اولا ايها الأخوه الكرام انا اوائل ملاك الأسبرانزا 516 سنة 2006 وركبت عربيات كتير قبلها واشتريت وبعت انواع كتير قبلها

وكان قرارى بشراها كان قرار جرئ جدا وقتها لأنها لم تكن معروفة خالص

ولكنى بنظرة على حد خبرتنى ظنتها تكون كويسة بالنسبة لسعرها

وعملت بيها 85000 كيلو حتى 2008 لظروف سفرى الكتير وشغلى وعشت معاها كل الظروف

وغيرتها وجبت تانى 2008 ولسه بايعها من ايام وعملت بيها 90 الف كيلو ايضا

وانا بغير مش لعيب فى العربية ولكن بحب اركب زيرو دائما

وان شاء الله يومين وهجيب 2011 بس انا عاوز لون نبيتى ومش موجود فى المصنع دلوقتى ومستنية حسب وعدهم لى


المهم تقييمى للأسبرانزا 516 من واقع خبرتى وعشرتى معاها


المحرك

متوسط الأداء فى التجميع

جيد فى سرعات 90 كيلو

رائع جدا بعد 110 كيلو

وكنت بمشى بيها حتى 190 كيلو على الساحل الشمالى ولفترات طويلة

العفشة

نشفة شوية بالنسبة للنسر والتيوتا والهيوندايات بشكل عام والدايو

اما مقارنة بالادا والشاهين لا احسن كتير

و قوة تحملها ممتازة حتى انى مغيرتش فيها حاجة اكثر من التربيط كل فترة فى السيارتان السابقتين وكنت بشيل فى الشنطة احمال ثقيلة وبمشى بسرعات عالية كما سبق

ولى قريب غيرها بعفشة اللنسر وبقت تحفة بس انا مغيرتش حاجة الا احد المسامير فى الجزء الخلفى حلق من كتر التربيط وغيرتة فى التوكيل بآخر لنسر

الجنوط

قوة تملها جيدة جدا

اتكسر منى اكثر من جنط بس بسبب المطبات الحادة والكبيرة فى الطرق وعلى سرعات عالية بس محصلش مشاكل اكتر من انى غيرت الأستبن وكملت سفرى بأمان

الصالون

واسع بالنسبة للدايو والشاهين والهيوندايات عموما ومشابه لسعة اللنسر والتويوتا تقريبا

والجلوس فى الأمام رائع واسع اما الكنبة الخلفية غير مريحة والجالس فى الخلف يشعر بدوار مع السرعات العالية

وتقريبا بسبب ارتفاع السيارة عن الأرض

ويعيب الكنبة الخلفية ارتفاع اطراب الكبة مما يتعب الجالس فى اطراف الكنبة اذا جلس فيها ثلاثة اجسام متوسطة
لمدة طويلة

الفرش الداخلى فى الصالون رائع ومكونات الصالون محترمة من ناحية الخامات

والتابلوه جيد جدا ولكن العدادات تستخدم اللون الأحمر والآزرق مع الأبيض وان بعتبرهم الوان ليست متجانسة وليست ذات قيمة وكأنها لعبة اطفال

والتحكم فى مستوى ضوء التالبون من الداخل جميل جدا وكذالك التحكم فى الفوانيس الأمامية من الداخل رائع وعملى جدا للسفر ليلا ومفيد جدا

بشكل عام الصالون يعد محترم برغم السلبيات البسيطة والتى لاتخلو سيارة من بعض السلبيات طبعا

التكييف

التكييف فى موديل 2006 كان به بعض العيوب وتم تعديلها فى 2008 ولكن مازال التكييف متوسط الأداء وخصوصا فى الأجواء شديدة الحرارة يكون ادائة ضعيف جدا

اما فى الأجواء متوسطة الحرارة يكون رائع ولا يقل كثيرا عن تكييف اللنسر والهيوندايات والدايو ولكنه اقل من التويوتا طبعا

الصاج الخارجى للسيارة

من خلال تجربتى تلك الفترة وسفرى الكتير طبعا حدثت لى بعض الحوادث والحمد لله بسيطة بسبب السرعات العالية ولكن كان واضح جدا متانة الصاج فهو افضل بكثير من الدايو والشاهين والهيونايات واللنسر والتيوتا ايضا

ورديت الرفارف الأمامية على البارد اكثر من مره وفكيت الالرفارف الأمامية وفعلا مستوى الصاج رائع

الشكل الخارجى

من الأمام جميل ولكن من الخلف اقل من المتوسط حسب زوقى كنت اتمنى ان يتم تعديل شكلها خصوصا من الخلف

الثبات على الطريق

الثبات على الطريق ممتاز جدا حتى على السرعات العالية لما تكون السيارة اركبها وحدى امشى حتى 120 بسبات جميل جدا وعندما اكون راكب بها 5 ركاب والشنطة ممتلئة اصل الى سرعة 160 بثبات عالى جدا

الفرامل

الفرامل تعد رائعة حتى سرعات 90 كيلو ومتوسطة حتى 120 كيلو وطبعا ضعيفة بعد ذلك والسبب راجع للسرعة العالية

وال abs جميل جدا وفعلا كان سبب فى تفادى كثير من الحوادث كنت قد اقع فيها لولا وجوده ولكن طبعا كلما ازاددت السرعة كلما ضعفت الفرامل مهما كان

مكونات السيارة

المكونات من محرك وعفشة وصاج وكماليات وما الى ذلك لا تقل جوده عن التيوتا ولا اللنسر من ناحية الخامات بل ممكن تكون افضل فى بعض الأشياء مثل التابلوة مثلا من ناحية الخامة اما التصميم فغير منايب من رأى شخصيا

ولكن هناك صعوبة بعض الشئ فى التعامل مع ازرار النور بسبب ثقلها فهى تحتاج لضغط قوى مقارنة بالتويوتا واللنسر فهى ناعمة جدا ولكنها جيدة ولم يتعضل بها مفتاح ابدا


طارة الدريكسيون

سيئة جدا وضغطة الكلكس بها سيئة جدا

وناوى عندما استلم 2011 هغير التارة فورا بأى تارة تانية

اما الباور فهو رائع ومش ثقيل ولا خفيف اوى حتى يصل الى عمل مشكلات مع السرعات العالية مثل الشيفرولية

القيادة الشبابية

لا تصلح للقيادة الشبابية وشغل الحفلات وغيرة لأن تجميع السرعة فيها بطئ

ولكن للقيادة العائلية تحفة

اتمنى ان اكون نقلت لكم الصورة بوضوح

وارجوا ان من جربها يتحدث عنها اما من لم يجربها يجربها اولا ولا يتناقل الأخبار عنها لمجرد انها صينى

فالصين اثبتت لنا انها بها صناعات تجاوزت الأوربية والأمريكية فى الجودة بس المسألة مسألة مستورين

واظن ان حسام ابو الفتوح يحترم لأختيارة الأسبرانزا

واتمنى ان يعالجو بعض العيوب والتى اراها بسيطة فى الأيام القادمة