عمرك حسيت انك زهقان من الادب؟
انا النهاردة حاسس اني مش قادر اجامل حد... وبصراحة مش عارف ليه... انا اصلاً عندي مشكلة مع الغباء.. ولما بلاقى قدامي حد غبي دمي بيفور
تحت البيت تل زبالة والعمال بتوع البلدية قاعدين فوقه يشحتوا
الخضري لسه مديني البطاطس بالليل بسعر... ولما رحتله من شوية بس كان معايا العربية اداني سعر تاني خالص... رحت فاطر عليه وعلى اللي خلفوه من اول رمسيس الاول لحد والدته شخصياً وفي الاخر قاللي طب يا باشا هات جنيه وكل سنة وانت طيب رحت سيبنه ومشيت
لسه بلف لقيت عيلة من اللي بيبخروا العربيات دول دافسة المبخرة جوة الصالون.. من غير تفاهم رحت واخد منها المبخرة وواخدها من ايدها وكنت خلاص هضربها.. وقلتلها لو لقيت اي بقعة زيت من الهباب البخور ده في العربية من برة او من جوة هقتلك... وبعد ما بصيت في العربية واطمنت... طفيتلها البخور برجلي واديتها جنيه وسبتها ومشيت
رجعت البيت لقيت حد من السكان الافاضل واخد مفتاح الاسانسير... معرفش هو مين... بس كتبتله ورقة في منتهى قلة الادب وعلقتها جوة الاسانسير... ونفسي بس اعرف هو مين عشان اقسم بالله هفك مكان المفتاح ده وهخليه ياكله... ايوة هخليه يبلعه.. وانتظروا التقرير المصور
هل ده يجعلني قليل الادب؟ غالباً اه.. بس مش طايق التفاهة والغلاسة وتقل الدم وقلة الادب اللي الناس بقت فيها
معلش طولت عليكوا ومتزعلوش مني انا بفش بس
