قربة المياه بتاخد مياه الريداتير و تفضيه

كل ما تتحرك العربية فى اى مشوار بارجع الاقى قربة المياه مليانة على الاخر و الريداتير فاضى بنفس الكمية ارجعها تانى للريداتير و امشى بردة نفس الحكاية تحصل

محمد زميلى عنده هوندا قاللى كانت عنده المشكلة دى و طلع ان الكبس بتاع الموتور العادم يعنى بيرجع على الريداتير لان فيه تهوية فى جوان وش السلندر و كدة ممكن تجيب معايا العربية جوان ولازم اروح لميكانيكى يربط على المسامير بتاعة وش السلندر

الشىء الجديد انى فتحت النهاردة غطاء الريداتير و رجعت المياه الخضراء فيه لقيت فيه عكارة فى الميه مش عارف من ايه


مع العلم ان الزيت بتاع الموتور عالى عندى شوية حوالى نصف سنتى عن العلامة و كان عالى قبل كدة بس الميكانيكى شالى شوية منه بعد ما مشيت بيه 1500 كيلو


هل العكارة دى ممكن تكون من الزيت علما بان الموتور معرق زيت من برة

و ايه السر فعلا فى امتلاء القربة بالمياه

متابع

اقتباس:

---

المشاركة الأصلية كتبت بواسطة love7amada

متابع

---

متابع و بس
وخلاص كدة
ما تنفعش يا عم الحاج
احنا عاوزين رد يستاهل

النهاردة بالليل نزلت مشوار صغير من المريوطية لمشعل و العكس بس العربية لقيتها بتسخن جامد و المروحة مش شغالة لحد المؤشر ما راح لليمين عند العلامة قبل الاخيرة فتحت غطاء الريداتير بعد ما بطلت العربية و شغلتها و بدأت احط فيه مياه لقيت المياه بتطلع رغاوى بيضاء اللون و فضيت فيه زجاجتين بلاستيك مياه و سيبتها دايرة شوية و بعدين المروحة اشتغلت ثوانى و بطلت تانى مشيت بالعربية للبيت و جيبت خرطوم المياه و فتحت الحنفية و ضربتها فى الريداتير و قربة المياه و مليتهم على الاخر و سيبتها شوية و بعدين بطلت العربية و سيبتها حبة لقيت المروحة اشتغلت لما سخنت و بطلت بعد ما العلامة بتاعت السخونية جت فى النص سيبت القربة مفتوحة و مليانة على الاخر و بطلت العربية و طلعت البيت و بكرة انشاء الله هشوف النتيجة و ربنا يستر ما يكونش جوان وش سلندر بس الغريبة سامع للموتور صوت غريب كدة عامل زى الصريخ او كأن فيه وحش جواه بيصوت و ربنا يستر

هل الموضوع دة ليه علاقة بمشكلتى او زيها
http://www.nilemotors.net/Nile/178522-2.html

و ممكن فعلا يكون جوان وش سلندر و انا 2009 موديل

يا ساتر يارب ؟ ان شاء الله خير

لأ متستناش يا استاذ ايمن .. و عليك و ع الميكانيكى عدل او متخصص رادياتيرات تروحله و تشوف القصه .. دى سخونه و موتور مش اى كلام

و ياريت تطمنا .. بس للأسف معنديش حكم صريح ع الحاله دى

اقتباس:

---

المشاركة الأصلية كتبت بواسطة aymanay32

النهاردة بالليل نزلت مشوار صغير من المريوطية لمشعل و العكس بس العربية لقيتها بتسخن جامد و المروحة مش شغالة لحد المؤشر ما راح لليمين عند العلامة قبل الاخيرة فتحت غطاء الريداتير بعد ما بطلت العربية و شغلتها و بدأت احط فيه مياه لقيت المياه بتطلع رغاوى بيضاء اللون و فضيت فيه زجاجتين بلاستيك مياه و سيبتها دايرة شوية و بعدين المروحة اشتغلت ثوانى و بطلت تانى مشيت بالعربية للبيت و جيبت خرطوم المياه و فتحت الحنفية و ضربتها فى الريداتير و قربة المياه و مليتهم على الاخر و سيبتها شوية و بعدين بطلت العربية و سيبتها حبة لقيت المروحة اشتغلت لما سخنت و بطلت بعد ما العلامة بتاعت السخونية جت فى النص سيبت القربة مفتوحة و مليانة على الاخر و بطلت العربية و طلعت البيت و بكرة ان شاء الله هشوف النتيجة و ربنا يستر ما يكونش جوان وش سلندر بس الغريبة سامع للموتور صوت غريب كدة عامل زى الصريخ او كأن فيه وحش جواه بيصوت و ربنا يستر

---

بص يا باشا، انا قعدت فترة بعربيتي القديمة كانت بتعمل حاجات غريبة، والحمد لله جابت في الآخر وش سلندر
السبب عندي بقى ان الرادياتير كان في حتة مكسورة صغيرة خالص كانت بتخلي المية تتسرب ببطء خالص بدون ما انا اشعر. وتقريبا كنت كل يوم بروح ازود مياة الرادياتير وكنت كل يوم الصبح الاقي القربة فاضية اروح املاها والدنيا تبقى تمام.
* أولا: انت بص على الزيت، لو بقى عامل زي الطيحنة يبقى انت كدة عندك جوان فيه مشكلة وسرب مياة، بس انا ماحصلش معايا كدة انا لقيت العربية تقلت مرة واحدة وعقبال ما رحت عند الميكانيكي قالي دا جوان هوا.
* ثانيا ودا الأهم: املى القربة لحد max بس ماتزودش عن كدة، واتأكد ان الرادياتير نفسه فيه مية وتمام يعني مافيهوش هوا. واتحرك بالعربية وبعد كدة اركن العربية وسيبها فترة وبص تحتيها شوف اي تسريب للمياة في اي حتة عشان تتأكد ان الرادياتير سليم واللا فيه مشكلة.
واوعى اوعى اوعى تمشي بالعربية وهي سخنة.
وربنا يسترها معاك.

لو المياه لون الطحين يبقى غالبا جوان وش السلندر عاوز يتغير عشان بيسرب زيت من الموتور على مياه التبريد و لو الموتور معرق زيت يبقى غالبا جوان غطاء التاكيهات عاوز يتغير و مشكلة المياه اللي بتنقص لازم تروح عند حد يعرف يشوف منين تسريب المياه ممكن يكون فيه خرطوم مقطوع أو ممكن تكون المروحة مش بتشتغل كويس فالمياة بتسخن و تتبخر و تكون ضغط داخل القربة و تتسرب من خلال غطاء القربة من خلال الsafety valve أو زي ما بيقولوا علية السيكس بلف.
بس لازم تلحق بدل ما تعملك مشاكل أكبر

مياه الريداتير اللى بتنقص كلها بتروح للقربة يعنى المياه بتسيب الريداتير و تروح للقربة و انا بفتح غطاء الريداتير و غطاء القربة و انفخ فى القربة تروح المياه راجعة الريداتير

زميلى محمد قاللى على موضوع الطحينة بتاعت الزيت بس الحمد لله الزيت نظيف زى يوم ما حطيته

و كمان قاللى المشكلة دى ممكن تكون من مسامير وش السلندر تكون فكت منه بعد الحادثة و مع المطبات و لازم تتربط عشان كدة هيه بتنفس شوية من ضغط العادم بيخرج للمياه بتاعة الرداتير لان ضغط العادم اقوى من ضغط المياه و لذلك يذهب جزء منه الى الريداتير و يطرد المياه من الريداتير الى القربة و فعلا دة بيحصل و كمان لما بحط اصبعى فى القربة بلاقى المياه باردة مش سخنة

هشوف يا جماعة حكاية المسامير دى ايه و هرد عليكم
على العموم انا اشتريت جوان وش سلندر عشان الميكانيكى لو قال عاوز جوان اديهوله على طول بدل ما قوله طيب اركن العربية عندك لحد ثلاث ساعات لحد ما انزل اجيبة و اجىلك تركبه
بصراحة انا زهقت من الريداتير و اللى مزهقنى انى خايف تجيب وش سلندر و انا معرفش سعره كام و خايف حتى اسال على سعرة دة الواحد لسة خارج من رمضان و العيد و داخل على المدارس و مصاريف المدارس سة معلمه علية من لبس مدرسى و بدور كمان على الكتب الخارجية للعيال مش لاقيها و ربنا يستر على السنة دى على كل التلاميذ



و نسيت اشكركم كلكم على ردكم و اهتمامكم بمشكلتى و مش عارف المشاكل دى بتقع عليه ازاى ده انا لسة خالصان من مشكلة البوبينة اقوم اقع فى مشكلة جوان وش السلندر
الحمد لله على كل حال


.