صوت تزييق هيجنني ! مش عارف جاي منين ولا التوكيل !!

السلام عليكم ورحمة الله


انا عندي صوت تزييق جامد اوى بيظهر لما اكون لسه طالع بالعربية الصبح او لما اركنها تلات اربع ساعات وارجع اطلع بيها بسمع صوت تزييق جامد اوى خاصة لما الدركسيون يروح ناحية الشمال يزيد اوى وساعات لما اكسر الدركسيون شمال جامد مع قرص بالبنزين اسمع صوت احتكاك شديد زي مايكون حديد بيحك في بعض " بس مش كبالن "

المهم الصوت بيختفى تماماً بعد حوالى 5 او 10 دقائق من السير

العربية طبعاً راحت "" غبــــور " مرتين ومغيروش غير سير باور ومفيش فايدة
ورجعن تاني شافها بتاع العفشة " غبور " برضه وبعدين قال العربية مفيهاش اي حاجة :

المهندس يئولو اومال الصوت جاى منين ! يقول : معرفش العربية مفيهاش اي حاجة
وفى الاخر قالى اغسل الشاسية غسلة كويسة جداً اكيد في طين مش عارف شابك في ايه وبيعمل ايه

طبعاً عملت اللى قال علية اولت لما اشوف

وطبعاً مفيش فايده


انا بئا نفسي حد يقولى الصوت ده ممكن يكون ايه او مكان موثوق فيه جداً بيفهم في الهيونداى " فيرنا اوتوماتيك "

انا بحس انه جاى من عند العجل من تحت وساعات بحس انه طالع من عند الدركسيون من نص العربية

اتأكد من الكرتيرة انها تكون مربوطة كويس و مش بتحك فى العجل

؟؟؟؟؟؟؟؟؟؟؟؟

ايه الكلام الفارغ إللي بيقولوه في التوكيل ده..إزاي العربية تبقى مافيهاش حاجة مع الأصوات دي كلها؟؟ انا مش هاقدر افيدك في معرفة مصدر الصوت ..بس عالعموم انت محتاج تبص تحت العربية كويس..الأول ارفع العربية بكوريك كبير من قدام بحيث يكون العجلتين الأماميتين مرفوعين تماما من على الأرض..وبص كويس من تحت وخلى حد يلف الدريكسون...وبعدين (والعربية مرفوعة) دور العربية وهات D ولف الدريكسيون شمال ويمين وشوف الصوت هايطلع ولا لأ وحاول تعرف مصدر الصوت بس خلي باللك ماتنزلش تحت العربية وهي على D. الأفضل تخلي ميكانيكي يعمل ده تحت اشرافك..ولما تعرف المصدر روح للتوكيل وفهمهم.

هايبقى شيئ مش ظريف لو الصوت مابيطلغش إلا والعجل على الأرض..ساعتها هاتضطر تكشف على ميكانيكا الجر (الجزء الأمامي) كلها (من أول الطنابير، بلي،.....إلخ)

والله أعلم

صحيح..الأول جربت تروح لكارتك..يمكن دول بيفهموا أحسن من غبور؟؟!!!

يا ريت تبلغنا بالتطورات يا باشا

فى نظرى احسن حل تعمله تطلع بعد بكرة على سوق العاشر تخلص من العربية وتبطل تركب هيونداى تماما وده ابلغ ضرر ممكن تسببه لغبور على عربياته الزباله
وتشترى عربية عدلة وربنا يكرمك ان شاء الله

نفس المشكلة موجوده عندي في الاوبل استرا 2005 و ظهرت بعد ماكنت عند العفشجي بغير بيض المقصات الامامية و تيل الفرامل و رجلشة التيل الخلفي

ولا يهمك يا باشا
بس أنا عايز إؤولك حاجة الموضوع مش موضوع غبور
الموضوع موضوع البلد إلي احنا فيها

حتى توكيل هوندا إلي بيقولو عالة موحترم
عومري مؤولتلو على حاجة و عملهلي
يعني
أنا بسمع صوت تكتكة كدة في الشنطة كأن
في حاجة في الشنطة
طبعا الكلام دا لم ببئة ماشي فوق ظلت
أو التوكيل ألي إنو خلاص ظابت كل حاجة
لكن طبعا الصوت مارحش
وحاجات تانية بسيطة بس عومرهوم مبيعملو حاجة :d

نفكر مع بعض بصوت عالى

انت لما بتلف عجلة الديريكسيون أيه اللى بيتحرك معاك:

1- عمود صليبة الديريكسيون( ده ميزيقش)
2- جريدة علبة الديريكسيون وبساتمها( برضه ميزيقوش)
3- بارات الديريسكيون (ممكن تزيق من البيضة)
4- بيضة المقص (ممكن تزيق)
5- السوستة مع بطاحات المساعد (اكيد تزيق)
6- ممكن كاوتش علبة الديريكسيون يكون مش مربطو كويس وبالتالى العلبة على بعضها بتروح وتيجى

يبقى انت ابدأ بوضع بعض الشحم على طرفى كل من السوستتين الأماميتين العلوى والسفلى والتأكد من احكام ربط علبه الديريكسيون فى مكانها وسلامة الكاوتش بتاعها

لو مراحش الصوت اكشف على بيضتين المقص وبيضين الديريسكسون

ايه الاخبار يا باشا

العربيه لو فيها تصفيح من تحت الموتور ممكن يكون اخد خبطة و بيحك مع التيش او علبة الدريكسيون ..الموضوع ده حصل معايا ايام ال 206 و ظبطوه في التوكيل "مجانا"

اقتباس:

---

المشاركة الأصلية كتبت بواسطة sab3aawy

نفكر مع بعض بصوت عالى

انت لما بتلف عجلة الديريكسيون أيه اللى بيتحرك معاك:

1- عمود صليبة الديريكسيون( ده ميزيقش)
2- جريدة علبة الديريكسيون وبساتمها( برضه ميزيقوش)
3- بارات الديريسكيون (ممكن تزيق من البيضة)
4- بيضة المقص (ممكن تزيق)
5- السوستة مع بطاحات المساعد (اكيد تزيق)
6- ممكن كاوتش علبة الديريكسيون يكون مش مربطو كويس وبالتالى العلبة على بعضها بتروح وتيجى

يبقى انت ابدأ بوضع بعض الشحم على طرفى كل من السوستتين الأماميتين العلوى والسفلى والتأكد من احكام ربط علبه الديريكسيون فى مكانها وسلامة الكاوتش بتاعها

لو مراحش الصوت اكشف على بيضتين المقص وبيضين الديريسكسون

---

+
100000000000

طيب يا رجالة العربية عملت حاجات لطيفة اوى

انا المفروض كنت اروح التوكيل يوم الخميس اللى فات
جت العربية االله يبارك فيها يوم الاربعاء صوت التزييق راااااااااااح تماماً

الله وبعدين
اقلب العربية يمين شمال واهدى واجرى مفيش فايدة
اطلع على البارد مفيش الصوت راااح
اطلع عالسخن برضه مفيش راااح خالص
طيب اولت خير وبركة هروه التوكيل مش هيلائي اصوات يبقى ملهاش لازمة " ال يعنى لما كان الصوت موجود عرفوا فيها ايه !! "


طيب عدى الخميس مفيش صوت
جميـــل


" الخميس بالليل "


صوت خشزنة كده خفيفة مش عارف جاى منيني " الله وبعدين
المهم ركنت ورحت واخد والدتى ومسافرين وتوكلت على الله
في 1/2 الزراعى صوت خشخشة من الناحية اليمين !!

الصوت بيزيد

الخشخشة تحولت لصوت حاجة اكنها بتحك في الارض اولت لا يكون الشكمان واقع
" نزلت ابص الشكمان سليم العجل سليم المساعد سليم " الله !!!

المهم عبال ما وصلت الصوت كان تحول للأتى "

" طقطقة وحديدي بيحك في بعض وخبط واكن في حاجات بتطحن وبتتكسر "
ورجعت بيها عال الحال ده "

طلعت على عم غبور :




المهندس اول ماحط رجله :


" ده بلى العجل " بس كده يابشمهندس
المهندس : اه
طيب اعمله
تتكلف كام : 700 جنيه !!!!!!!!!

طيب

بعد اربع ساعات

المهندس : العربية فيها كوبلن لاااازم يتغير وانت ازاى مشيت بيها والحمد لله ان العربية رجعت بيها سليمة "

ياباشمهندس بعد 4 ساعات اكتشفتو انها كوبلن !!

اه اصل واصل واصل
طيب ماشى
كام يا سيدى :
2200 جنيه الكوبلن

ايه !!!!

اصلو الاصلى وبالأكس بتاعه واصل وفصل

ووالدتى اللى راحت التوكيل وربنا يستر "



يعني لما كوبلن الهيونداى يعمل 2200 في التوكيل " حاسيت انى راكب حاجة المانى او اوروبى محترم "



بس غبور مفيش فيه فايده انا طبعاً اعدت حفظت والدتى تجرب العربية ازاى وتعمل ايه ابل ماتطلع من التوكيا الجبار ده !

ربنا يطمنك هي العربيه عامله كام كيلو ؟؟؟

انا عندي صوت طقطقه في العجله الورانيه الشمال كأن فيه زلطه في الكاوتش بس مفيش اي زلطه موجوده .. ياتري الصوت ده جي منين هينقطني حد يعرف من دكاتره العربيات ؟؟؟ فيرنا 2008 مانيوال

والله انا ممكن اقولك على حاجه كده برضه ويمكن يكون سبب
انك تتاكد من ضغط هواء الكاوتش ربما يكون زايد عن اللزوم
لان الكلام ده حصل معايا واصوات تزييق وتهبيد فى العربية ورحت للميكانيكى وعملى حاجات كتير ومافيش فايدة لحد ماالصدفة جت لوحدها وانا رايح اظبط ضغط هواء الكاوتش واكتشفت ان ضغطها
كان عاللى جدا جدا ولما ظبطها بتاع الكاوتش لقيت العربية اتظبطط ورجعت والحمد لله بدون تزييق ولا تهبيد

اقتباس:

---

المشاركة الأصلية كتبت بواسطة hashem1999

والله انا ممكن اقولك على حاجه كده برضه ويمكن يكون سبب
انك تتاكد من ضغط هواء الكاوتش ربما يكون زايد عن اللزوم
لان الكلام ده حصل معايا واصوات تزييق وتهبيد فى العربية ورحت للميكانيكى وعملى حاجات كتير ومافيش فايدة لحد ماالصدفة جت لوحدها وانا رايح اظبط ضغط هواء الكاوتش واكتشفت ان ضغطها
كان عاللى جدا جدا ولما ظبطها بتاع الكاوتش لقيت العربية اتظبطط ورجعت والحمد لله بدون تزييق ولا تهبيد

---

لا الضغط انا بزبطه علطول بس الصوت لسه موجود ( تك .. تك .. تك ... تك ... ) مع دوران العجله وكل ما السرعه تزيك التكتكه تسرع اكتر ...

وكمان بحس لما أقفل الزجاج ان فيه صوت هوا كأن فيه سرسوب هوا داخل من الشباك اليمين اللي قدام مع اني مقفل الدنيا جامد مش عارف أعمل ايه في الحكايه دي ؟


حد عنده اقتراحات ؟؟

اقتباس:

---

وكمان بحس لما أقفل الزجاج ان فيه صوت هوا كأن فيه سرسوب هوا داخل من الشباك اليمين اللي قدام مع اني مقفل الدنيا جامد مش عارف أعمل ايه في الحكايه دي ؟

---

الهوا دة جاى من عند زارير االزجاج مش متقفل كويس - انسى ...

لا ساعات صوت الطقطقة ده بيكون من " الطاسة " بتاعت العجل

بتكون كالعادة فكة من ناحية او مش مربوطة كويس
فجرب وشوف

اقتباس:

---

المشاركة الأصلية كتبت بواسطة t5554983

الهوا دة جاى من عند زارير االزجاج مش متقفل كويس - انسى ...

---

اخص عليهم .. ده تقفيل ده ! حاجه تقرف ... طيب لو قلتلهم كده في التوكيل هيعملوا ايه ؟ ولا هيفتكروني بدلع او جاي اهرج ؟

اقتباس:

---

المشاركة الأصلية كتبت بواسطة HeMa1981

لا ساعات صوت الطقطقة ده بيكون من " الطاسة " بتاعت العجل

بتكون كالعادة فكة من ناحية او مش مربوطة كويس
فجرب وشوف

---

عموما مشكور هجرب واشوف رغم ان الصوت ده مش عندي بس في اخ تاني برده في المنتدي اشتكي منه في نفس العجله برده ..

اقتباس:

---

المشاركة الأصلية كتبت بواسطة zakiali

عموما مشكور هجرب واشوف رغم ان الصوت ده مش عندي بس في اخ تاني برده في المنتدي اشتكي منه في نفس العجله برده ..

---

:D:D:D

ماهو عندى انا كمان بيروح وبييجى بس عندى ده من الطاسة

الصوت ده من تيل فرامل العجلتين الخلفيتين وخاصة اذا كان لسه جديد .. اصبر عليه شويه وهيروح لوحده

اقتباس:

---

المشاركة الأصلية كتبت بواسطة Ahmad_Nawwara

الصوت ده من تيل فرامل العجلتين الخلفيتين وخاصة اذا كان لسه جديد .. اصبر عليه شويه وهيروح لوحده

---

مشكور يا غالي ....

اقولك نصيحه متجربة و غريبة جدا

اغسل عفشة العربية و بالذات السست اللي ورا في البنزينة بالمياة و الجاز و التزييق دة حايروح

لأنة بيبقى من وساخات و تراب او صدا على السست و بيسبب التزييقة دي و بيروح مع المشي شوية مش بيبان زي اول المشوار

دة متجرب و سبق و نصحت بية زميل هنا في المنتدى و عملها و هوة مش مقتنع قوي بالكلام دة بس التزييق راح و الراجل كان مش مصدق نفسة و رجع فرحان و شاكر و مرتاح ان الصوت راح

جرب و حاتشوف

Garab te3'sel el 3arabia 3'asla kwayesa men ta7t w ba3d ma tenshaf, hat 3elbet spray DW-40 w rosh 3ala kol el gelab w el kawetshat ely fe el 3afsha, ana kan 3andy el moshkela de fe lancer 2002

اغسل العربيه الاول وبعد كده شوف ايه الظروف

خلاص يا جماعة الصوت راح الحمد لله من غير اي حاجه :d . من الواضح انه كان من تيل الفرامل الجديده . مشكورين علي تعبكم يا شباب