت شوية الشغل دول انا قلت احط تفويلة بنزين للعربية بس قلت احطلها بنزين 92 بدل من 90 قلت لتنظيف الموتور وتفويق العربية ومش عارف هل ده صح ولا خطأ انا فولت العربية من بنزينة مصر الموجودة فى شارع احمد عرابي فى المهندسين !!!!
من بعدها بدات اسمع الصوت ده وانا محتار جدا فيه ومش عارف اتصرف ازاى ومنتظركم بفارغ الصبر ......

اولا ممكن يكون جزء من الكارتيره دي اللي ركبتها حاكك في العجله
او ممكن يكون بلي العجل عاوز يتغير
وعن البنزين انا اصلا مش باحط غير 92 واظن ده الافضل والفارق المادي بسيط . واللي عملته عادي ..

شوف بلى العجل ...بس نصيحه بقى لو طلع فعلا بلى العجل متجبش بلى من عند بتاع قطع غيار الابيزا ....هتفك بليك وتروح بيه لحد بتاع بلى skf تديلو البلى بتاعك ويديك زيو بالظبط ده احسن وارخص حاجات بسيطة وده اللى انا عملته وشايف انه تمام عشان المحلات بتاعت قطع الغيار هتقولك ده المانى وبيبوظ بسرعه ...وكمان لما تيجى تركبه روح لواحد عنده مكبس بلاش حد يدق عليه ... وطبعا كل الرغى ده لو طلع فى الاخر العيب من البلى ههههههههه

يا باشا الله يكرمك والف شكر لإهتامامك واسمحلى ببعض التعليقات :

1. كده حضرتك طمنتنى بخصوص البنزين انا كمان كنت مستبعد انه يكون هو المشكلة لكنى كنت شاكك فى محطة البنزين نفسها والبنزين ممكن يكون مضروب علشان كده انا ذكرت مكنها علشان لو حد من الاعضاء كان لية تجربه معها وخلينا نفترض ان البنزين مغشوش هل ممكن يعمل الصوت زي ده وساعتها يكون اية الحل ؟
   
   
2. اما بخصوص بلي العجل يا ريت حضرتك توضحلى اكتر فين مكانه بالضبط واية اعراض تلفه والى ممكن يخليه يتلف وكمان هل بيتباع جديد ولا استيراد وسعره كام ؟
   
   
3. اما بخصوص الكارتيرة انا ده اعتقد انى اعرف اتحقق منها بنفسي لكنى افتكر انها كانت بعيده عن العجلة لان الراجل بعد ما ثبتها انا بصيت عليها معاه وكانت بعيده عنها ...

انا اسف للاطالة لكن حضراتكم ما تعرفوش الموضوع ده معكن عليا ازاى ....

.

أستاذ / batros

انا متشكر اوى لإهتمام حضرتك بس كان ليا عندك كام سوال :

1. من كلام حضرتك كده بيدل على انك مريت بالموضوع ده طيب ممكن تقولى اية الى كان بيحصلك علشان كده غيرت بلي العجل ؟
   
2. وهل فى ورش مخصوصة للبلي بس وبيبقى اسمها اية ؟
   
3. مين الى بيركب البلي ده الميكانكي ولا العفشجي ؟
   
4. وحضرتك كلفت الموضوع ده كام سعره لو جديد من عند بتوع قطع غيار الايبيزا (ويا ريت تقولى لقيته عند مين منهم وبكام) وسعره لو استيراد او فى ورشة البلي ؟

على فكرة ده اول عربية ليا علشان كده انا مش متمرس فى حاجات كتير فعايزكم تصبروا عليا شوية لانى لسة مش فاهم اى حاجة فى اى حاجة :khd:

ان شاء الله تلاقي حل طيب مفكرتش تراجع عالشكمان يكون سايب ولا حاجة والصوت علي طول ولا في الغيار الأول بس مممممممم سؤال بسيط شكله ايه الكوليه اللي ربط بيه الكارتيره لان عندي الكارتيره مربوطة في الإكصدام بمسامير شك وده حل مؤقت لغاية مااعرف تركيبها الصح هو الكوليه بتاعنا اللي نعرفه ولا حاجة تانية وشكله ايه؟

السلام عليكم
طبعا الأعضاء الأفاضل ردو عليك وكلامهم زي الفل ولا يوجد غبار عليه وكلها احتمالات لهذا الصوت ولكن لي تعليق
أولا للتأكد من ان الصوت سببه تلف بلية العجله هترفع العربية من الناحية اللي انت شاكك ان الصوت جاي منها أكنك هتغير الفردة لو نايمه مثلا وهتلف العجلة بايدك لو حرة ومافيش اي صوت وخفيفة يبقي مش البلية لو حسيت باحتكاك وسمعت الصوت ده يبقي تتأكد انه من البلية ومش من تيل الفرامل مثلا
وتكرر اللي عملته في العجلة دي مع الأربع عجلات عشان تطمئن علي حالة بلي العجل كله
وان شاء الله بالطريقة دي هتوصل للمكشلة فين سواء بلي عجل او تيل فرامل او العجل ومشتملاته سليم والمشكلة مثلا في تثبيت الكرتيرة او الشكمان
ولو طلع بلي عجل شوف الأخ batros عمل ازاي ومنين واعمل زيه لأن ده الطريقة الصح اللي تخليك مطمئن علي القطعة اللي ركبتها انها اصلية
والله الموفق

اقتباس:

---

المشاركة الأصلية كتبت بواسطة windsofchange

ان شاء الله تلاقي حل طيب مفكرتش تراجع عالشكمان يكون سايب ولا حاجة والصوت علي طول ولا في الغيار الأول بس مممممممم سؤال بسيط شكله ايه الكوليه اللي ربط بيه الكارتيره لان عندي الكارتيره مربوطة في الإكصدام بمسامير شك وده حل مؤقت لغاية مااعرف تركيبها الصح هو الكوليه بتاعنا اللي نعرفه ولا حاجة تانية وشكله ايه؟

---

أهلا بيك ايهاب باشا
كل عام وانت بخير وجميع أعضاء نايل موتورز وعيد سعيد ان شاء الله
عملت ايه في التسقيط وايه أخر الأخبار
بخصوص تثبيت الكارتيره اللي فوق العجلة لو بتاعت العربية الأصلية هتلاقي اونت بتركبها في مكانها ليها مسامير مثبته داخل الفجوة وبارزة كده بيدخل كل واحد في مكانه وليه صامولة بلاستيك بتتربط فوقه للتثبيت
وعلي أطراف الرفرف والاكصدام ليها أماكن تثبيت بمسامير خارجية برده بلاستيك وليها أماكنها اللي بتتربط فيها
استطلع المكان واغسله كويس وانت هتلاقي اللي بتكلم عليه ان شاء الله
لكن استخدام الكولية ده لو مش موجوده الصواميل ومسامير التثبيت دي وضاعت فاللي بيركب بيريح دماغه لكن الصح انك تدور علي مسامسر قريبة لنفس السن وصواميل أيضا وتشتريها للتثبيت بها

وربنا يوفقك ومنتظر ردك

أ / windsofchange

بخصوص الكوليه البلاستيك ده هو قطعه بلاستيك كده طويلة نسبيا وفيها عروة زي بتاعه حزام البنطلون كده بس على اصغر بتدخل طرف القطعه البلاستيك ده فى العروة وبتتفكل عليها وبعد كده بتقص الزيادة بتاعت الكولية او زي الى بيقبضوا بيها على الناس فى الافلام الاجنبي كده :)

على فكرة الصوت بيبدأ اول ما العربية بتتحرك وبيفضل على طول اول ما بقف او وانا واقف ما فيش اى صوت والصوت من قدام من الناحية اليمين فى العربية وكنت خايف جدا انه يكون من الموتور لانه بيكون تقريبا الصوت ده ماشي معاه بس لما العربية بتتحرك مش وهى واقفة علشان كده حسيت انها مش من الموتور لانها لو منه كان الصوت هيفضل موجود من اول ما ادور العربية لكن ده بس بيظهر فى التحرك بيها واخد سرعه ولا ايه راى حضراتكم ؟ !!!!


المهندس / إيهاب منصور

الف شكر ليك يا باشا وعلى تعبك الدائم معايا وعلى إهتمامك وردك على الموضوع .

1. طيب ليا سوال تانى بسيط هل كل الاحتمال لحدوث الصوت ده ان يكون من بلي العجل ؟
   
   
2. طيب اعتقد ان الصوت لو سببه تيل الفرامل وانا بالفعل لسة مغيره من قريب زي ما انت عارف فى الموضوع السابق اعتقد ان الصوت هيكون صريخ الفرامل لما اجى ادوس فرامل بس لانها لسة جديده لكن مش الصوت ده ولا ممكن يكون فيها حاجة تانية بتعمل الصوت ده وخاصه بالتيل وعموما هو صوت نحر مكتوم ولازم تركز شوية علشان تحدده واوقات بيكون واضح وعالى ؟
   
   
   
3. انا جربت انى اضغط على جنب العربية اليمين وهى واقفة سمعت صوت تزييق وانا بنزل فى الجنب وبيطلع على عكس الشمال هل ده برده ليه علاقة بالصوت او علاقة ببلي العجل ولا ده قصه تانية بتاعه مساعدين ؟
   
   
   
4. ولو هو بلي العجل ده بيتباع بكام وهل بيتباع عند بتوع قطع الغيار الجديد ولا الاستيراد ؟
   
   
   
5. الموضوع ده مين الى بيكشف عليه الميكانيكي ولا العفشجي ؟

وما زلت فى رد الاخ / batros فى شرح ما كان يحدث له بالضبط وعن كيفية إصلاحها ؟

منتظر حضراتكم ،،

سيدي الفاضل
بلي العجل ده راكب جوه الصره ولو هوا بايظ بيبان من الاختبار اللي قالك عليه مهندس ايهاب منصور . او ممكن كمان تاخد سرعه بسيطه بالعربيه وتمور وانتا ماشي لو استمر الصوت بتاع النحر او الخشونه ده يبقى بلي عجل . وهوا مالوش عمر محدد . وضغطك على جنب العربيه وهيا واقفه وسماع التزييق ده اختبار لجودة المساعدين ومالوش علاقه ببلي العجل . والافضل انك تروح لميكانيكي في حالة احتياجه للتغيير والموضوع بسيط جدا ومش محتاج قلق . انا غيرت الاتنين اللي قدام مع بعض من فتره وكانوا ب 190 جنيه . ولازم يتجاب جديد ماينفعش استعمال في الكلام ده في رايي.
كل ده في حالة طلعت المشكله منه . بالتوفيق واتمنى اكون افدتك .

ألله يخليك ويكرمك يا باشا انا بالفعل عملت موضوع انى وانا ماشي على سرعه وحبت الفتيس على المور والصوت استمر فعلا زي ما حضرتك قلت تمام وانا اتصلت بسامح ايبيزا علشان اسئلة على البلي قالى البلى للفردة الواحدة عاملة 75 جنية ايطالي .

المهم انا روحت للميكانيكي بتاعى بس للاسف قافل ومش بيرد على الموبيل تقريبا هيعيد من النهاردة ولا اية مش عارف فهل فية مشكلة لو مشيت بالعربية لغاية بعد العيد ولا عادى ؟

وهل لازم اغير الفرديتن مع بعض ولا لو طلعت واحدة بس اغيرها والتانية تمشي عادى ؟

معلش سوال تانى استحمولنى يا رجالة هو رلمان بلي العجل للفرده الواحده بيكون كام بلية هل هى واحدة ولا اكتر لان معظم الناس بتتكلم بصورة الجمع ؟؟؟؟؟

وكل سنة وانتم طيبين يا رجالة وانا فى انتظاركم يا شباب ,,,,,

ياسيدي الفاضل شوف راي الميكانيكي بتاعك اولا بعد الكشف
ويفضل انك تغير الاتنين اللي قدام مع بعض
وهو بيكون قطعه واحده لكل عجله
ومافيش خطوره ان شاء الله انك تستنى لبعد العيد
واخيرا كل سنه وانت طيب
بالتوفيق

ان شاء الله تتحل المشكلة علي خير وان كنت افضل متجريش بالعربية لأني سمعت والله اعلم لو البلي فصل ولا ايه العجل تنطر من مكانها ياريت تأكديد علي كلامي؟!.......بشمهندس ايهاب حبيب قلبي الحمدلله سقط واستلمت العربية من اسبوع كده في شويه عيوب بسيطة في الشغل بس الحمدلله العربية ماشية دلوقت ناقصها تغيير الشكمان بواحد اكبر لأن المكنة مكتومة اووي بعد العيد ان شاء الله وكل سنة والأعضاء وكل المسلمين بخير تقبل الله قريب موضوع هتكلم فيه بالتفصيل واوضح للأعضاء بالتفصيل كل اللي حصل في التسقيط والحمدلله حمدا طيبا كثيرا مباركا فيه

كل عام وكل الأعضاء بخير والامة الاسلامية كلها بخير

انا الحمد لله الميكانيكي الى بتعامل معاه نزلى يوم الوقفة وطلبت مه انه يجرب العربية وماكنش سامع اى حاجة وقعدنا نجرب وقت كتير انا سامع وهو ما خدش باله الى فى الاخر من الصوت المهم رجنا على الورشة رفع العربية فك تصاه الكاوتش اليمين وبيلف العجله وبيهزها لفوق ولتحت قالى فعلا ده البلية ضايعه المهم قال يفك بقى علشان يكشف عليها ونشوفها اول ما مسك فردة الكاوتش وبيفك وجد ان صامولة الكوبلن او الصامولة الى ماسكة الفرده بالسرة سايبة تماماً ولما حرك العجلة لفوق وتحت لاقها تقريبا سايبه قالى الحمد لله انك اكتشفت الموضوع ده لانى العجله كانت ممكن نطرت منك وقالى ان هو ده السبب فى الصوت المهم ربط الصامولة كويس وانا دايس فرامل على الاخر وربط برده الفردة الشمال وطلعت جربت الحمد لله كله بقى تمام الصوت راح تماماً والحمد لله .

1- وكنت عايز اعرف رايكم هل كلام الراجل تمام ومظبوط ان فعلا هو ده السبب او انه كان ممكن ينطر الفرده وانا ماشي ؟

2- ولما سالته اية الى بيخليها تعمل كده قالى الشوارع السرعه فى الشوارع الجميلة بتاعتنا المكسرة قالى كفيلة تفك العربية كلها ؟

3- الصواميل بتاعت الكوبلن ده ببتباع جديدة ولا اية نظامها ؟

انا متشكر جدا جدا جدا لكل الاعضاء الى شاركونى فى الموضوع جزاكم الله كل الخير ،،

الحمد لله انك لحقت المشكلة دي قبل ما تعمل مصيبه لأن للأسف فيه حد فك الصامولة دي قبل كده و م ربطهاش كويس وكمان بتتبنط عشان مش تتفك لوحدها وكده المشكلة اتحلت ولا تحتاج منك لتفكير
لأن السبب الرئيسي اللي يخلي الصامولة تفك هو عدم تبنيطها
والتبنيط ده هو عبارة عن حاجه زي بنز كده بيعمله في الصامولة بعد ربطها بعزم قوي جدا عشان م تتفكش مهما كان مع المشي لأن كلامه غلط في ان الفردة تفك بسبب الشوارع المكسرة والا كانت زمان اي عربية تلاقي فردتها ماشيه جنبها ولكن السبب في الفك هو عدم الربط بعزم قوي وعدم تبنيط الصامولة بعد التربيط

واسجد لله شكرا انه ما فكتش منك وانت ماشي .... الحمد لله

الحمد لله اخى ايهاب ان ربنا ستر وانا بالفعل والله اول ما روحت صليت ركعتين شكر لله ان ربنا سترها معايا يبقى علشان كده بقى هو طلب منى انى ادوس فرامل كويس اوى على الاخر وهو قعد يقرط اوى اوى اوى فعلا .

وكل سنة وحضرتك طيب وجزاك الله كل الخير ،،

أحمد ربنا عشان أنا كنت هموت من الحركة دية وربنا ستر الحمد لله

الحمد الله انك اكتشفتها .. وربنا ستر
ومبروك على علاج المشكلة
بالتوفيق