-
كلامي بجد مش تريقه .. يمكن لو انت قريت ردودي بتلاقي فيها نوع من السخريه او من الهزار ... بس بجد ... ردي ده بجد ...
انا شايف ان انسب حاجه ليك .. الفيسبا ... بجد ... ببساطه .. علشان الموتوسيكلات الصيني دي كترت قوي ... و مش برستيج خالص ... الفيسبا حلوه و برستيج ..
عيوبها : هايدخل عليك البرد و يا سلاااام علي البرد علي الفيسبا .. ده انا بافكر فيه بس كده .. اقول مش عاوز فيسب ..
حل تاني : ال سيات و ال 126 ... عندنا مدرس كان في الخدمه الاجتماعيه .. جايب سيات لونها اخضر ... والله يا عم العربيه 100 100 .. بس هوه جالي مره اشتكي ان الكرسي اتخلع من مكانه .. بس عمليه .. و حلوه في المشاوير ..
ال127 غاليه و مش مستاهله .. السيات تجيبها ب 5000 جنيه .. ال 127 تجيبها ب 17000 جنيه اقل واجب ...
بس طبعاُ تعمل حسابك .. لو حاجه باظط .. لو حصل حاجه .. كده يعني .. و بما ان المشوار قريب فال سيات و ال 126 هاتقضي الغرض .. (يبقي ايجاد حل علشان المدام بقي و راحتها ههه ماهي لازم توصلها برضه للشغل :d ) ...
بجد .. اي حاجه اغلي من 20 الف .. خساره في البلد ....
-
أخي الفاضل
الميكانيكيه عندنا في المنصورة ماشاء الله عليهم .. حريفه بجد وعتاوله وعن خبره من خلال سيارات الأصدقاء والجيران والأقارب .. والسيات موجوده في المنصورة ولكن مش كتيره زي ال 128 واللادا والشاهين .. بس عندي سؤال ؟؟ انا تخين حبتين .. هينفع معايا النوع ده ؟ ههههه .. لازم برضه اطمئن اني مش هتحشر فيها ..
-
أخي الفاضل رأيي من رأي الاخوة اللي نصحوك بال ١٢٦ أو ١٣٣ بس زاي ما قالوا لازم تدرس الموضوع قبل ما تتوكل على الله و تنفذ
بالمناسبة ال-١٣٣ فعلا واسعة بالنسبة لحجمها بس برضه حاول تجربها قبل ما تشتري إن شاء الله
-
انا رأيى بردخ زى الاخوة الافاضل انك تجيب سيات او 126 خاصة وان مشاويرك قصيرة فهى بالنسبة لامكانياتها هتكون مناسبة ليك موضوع ان حد بيفهم فيها ده ماتقلقش منه لان اى حد بيفهم فيها زى كل الفيات اللى المفروض تسأل عليه قطع غيارها هى طبعا هتبقى اغلبية حاجتها موجودة خاصة و ان اغلبة حاجتها زى الفيات انت حتى لو لقيت حد مغير الماتور هتلاقيه مركب ماتور 127 بس المشكلة ان فيه بعض الحاجات بتاعتها قليلة بس برده ارجع واقولك حتى لو فيه حاجة مش موجودة هتلاقيلها صرفة بس اهم حاجة الحالة دور على حاجة نضية حتى لو اغلى شوية زى ما استاذ كريم قاللك وربنا يوفقك .
-
أشكركم جميعا كل الشكر على النصائح الغاليه .. ان شاء الله هادور من بكره على سيات 133 ويارب ألاقي حاجه كويسه .. ادعوا لي ياشباب
-
بص يا باشا فيه سوق العربيات يوم الاربعاء بالليل فى شارع قناة السويس
و ممكن تسأل عند معارض المستعمل اللى فى شارع الترعه
و ربنا يوفقك الى ما فيه الخير
-
أشكرك على المعلومه الحلوه دي .. ربنا يكرمك
-
اخي في الله ....
ايه ده معرفش اسمك !!
المهم معلش عذرا لتاخري عشان بجيب المنتدى من الشرق للغرب وده بياخد وقت جامد
المهم
كويس انك استقريت على العربية لان حتى فلوسك فيها مش هاتخسر كتير لو حبيت تبيع وربنا مايجبش بيع غير عشان تعلى
طالما وزنك زيادة شوية يبقي السيات افضل من 126 عشان اوسع وحاجتها متوفرة فعلا
عربية حلوة وعملية وحل اقتصادي لكل اللي عايز 4 حيطان وسف يغنوة عن سؤال اللئيم من تاكسيات وميكروباصات
دور عندك في المنصورة الاول وخد معاك حد فاهم ميكانيكا وسمكرة لان عمرتها غالية وبتكلف
وهيا اصلا جسمها معمر
لو مالقتش عندك ان شاء الله تتعب شوية وتاخد بعضك وتنزل عندنا هنا القاهرة يوم جمعة وانزل معاك ان شاء الله ندورلك على واحدة كويسة في السوق ونكشف عليها وتخلص توكيلها وترجع بيها ان شاء الله في نفس اليوم
الا صحيح بتعرف تسوق كويس ولا لما تجيبها ان شاء الله
بالنسبة للتمن بتتراوح بين ال 5 ودي الحالات الضايعة لغاية ال 9 ودي بيكون مغير فيها كل حاجة
يعني نقول متوسط سعر بين 7 و 8 للحالات الكويسة
وربنا يوفقك وانا برضه هادور مع معارفي ولو لقيت حاجة هابلغك ان شاء الله
-
أخي في الله .. كريم ( المفروض يكون اسمك أبو الكرم والكرماء )
أولا :أشكرك جزيل الشكر على كرمك وشهامتك وعرضك للمساعده .. ربنا يكرمك
ثانيا : أنا اسمي أحمد ( لسهولة التواصل ) ههههه
ثالثا : أنا باعرف اسوق والحمد لله بس مش حريف .. يعني على قدي .. وعلى قد المنصورة الأمورة .. بس مش لدرجة اني اسافر بالسيات من القاهرة للمنصورة ...بس دي مش مشكله , أخويا والحمد لله سواق محترف وخبير وان شاء الله ييجي معايا اذا احتجت القدوم للقاهره .
بس هيه السيات الغلبانه دي تستحمل مشوار القاهره ؟؟ ..
ان شاء الله سأحاول الأيام القادمه اني أدور هنا على واحده كويسه ولو ملقتش . مش هيكون قدامي الا النزول للقاهره ان شاء الله ومعلش هتقل عليك شويتين وهاحتاج مساعدتك علشان محدش يضحك عليه ويقولوا ده فلاح من المنصورة بقى .. والحاجات دي ..ههههههههه .
واذا كان السعر زي مانت ذكرت نحاول ان شاء الله نلمه من هنا وهناك وبعدين نسدد للحبايب هنا ..
مره تانيه ربنا يكرمك وألف ألف مليون شكر لكرم أخلاقك وشهامتك
-
على فكره ياأبو الكرم .. أنا كنت ساكن في جسر السويس لما كنت في الكليه 4 سنين ( أنا خريج ألسن) قبل ماتنقل للعباسيه .. بس الكلام ده اواخر الثمانينات
Content Relevant URLs by
vBSEO 3.6.0 PL2