ازيكم يا جماعه
انا عضو قديم معاكم في المنتدي بس دخلت باسم تاني لان مشكلتي دي مشكلة شخصية ومش عايزها تبقي معروفة للناس اصحابي اللي هنا لانها خااصة جدا جدا
انا حبيت اكتبها لكم لاني بثق في ارائكم ويا ريت المسئولين عن المنتدي يلاقوا حل للي عايز يكتب موضوع بدون ما يظهر اسمه عشان الواحد يعرف يفضفض معاكم خصوصا انكم ناس محترمة جدا وانا بثق في ارائكم جدا
مشكلتي بقي اولا مش عايز اي بنت ترد في التوبك خالص لو سمحتم


انا متجوز وعندي بنت وولد والحمد لله
اتعرفت من فترة علي بنت تعارف عادي جدا وانا اعتبرتها بنت عابرة وخلاص ولم اعطي للموضوع اي اهمية
بعد يومين لقيتها بتتصل بي وانا كنت في الشغل ولاول مرة حد يتصل بي عشان يسأل انا كويس ولا لأ - ام العيال بتتصل لما تبقي عايزة تفكرني بحاجة اشتريها وانا راجع - ولاول مرة احس الاحساس ده
فبدأت افكر في البنت دي
وبعدين كنت مسافر القاهرة ولقيتها هي كمان بتقولي انا مسافرة فقلتلها خلاص نروح سوا علي اساس ان المشوار واحد يبقي ليه كل واحد فينا يسافر لوحده ( ودي غلطة مني انا عارف )
البنت ركبت معايا عربيتي والكلام جاب بعضة وفوجئت بها جريئة جدا لدرجة ادهشتني ومش عايز ااقول تفاصيل اكتر بدل ما الموضوع يتحذف
المهم
طبعا عرفت اني متجوز وعندي اولاد وفوجئت لتاني مرة ان الموضوع ده مش فارق معاها
وبما اني مينفعش اخبي عنكم حاجة انا حسيت انها طماعه جدا
وان كل اللي شدها لي هو مستواي الاجتماعي من اول الشركة اللي بشتغل فيها لحد عربيتي وماركتها ومظهري العام
قلت ماشي ما كل شئ له تمن
بس لما بروح البيت وببص بالذات لابني بحسس ان انسان حيوان ولا استحق النعمة اللي انا فيها
وان في مليون واحد نفسهم يبقوا زي وانا مش مقدر النعمة اللي ربنا ادهاني
يعني انا ببكت في نفسي اهو ومش طالبة اي حد يبكتني
انا مش طفس والله ولا دي دناوة رجالة بس حقيقي البنت بتسمعني كلام مراتي عمرها ما قالته لي حتي من 10 سنين ايام الخطوبة
يا جماعه انا محدش اكلني في فمي غير امي
وحاجات تانية كتيرة بتعملها معايا بس مش عايز اذكرها عشان انتم متقولوش ده مراهقة متأخرة اهو ده كبر واتهبل
بس محدش يتريق عليا

انا دلوقتي مش عارف اعمل ايه واتصرف ازاي؟؟؟؟؟
يا ريت تدلوني