الساده اعضاء قسم كيا المحترمين .....
الساده ملالكي سيراتو المحبوبه ( كيداهم ) المبجليين ....
السلام عليكم ورحمة الله وبركاته
تحيه طيبه وبعد ...
اولا كل عام وانتم بخير و عيد سعيد عليكم يا رجاله السيراتو وارجوا انكم تكونوا اضيتوا وقت سعيد في العيد بلالين و بمب و كعك وكده .
ابتدى الجد يا رجاله والله ابتدى الجد .
الحمد لله بعد دراسه للسوق المصري والعالمي , وبعد اجراء العديد من النقاشات الحاده و الغير حاده والموضوعيه و الغير موضوعيه و الهادفه و الغير هادفه الخ الخ الخ .
وبعد صلوات من الاستخاره ..
بفضل من الله و توفيقه
توكلت على الله وبدات اخد الخطوات الفعليه لشراء الكوبيه
ورحت لجابر عبد الشهيد و قلتلهم انا عايز اطلب ايد بنتك المصونه و الجوهره المكنونه حبيبتي الكوبيه
قالولي احنا بناسب راجل يا ابني
قولتلهم مهرها كام
قلولي حسب لون شعرها ( انا اسف ) حسب لونها
قلتلهم انا عايز احمر و انا جاي من نايل موتورز
قالولي زياده الف يعني 136 الف موديل 2011 و احنا منعرفش مين نايل موتورز دول
الكلام من اوله مش حلو بس علشانك يا حبيبتي انا مستعد امشيلك حافي والغالي مبيجيش بسهوله.
فقلت نوسط حد – كان حد من الاعضاء الله يباركله اداني نمره مدير المبيعات في جابر عبد الشهيد وفعلا اتصلت بيه وقلتله انا جاي من نايل موتورز وانته الكل في الكل .
هو قالي انه ميعرفش مين نايل موتورز بس المهم شالي الاف الزياده بسبب اللون ( و الله حمدت ربنا )
و الحلوه قربت
طلبي يا رجاله حد يعرف واسطه ينزلي في السعر انا مش طماع هما 2000 جنيه بس والله وهقفل بقي وهدفع وانا ساكت
او لو حد يعرف يفاصل والله مستعد اجي اخده معايه انا مبعرفش افاصل وانتوا اخواتي اللي يقدر على حاجه يقولي
حتى لو هتدعولي و تصلوا على النبي ( اللهم صلي وسلم عليه) انا موافق كفايه ده
اسف للاطاله بس انتوا اخواتي وملياش غيركم وكل سنه و انته طيبين
اخوكم م / ياسر محسن