لو زوجتك أخذت الاولاد و سافرت تتفسح عند أهلها لمده أسبوع زيى أنا ايه احساسك؟
عرض للطباعة
لو زوجتك أخذت الاولاد و سافرت تتفسح عند أهلها لمده أسبوع زيى أنا ايه احساسك؟
يا جماعه قولوا الصدق تحبوا التصويت سرى علشان الزوجات مايعرفوش؟
لو معندهاش كمبيوتر و مش بتدخل على الـ Nile Motors ممكن أقول رأيى بصراحة...!
يا دكتور متعملش مشاكل للاعضاء .....
السلام عليكم ورحمة الله وبركاته
بصراحة أنا لم أصوت لإن الاختيارات المتاحة لا تعكس مشاعرى بدقة
انا شخصيا باشعر بالآتى:
أول يومين اقول: يا سلااااام وأقعد مزأطط عشان خلصت من زن عبد الرحمن اللى ما بيخلصش، وأخرج أقابل أصحابى وأرجع متأخر وأنا ضميرى مستريح من الشعور بالذنب إنى باتفسح وسايب الجماعة شايلين الهم لوحدهم
بعدها بتروح السكرة وتأتى الفكرة: وحيد بين 4 حيطان مش لاقى حد يعبره ولا يكلمه ولا يشغله، وبعدين بيوحشونى واقعد مشغول عليهم، يا ترى عاملين إيه؟ والولد كويس ولا لأ
الصراحة الواحد من غير أولاده وأهل بيته بيحس إنه صعلوك أو متشرد ومالوش لازمة
وكفاية كده لحسن هاعيط
:cry: :cry: :cry: :cry: :cry: :cry:
ياجماعه يبقى انا مش مظبوط و لا عندى حاجه غلط و لازم اتعالج و لا ايه؟
فى الأول بكون سعيد بالحرية وارمى الهدوم على الأرض وابعتر قطع العدة فى كل حدب وصوب واسيب الأطباق على الترابيزة واعمل كل الممنوعات
بس هو وحياتك يوم واحد وبعدين احس ان الدنيا وحشاااااااااااااااااااا
واقعد استنى اليوم اللى هترجع فيه ويوم ما تكون جاية لازم ارتب الشقة واوضبها علشان تكون فى استقبالها فى احسن صورة
الحياه من غير رفيق الكفاح لا طعم لها حتى لو كانوا مبيبطلوش طلبات وبيخسروا كل الأجهزة المنزلية وانا اصلح وبيصغروا دماغهم فى حاجات عبيطة كله يهون جنب كلمه" سلامتك،اعملل حاجة سخنة تشربها " اللى الواحد بيسمعها نابعة من القلب لو مرهق او مريض
انت تحس اكتر بالموضوع لو انت مسافر اكتر من اسبوع زيي كده بسافر 3 شهور بعيد عن اسرتي .. بأشعر بالوحدة وابني بيوحشني جدا...
الوحدة قاتلة يا صديقى, رغم الكثير من المشاكل التى تحدث بسبب تفاهات فى نظرنا والكثير من الطلبات وعقدة الاباء " البامبرز " الى بقة بى 67 جنيه وشوية حاجات تانية الا ان هيا دى الى بتدى للحياه طعم, زى الفلفل الحريف على الطعام فهو مقبل وفاتح للشهية, من الاخر طالما تزوجت انسانة تحبها او على الاقل تتقبلها فمن الصعب ان تبعد عنها ولو يوم واحد.
يا د.إيهاب .. لقد قلبت على المواجع ..
فأنا أعيش بمفردى منذ ما يقرب من شهر ونصف .. لظروف إمتحانتها .. ولن أقول لكم على إحساسي وأنا أعيش لوحدى .. لولا وجودى معكم فى المنتدى لكانت الحياة لا تطاق .. فتخيلوا أننى لا أعرف أعمل لنفسي أى حاجة .. ودايما بعتمد على أكل المطاعم .. ولما أحب أغسل الهدوم أتصل بيها نصف ساعة حتى تشرح لى كيف أشغل الغسالة والفرق بين الأبيض والألوان ومع ذلك لا أعرف أعملها لوحدى رغم الإرشادات وطبعا كل المطلوب أنى اضع الغسيل فى الغسالة وأضغط على الزر ..
وطبعا تعالوا شوفوا الشقة وهدومى مترمية فى كل حتة ولا بقايا الأكل اللى مش عارف أعمل فيها إيه ..
إحنا من غيرهم ولا حاجة .. واللى يقول غير يبقى مش عارف قيمتهم ..