النهارده عندنا فرح ...ومش اى فرح ده فرح اخويا وحبيبى واللى مرشح نفسه فى مجلس الشعب عن دائرة المزريطه اخونا محمد حمدى ...يعنى لما نقول اسمه الارض تتزلزل ...يعنى الادب كله والاحترم كله ...يعنى الرجولة والشهامة يعنى دمياط يعنى المشبك ...يعنى اللى مش بيشوف يروح لمحمد حمدى يعمله نضارة نظر ببلاش ..
يعنى نمر كيا اللى مشرفنا فى اخر سباق فى فورميلا المزريطة ...اخيراة بعد ما حوش وعمل جمعيات مع طوب الارض قدر يجيب حق الشبكة ( ابقى هات الفلوس اللى عليك ) بنقوله من قلبنا الف مليون مبروك وعقبال ما تدخل بيت العدل ونقف كلنا دقيقه حداد يوم دخلتك .

يعنى النقطة دى جاية من اخونا احمد سامى من المنصورة يمسى على اخوه بطقم اسنان معتبر .....يعنى المهندس احمد اسماعيل اللى بيصلح كل حاجه من الحنفية لحد باب العربية .....يعنى عمنا احمد سعد يعنى الاتصالات والتليفونات بينقط اخوه محمد بعده تليفون من بلاد بره .....
حضر ...حضر المهندس م غازى يعنى السيراتو وعمايلها يعنى اللى ميعرفش مسامير يروح لمحمد يديله من اللى مركبه فى رجله .
يعنى الزواوى يعنى الريحه الحلوة وجايب معاه هديته لاخوه ازازة ريحه 55555
وسع ..وسع ياعم الحاج للبشمهندس الكبير نورمال اللى لسه مخلص مشروعه وبنا ميناء جوى وبحرى تحت بيته بيهنى اخوه بطقم بوجيهات ....
يعنى عتريس والقمر الصناعى وال gps اللى لسه مركبه وبيترسم بيه على خلق ربنا

ولوقلنا الزووق كله والادب يعنى المهندس حاتم السباعى اللى جى مخصوص عندنا ويبارك ويهنى..... يعنى الدكتور اسامة ربنا يفك حبسه يارب ...ولو قلنا الشقاوة يعنى ياسر الصياد يعنى الحلويات كلها والكوبيه اللى جيه فى الطريق ....
والمسا ده جى حاير طاير من عمرو باشا عبد السلام يعنى التكيف كله والسقعه فى عز الحر
اهو ....اهو .... اسلام صفاء اللى لسه جى من القطامية طازة بالاخبار الظازة بيقول لاخوه محمد صيانتك المرة اللى جاية على حسابى ....
حبايبك كتير يا محمد وعاوزين يجاملو واللى عاوز ينقط اخونا وحببنا يبعتله على رقم حساب4040على بنك المزريطه المركزى

مبروك ياعم محمد على الخطوبة وعقبال ما نفرح بيك كده وانت بتشترى البمبرز ابو استك للعيال ....

طبعا المشرف بيباركلك يا محمد برضه وهديته ليك هيسب الموضوع لمدة يوم واحد هنا وبعد كده ينقله زى ما يحب لان حبيابك كلها هنا ونفسها تبركلك .