لو الواحد هيركن العربية لمده سنة يعمل فيها ايه؟

**Adham** · 10-09-2010 09:39 PM

العربية بتترفع علشان مايبقاش فية حمل عالمساعدين و المقصات و العفشة ككل
و العجلات (نتيجه تفرغ الهواء من الاطار مع الركن و تلفة ) لذا بتشيلها من السيارة كذلك منعا لتلف الاطار او سرقة الجنوط

و تسليم النمر لان لو بعد ماترجع من السفر رحت تجدد الرخص لقيت عليها مخالفات في الفترة اللي كانت مرفوعه فيها مش حاتعرف تثبت انها كانت مركونة الا لو كنت مسلم النمر
ساعتها مش حايبقى عليها اي مخالفات

**MAX_PIN** · 10-09-2010 11:35 PM

المشاركة الأصلية كتبت بواسطة tot

السلام عليكم، لو الواحد هيسافر سنة يعمل ايه فى العربية، يعنى ايه اللى بيتفصل و ايه الحاجات اللى تتخلع منها عشان ماتبوظش

نصيحة ياأستاذ توت
متركنش او ترفع العربيه فى الشارع حتى لو كانت حارة سد لأن ساعات
بتوع الصرف الصحى بيعملوا شغل او يكونوا عاوزين يحفروا فى مكان تحت العربيه او
ممكن الشارع يترصف حتى لو كان مرصوف طبعا كلنا عارفين ليه وده موضوع يطول شرحه
ومناقشته المهم خد بالك من الحاجات ديه وربنا يوفقك ...عيد سعيد

**tot** · 11-09-2010 12:18 AM

شكرا يا جماعة للردود، انا ان شاء الله لو هركنها هاركنها فى جراج خاص ، بس مش عارف حكاية العجل اللى افكه ده اوديه فين، متهيالى الواحد يبيع العربية احسن من الحوار ده، و بعدين حكاية التشحيم و الكلام ده مشكلة

**Adham** · 11-09-2010 01:04 AM

طالما مسافر و الشقة مقفولة يبقى ممكن تحط العجل في البلكونة بس تخلية واقف رأسي

**BomBom** · 11-09-2010 12:32 PM

المشاركة الأصلية كتبت بواسطة adham

و تسليم النمر لان لو بعد ماترجع من السفر رحت تجدد الرخص لقيت عليها مخالفات في الفترة اللي كانت مرفوعه فيها مش حاتعرف تثبت انها كانت مركونة الا لو كنت مسلم النمر
ساعتها مش حايبقى عليها اي مخالفات

طيب هل تسليم النمر في الحالة دي يعتبر تنازل عن باقي مدة الترخيص السارية ؟ و هل عند استرجاع اللوحات بتبقى بنفس النمر ؟ و اخيرا ، لو حضرتك تعرف خطوات الاجراء الرسمي لتسليم النمر للمرور ، مع الشكر .

**Adham** · 11-09-2010 12:50 PM

لا اعتقد ان الترخيص سيسقط لان الضريبة مسددة

و انما لما تعود من سفرك بالسلامة ستذهب للمرور و تاخذ نفس النمر مرة أخرى (بالطبع لانها المثبتة في رخصة سيارتك) و كل الغرض هو انك بتبلغهم ان السيارة مرفوعه و لا تستخدم و بالتالي لا يتم احتساب مخالفات و كذلك لو اترفعت سنتين مثلا لا يتم محاسبتك ضريبيا عن السنة الثانية الغير مسددة و عندما تعود لاستخدامها يتم مطالبتك بالضريبة من وقتها

يعني لو العربية مرفوعه كذا سنة لا يتم مطالبتك بسداد الفترة دي ضريبيا

روح المرور و خد معاك النمرة و الرخصة و ان شاء الله سيكون الموضوع سهلاً

**lancerevolution** · 11-09-2010 12:53 PM

المشاركة الأصلية كتبت بواسطة bombom

طيب ايه الداعي لكده ؟

عشان هتاخد مخالفات غلط و لما تيجى ترخص هتفور دمك ع الفاضى

**Adham** · 11-09-2010 01:47 PM

المشاركة الأصلية كتبت بواسطة onz

انا من رائي
انك تأجر دكان ( جراج ) لمدة سنة ( اجار جديد و ادفع مقدما السنة دي ) و يكون في منطقتك ( و ياريت واحد تكون عارفه )
و تحط العربية فيه بعد ما تغطي الفرش الداخلي كويس و تغطيها من بره بالوتر بروف
و تريح بالك و تنسناها
انا عارف انها هاتكون مكلفه بس هاتريح بالك من ارف الجراج العام و بهدلة الوقت اللي هايعدي عليها كده

المشاركة الأصلية كتبت بواسطة ahmedsrs

دى احسن فكرة عشان تريح دماغك

ياسيدي الفاضل مش معقول يأجر محل لمدة سنة او اكثر بكذا الف جنية علشان يركن فية السيارة

يعني لو العضو ساكن في مدينة نصر اقل محل حايلاقية عالاقل ب 300 جنية لو منطقة غير تجارية او متطرفة يعني في السنة يدفع 1200 جنية فما بالك لو منطقة حية و تجارية او ساكن في المهندسين او الزمالك مش اقل من 1000 او 1500 جنية في الشهر يعني لو مسافر سنتين او ثلاثة يدفع نص تمن العربية دة يبقى الافضل يسيبها في الشارع لانة مش حايصرف تلفيات و خبطات المبلغ دة

**tot** · 11-09-2010 03:34 PM

طب معلش سؤال كمان، المفروض اغيرلها الزيت قبل ماركنها، هى اصلا قدامها 200 كيلو و ميعاد الزيت ييجى، ولا اسيبه و اغيره اما ارجع ان شاء الله

**Adham** · 11-09-2010 05:22 PM

لا ماتغيروش مش مهم لانك اول لما تيجي بالسلامة مفروض تفضي الزيت كلة و تحط زيت جديد بعد ماتدور

و لو حاتسافر فترة طويلة سنين يعني يبقى مفروض تدلق زيت في غرف الحريق من مكان البوجيهات بعد ماتركن السيارة و كلة تمام و تركب البوجيهات تاني بعد ماتحط الزيت دة و ماتدورش تاني بعدها

علشان الزيت دة بيحافظ على البساتم و الشنابر انها ماتقفشش

هو حضرتك مسافر فترة قد أية ؟؟؟