بنزين 95 يستحق ال 35 قرش الزيادة ! بتحفيز من أ/وائل عطية !

**CryptonX** · 15-03-2008 12:31 AM

شكرا يا استاذ وائل مبدئيا !

بعد ماتطلعت علي موضوعه و البنزين ال95 و سيارته .

رجعت لكتالوج سيارتي فيات باليو 1300 فاير - لقيت مكتوب ان البنزين المفضل 96 - 98 او 100 !!!!
اتخضيت ! و افتكرت اني بعد العربية ماكملت 25 الف كم - طرمبة البنزين باظت ( كنت بستخدم بنزين 92 ) .

المهم قلت مش حخسر حاجة و اجرب ..

من كام يوم مليت 20 ليتر 92 و صفرت كومبيوتر العربية .
و مشيت
مشاويري متوسطة مابين سرعة واطية و متوسطة في مكرم عبيد و مصر الجديدة .. و 120 - 130 علي طريق الاوتوستراد ( الي عند النادي الاهلي ) الي اخره عند نادي الشمس .

المهم بعد مانورت لمبة البنزين , لقيت الكومبيوتر كاتب ( 11.5 كم / لتر )
يعني اللتر الواحد ال92 عمل في عربيتي 11.5 كم .
و ال20 لتر الي انا حطيتهم طبها كان تمنهم 28 جنيه .

المهم حطيت بقى 20 لتر 95 من محطة شيل كلفوني 35 جنيه - ( 7 جنيه زيادة عن بنزين 92 )
بنفس المشاوير بالظبط انهاردة نورت اللمبة و قريبت الكوبيوتر بعد ماصفرته
لقيته كاتب 14.2 لتر / كم و ده رقم عمريييي ماوصلتله بسيارتي !
يعني اللتر الواحد ال 95 عمل 14.2 كم - يعنيالفرق 2.7 كيلو زيادة عن ال 92 .

اللتر الواحد ال 92 بيكلف =1.40 بيعمل 11.5 كم
يعني الكم الواحد كلفته .12 قرش تقريبا .

اللتر الواحد ال95 بيكلف 1.75 بيعمل 14.2 كم
يعني الكم الواحد كلفته 12 قرش تقريبا !

يعني في النهاية ( طبعا حتختلف من مرة لمرة ومن سيارة لسيارة ) بس بالنسبة لي لو فضل علي كدة !
مش حغيره ابدا و ححافظ علي الطرمبة الي كان تمنها ( 1150 جنيه مصري) :(

اتكلم بقى على حاجة اهم و هو الاداء و اعتقد كتير مهتمين بالموضوع ده

معلومات بسيطة عن موتور سيارتي
هو بالظبط 1242 سي سي - 16 صباب - انجكشن
بيعمل 83 حصان عند 5000 الفة - و ا120 نيونتن/متر عند 3800 لفة .
و من صفر الي مائة في 12.3 ثانية .

مشكلتي الازلية كانت في السرعات اقل من 3500 لفة بتبقى العربية مش مستجبة اوي ..
والمشكلة التانية لما توصل 120. ... من 120 فما فوق بتيجي ببطأ نسبي عن 60 الي 100 مثلا .

بعد 95 - محسيتش بفرق جامد الي في 3 حاجات :
- الطلعة الاولانية .. لو ان شاء الله علي التاني من الثبات - مفيش تسقيف نهائي و طلعة جامدة جدا ! مش سيارتي الي متعود عليها

- في السرعات ال 90 - 100 زي ماهي بس التسارع من فوق ال 120 بقلى اسهل بكتييييييييييييييير ( وصلت ل 160 و رجعت علشان بتبقى زي البالونة بعد ال 140 :p )

- صوت الموتور هدي جدا جدا جدا بشكل ملحوظ جدا جدا جدا !

الخلاصة ! حاليا لكل من يمتلك السيارات الاتية
- فورد فوكاس ( تجربة الاستاذ الفاضل وائل عطية )
- فيات بونتو - باليو - سيينا - بترا - اونو فاير - برافا - ماريا ( كل محركات الفاير )
- سوبارو امبريزا ( تجربة زميل لنا في المنتدى هنا )

الموضوع مش فارق نهائي ! و السيارة بتقى احسن الف مرة و مش حتفرق في الاخر حاجة و ان فرقت حيبقى الاحسن لسيارتك بدون مبالغة .!

وممكن تجربوا الموضوع بنفسكم .. انا في غنى اني اغير طرمبة بنزين كل 25الف كم ب 1150 جنيه ! علشان 35 قرش زيادة .

ارجوا اني اكون افدتكم .

**sherif_84** · 15-03-2008 01:03 AM

طب ياجماعة ماهو المشكلة لو البنزين غلى فعلا زى ماسمعنا واللتر بتاع الـ 95 بقى بـ 2.50 جنية ساعتها بقى ازاى هنغير للأقل بعد ما الموتور اتعود على 95 أرجع تانى أحط 90 ولا 92
ياريت تقولوا نعمل ايه ساعتها
أنا عن نفسى بحط بنزين 90 للنوبيرا والشاهين وشغال زى الفل هل ده غلط على الموتور ؟
وماتستبعدوش ان البنزين يغلى خلاص الدور جاى عليه والناس هتفضل زى ماهى ( لا أرى لا أسمع لا أتكلم )

**fahd_628** · 15-03-2008 01:46 AM

طب ياجماعة ماهو المشكلة لو البنزين غلى فعلا زى ماسمعنا واللتر بتاع الـ 95 بقى بـ 2.50 جنية ساعتها بقى ازاى هنغير للأقل بعد ما الموتور اتعود على 95 أرجع تانى أحط 90 ولا 92
ياريت تقولوا نعمل ايه ساعتها
أنا عن نفسى بحط بنزين 90 للنوبيرا والشاهين وشغال زى الفل هل ده غلط على الموتور ؟
وماتستبعدوش ان البنزين يغلى خلاص الدور جاى عليه والناس هتفضل زى ماهى ( لا أرى لا أسمع لا أتكلم )

شريف باشا مفيش اى مشكلة انك بعد ما تكون حطيت 95 تحط 90 لأن العربية مجرد الة مش انسان لو عودتة انة يشرب مياة معدنية و بعدين شربتة من الحنفية حيمرض لأ دية مجرد الة يعنى مش بتتعود على حاجة

**SEATLOVER** · 15-03-2008 02:14 AM

يا جماعة انا متابع موضوع ال 95 معاكوا ..مش عارف محسيسنى انكوا اكتشفتوة لأول مرة ...ههههه

انا من مستخدمى البنزين 95 على طول و الموضوع مش عشان هو كويس ولا ال 92 وحش ولا انضف ولا شوائب ولا كيلومترات اعلى ولا اى حاجة من دول خالص

الموضوع كلة لة علاقة (بنسبة الانضغاط فى المحرك ) يعنى باختصار ذى ما ماكتوب عندك فى المانيول تحط اية حطة ذى ما ماكتوب ..عشان عمر المحرك و الحفاظ على حالتة (على المدى البعيد)

ولو حطيت غيرة و كانت الصناعة جيدة و معمول حساب كل حاجة ..مش هايحصل اى حاجة و التأثير هايبقى على المدى الطويل جداً .

ودة تفسير لكل حاجة ممكن تلاقيها اتحسنت فى العربية من استخدامة ...بس كدة

**hazem_khidr** · 15-03-2008 03:20 AM

فكره كويسه يا باشمهندس
عندي في الياريس بحط 92 و الكتلوج مكتوب 91 حجرب كده افول و اخد القرايه و اعمل زيك ما نشوف بس انا فعلا بستخسر ال 35 الفرق في اللتر

**abdelaziz-waleed** · 15-03-2008 06:08 AM

انتو شوقتونا اننا نجرب ال 95 ده ان شاء الله التفويلة الجاية هاتكون 95 على الرغم من ان عربيتي قديمة اوبل 97 ونسبة الانضغاط عندي 10.5 بس برده هاجربه ان شاء الله

**Nile_Storm** · 15-03-2008 08:34 AM

جاري تجربته بالفيرنا 1600 ان شاء الله و ساوافيكم بالنتايج

**tutankhamoun** · 15-03-2008 08:55 AM

أولا ألف شكر يا أستاذ كريم على تحليل تجربتك

بالنسبة للبنزين 95 أنا جربته في البونتو .......... و مكنش الفرق كبير و لا حاجة و العربية موديل 2002

و جربته في الجين 2 بس لما كانت في التليين و أول 30 كيلو متر بعد أول إستلام للعربية من التوكيل و طبعا لم أشعر بأي فرق نهائي لأن السيارة كانت في التليين
و لكني سأجربه مع الجين 2 اﻵن و نرى النتائج
و شكرا مرة أخرى

**elpasha009** · 15-03-2008 11:11 AM

أستاذ CryptonX انت نسيت تحتني معاكم في القائمة:)
أنا كمان جربته في عربيتى لانسر 1600 وجربته لمدة 3 شهور:)
أنا حكيت تجربتي في موضوع الأخ وائل عطية.

-

الموضوع: بنزين 95 يستحق ال 35 قرش الزيادة ! بتحفيز من أ/وائل عطية !

LinkBack

أدوات الموضوع

عرض

-

-

-

المواضيع المتشابهه

بنزين 95 والأداء المتميز (وائل عطية)

20 نكته...!! (وائل عطية)

إشراقــــات !! (وائل عطية)

10 نكت !! (وائل عطية)

الكلمات الدلالية لهذا الموضوع

المفضلات

المفضلات

ضوابط المشاركة