صوت غريب فى الايبيزا ومش قادر احدد منين

**egman** · 07-09-2010 09:21 PM

السلام عليكم ورحمة الله وبركاته

انا من يومين وانا ماشي بالعربية بدات اسمع صوت غريب وهى ماشية هو الصوت بالضبط جاى من الناحية اليمين للعربية والصوت بيكون ملحوظ فقط والعربية ماشية لكن لو هى واقفة مافيش اى صوت غريب غير صوت الموتور وهو والحمد لله ناعم ومافيهوش اى حاجة شاذة انا جربت وانا واقف بالعربية ادوس جامد على البنزين لكن الصوت لم يظهر غير بس لما بمشي
والصوت ده عامل زي ما تكون ماسك منشار وبتنشر فى قطعه فيبر سميكة لكن صوت النشر ده مكتوم .

واخر الحاجات الى عملتها الاسبوع الى فات فى العربية :

تعديل مستوى ارتفاع دواسة الدبرياج .
تثبيت البطارية لانها كانت بتتحرك شوية .
تغيير قربة زيت الباكم بتاع الفرامل .
تثبيت وربط غطاء الكارتيرة الفيبر الى بيكون فوق العجله وتم ربطه بكولية بلاستيك .
ومعظم الحاجات ده كنت عامل بيها مواضيع فى القسم .

ملحوظة هامة :

بس المهم انا بعد ما خلصت شوية الشغل دول انا قلت احط تفويلة بنزين للعربية بس قلت احطلها بنزين 92 بدل من 90 قلت لتنظيف الموتور وتفويق العربية ومش عارف هل ده صح ولا خطأ انا فولت العربية من بنزينة مصر الموجودة فى شارع احمد عرابي فى المهندسين !!!!
من بعدها بدات اسمع الصوت ده وانا محتار جدا فيه ومش عارف اتصرف ازاى ومنتظركم بفارغ الصبر ......

**grumby78** · 07-09-2010 10:34 PM

اولا ممكن يكون جزء من الكارتيره دي اللي ركبتها حاكك في العجله
او ممكن يكون بلي العجل عاوز يتغير
وعن البنزين انا اصلا مش باحط غير 92 واظن ده الافضل والفارق المادي بسيط . واللي عملته عادي ..

**batros** · 08-09-2010 12:48 AM

شوف بلى العجل ...بس نصيحه بقى لو طلع فعلا بلى العجل متجبش بلى من عند بتاع قطع غيار الابيزا ....هتفك بليك وتروح بيه لحد بتاع بلى skf تديلو البلى بتاعك ويديك زيو بالظبط ده احسن وارخص حاجات بسيطة وده اللى انا عملته وشايف انه تمام عشان المحلات بتاعت قطع الغيار هتقولك ده المانى وبيبوظ بسرعه ...وكمان لما تيجى تركبه روح لواحد عنده مكبس بلاش حد يدق عليه ... وطبعا كل الرغى ده لو طلع فى الاخر العيب من البلى ههههههههه

**egman** · 08-09-2010 01:22 AM

يا باشا الله يكرمك والف شكر لإهتامامك واسمحلى ببعض التعليقات :

كده حضرتك طمنتنى بخصوص البنزين انا كمان كنت مستبعد انه يكون هو المشكلة لكنى كنت شاكك فى محطة البنزين نفسها والبنزين ممكن يكون مضروب علشان كده انا ذكرت مكنها علشان لو حد من الاعضاء كان لية تجربه معها وخلينا نفترض ان البنزين مغشوش هل ممكن يعمل الصوت زي ده وساعتها يكون اية الحل ؟
اما بخصوص بلي العجل يا ريت حضرتك توضحلى اكتر فين مكانه بالضبط واية اعراض تلفه والى ممكن يخليه يتلف وكمان هل بيتباع جديد ولا استيراد وسعره كام ؟
اما بخصوص الكارتيرة انا ده اعتقد انى اعرف اتحقق منها بنفسي لكنى افتكر انها كانت بعيده عن العجلة لان الراجل بعد ما ثبتها انا بصيت عليها معاه وكانت بعيده عنها ...

انا اسف للاطالة لكن حضراتكم ما تعرفوش الموضوع ده معكن عليا ازاى ....

.

**egman** · 08-09-2010 01:28 AM

أستاذ / batros

انا متشكر اوى لإهتمام حضرتك بس كان ليا عندك كام سوال :

من كلام حضرتك كده بيدل على انك مريت بالموضوع ده طيب ممكن تقولى اية الى كان بيحصلك علشان كده غيرت بلي العجل ؟
وهل فى ورش مخصوصة للبلي بس وبيبقى اسمها اية ؟
مين الى بيركب البلي ده الميكانكي ولا العفشجي ؟
وحضرتك كلفت الموضوع ده كام سعره لو جديد من عند بتوع قطع غيار الايبيزا (ويا ريت تقولى لقيته عند مين منهم وبكام) وسعره لو استيراد او فى ورشة البلي ؟

على فكرة ده اول عربية ليا علشان كده انا مش متمرس فى حاجات كتير فعايزكم تصبروا عليا شوية لانى لسة مش فاهم اى حاجة فى اى حاجة

**windofchange** · 08-09-2010 02:37 AM

ان شاء الله تلاقي حل طيب مفكرتش تراجع عالشكمان يكون سايب ولا حاجة والصوت علي طول ولا في الغيار الأول بس مممممممم سؤال بسيط شكله ايه الكوليه اللي ربط بيه الكارتيره لان عندي الكارتيره مربوطة في الإكصدام بمسامير شك وده حل مؤقت لغاية مااعرف تركيبها الصح هو الكوليه بتاعنا اللي نعرفه ولا حاجة تانية وشكله ايه؟

**ehab_mansour** · 08-09-2010 10:35 AM

السلام عليكم
طبعا الأعضاء الأفاضل ردو عليك وكلامهم زي الفل ولا يوجد غبار عليه وكلها احتمالات لهذا الصوت ولكن لي تعليق
أولا للتأكد من ان الصوت سببه تلف بلية العجله هترفع العربية من الناحية اللي انت شاكك ان الصوت جاي منها أكنك هتغير الفردة لو نايمه مثلا وهتلف العجلة بايدك لو حرة ومافيش اي صوت وخفيفة يبقي مش البلية لو حسيت باحتكاك وسمعت الصوت ده يبقي تتأكد انه من البلية ومش من تيل الفرامل مثلا
وتكرر اللي عملته في العجلة دي مع الأربع عجلات عشان تطمئن علي حالة بلي العجل كله
وان شاء الله بالطريقة دي هتوصل للمكشلة فين سواء بلي عجل او تيل فرامل او العجل ومشتملاته سليم والمشكلة مثلا في تثبيت الكرتيرة او الشكمان
ولو طلع بلي عجل شوف الأخ batros عمل ازاي ومنين واعمل زيه لأن ده الطريقة الصح اللي تخليك مطمئن علي القطعة اللي ركبتها انها اصلية
والله الموفق

**ehab_mansour** · 08-09-2010 10:43 AM

المشاركة الأصلية كتبت بواسطة windsofchange

ان شاء الله تلاقي حل طيب مفكرتش تراجع عالشكمان يكون سايب ولا حاجة والصوت علي طول ولا في الغيار الأول بس مممممممم سؤال بسيط شكله ايه الكوليه اللي ربط بيه الكارتيره لان عندي الكارتيره مربوطة في الإكصدام بمسامير شك وده حل مؤقت لغاية مااعرف تركيبها الصح هو الكوليه بتاعنا اللي نعرفه ولا حاجة تانية وشكله ايه؟

أهلا بيك ايهاب باشا
كل عام وانت بخير وجميع أعضاء نايل موتورز وعيد سعيد ان شاء الله
عملت ايه في التسقيط وايه أخر الأخبار
بخصوص تثبيت الكارتيره اللي فوق العجلة لو بتاعت العربية الأصلية هتلاقي اونت بتركبها في مكانها ليها مسامير مثبته داخل الفجوة وبارزة كده بيدخل كل واحد في مكانه وليه صامولة بلاستيك بتتربط فوقه للتثبيت
وعلي أطراف الرفرف والاكصدام ليها أماكن تثبيت بمسامير خارجية برده بلاستيك وليها أماكنها اللي بتتربط فيها
استطلع المكان واغسله كويس وانت هتلاقي اللي بتكلم عليه ان شاء الله
لكن استخدام الكولية ده لو مش موجوده الصواميل ومسامير التثبيت دي وضاعت فاللي بيركب بيريح دماغه لكن الصح انك تدور علي مسامسر قريبة لنفس السن وصواميل أيضا وتشتريها للتثبيت بها

وربنا يوفقك ومنتظر ردك

-

الموضوع: صوت غريب فى الايبيزا ومش قادر احدد منين

LinkBack

أدوات الموضوع

عرض

-

-

-

المواضيع المتشابهه

أنا مش عارف احدد زيت العربيه مظبوط ولا لا

مساعدة في ال gps محتاج احدد الاتجاهات

عايز احدد مدى استهلاك اللانوس 1 للبنزين ؟؟؟

جديد فى الايبيزا وعايز اعرف احيب منين الحاجات ده

صوت غريب مش قادر أحدد ممكن يكون سببه إيه

الكلمات الدلالية لهذا الموضوع

المفضلات

المفضلات

ضوابط المشاركة