حقيقة حملة الفحص المجانيه.....شكرا كيا كوريا
يوم السبت روحت علشان حملة الفحص المجانيه على الساعه 9 مساءً كان في عربيات بيكانتو كتير هناك وعليها ارقام ترتيب دور الفحص او الصيانه
ده غير عربيات كارينز وسيراتو اعتقد للصيانه بس مش لحملة الفحص مجاني ...لحقوا ييجوا امتى!!!
بعد شويه قابلنا موظف الإستقبال وشرحت له مشكلة الفرامل في الإستقبال وكتب في وصف الأعمال
كشف على بدال الفرامل
كشف على تسريب بنزين من طلمبة البنزين !!!!!!!!
سألناه ايه موضوع تسريب البنزين قال انهم هيشيكوا عليه
جهزوا العربيه لبسوا الكرسي اكياس وحطوا كرتون في الدواسه
ونزلنا قاعة الإنتظار الشاشه كانت عطلانه ومفيش حاجه تبين العربيه اللي شغالين فيها
وكل شويه نطلع نشوف ايه الاخبار ..... مفيش جديد
على الساعه 11 فضلنا فوق وشفتهم بيجربوا عربيه بيكانتو حمرا على الطريق
وبعدها بشويه 2 جربوا العربيه بتاعتي كل واحد لوحده كانوا بيشوفوا موضوع الفرامل
ودخلوها تاني وكنت قلقانه جداً احسن الحلم يتحقق :eee:
على 11.30 خرجت العربيه ومهندس الصيانه قالنا ثواني بينشفوها بس
وطبعاً ولا حد نشفها ولا حاجه ومغسوله من بره اي كلام
وهو بيسلمنا العربيه قالنا تم تغيير (الزور) او الأنبوبه الواصله بطلمبة البنزين
طيب ليه ؟ انا مش فاهمه حاجه :36_1_35[2]:
علشان جالنا order من كيا كوريا بإن في عيوب صناعه في بعض العربيات ممكن تؤدي الى تسريب البنزين
وجالنا اوامر استدعاء للعربيات دي بأرقام شاسيهاتها لتغيير الجزء ده
تصرف محترم جدا من كيا الأم
الوكيل حب يتصرف بذكاء وما يعلنش ان في عيوب صناعه واعلن انها مجرد حملة فحص مجانيه
وبخصوص موضوع الفرامل قال انهم رجلشوها وان كان فيها هواء وان عادي ان الدواسه تضعف او تهبط لتحت شويه
لو واقفه في زحمه او اشاره لأن السيرفو مش بيلحق يجمع
وجربنا الفرامل بس مش ظاهر إذا كانت المشكله اتحلت ولا لأ لازم تتجرب في الزحمه
خلاص هنمشي
اكتشفنا ان لمبة الفرامل اللي في الناحيه اليسرى مش بتنور :8954[1]:
جه المهندس وشاف المشكله وجربها بنفسه واتأكد ودخلها الورشه تاني
فكوا الفانوس وقعدوا يجربوا لغاية ما اشتغلت بس العامل مش لاقي المسامير
اللي فكها من الفانوس فين؟ تا ااا تا اا تا
واخيرا لقاها وركبها وخرجنا بسلام الساعه 12
ملاحظاتي على اليوم ده ان المقابله كانت ممتازه من موظف الإستقبال مش زي المعتاد
ومهندسين الصيانه اهتموا بالشكوى من موضوع الفرامل وكانوا بيسمعونا بصدر رحب
المواعيد اللي حددوها للفحص من 9: 11 حاجه وهميه وحاجه تنرفز
تقريبا بدأوا في عربيات الفحص على 10.45 وكل اللي كان قبل كده صيانه
غسيل العربيه من الخارج سىء زي المعتاد
قاعة الإنتظار الشاشه معطله ومفيش مكان منفصل للمدخنين اتعمينا من السجائر
اتمنى يكون في شاشه بتبين العربيات وهما شغالين فيها
العربيات كتير والموظفين والفنيين عددهم قليل جداً واعتقد ان هو ده سبب ان ممكن يحصل سهو او اهمال
ودي سياسة القطاع الخاص بصفه عامه
من غير ضحك او تريقه قبل ما اروح الوكيل حلمت ان الوكيل مشغل مع الفنيين 2 او 3 كده اطفال زي بليه
وان هما دوول اللي بيجربوا العربيات ويتسببوا في خبطها
وان واحد منهم ركب عربيتي يجربها وبسرعه هوووب خبط في الحائط من الجنب وهو بيلف :T_thum1[1]:
تقريباً مواضيع الشكاوي الأخيره من الوكيل ومن ان العربيات تروح تتصلح تتبهدل زياده كان مأثر عليا
:girlsthink::brn: مش عارفه ايه الرغي ده كله آسفه طولت عليكم
