مشهد من مصلى مسجد القائد ابراهيم بالاسكندرية يوم 27 رمضان 2010 مع الشيخ حاتم فريد الواعر
مشهد من مصلى مسجد القائد ابراهيم بالاسكندرية يوم 27 رمضان 2010 مع الشيخ حاتم فريد الواعر
الله أكبر
ربنا يزيد ربنا يبارك
هي دي مصر
دا كل سنة يقولك صلاة القيام فى رمضان
حتى لو صلاة القيام
متقفلشش الشارع وسيب الناس تعيش
دا راىى
انا كنت هناك مشهد واحساس مختلف وتحس فعلا انك فى مكة .. والشوارع مش بتتقفل زى ما البعض بيصور بالعكس الكل بيتعاون من الشرطة والناس والجيران والمنظمين الله يجزيهم كل خير على تعبهم ...
المشهد بيكون اشبه بالحلم ..... حتى الحلم هاتبخلوا علينا بيه ؟؟؟؟ !!!!!... حسبنا الله ونعم الوكيل
يا سيدى تقبل الختلاف بدون ما تدعى عليا
اعتبر ان انا على دين او معتقدات اخرى غير الاسلام
وممارسة مثل هذه الشعائر فى الشوارع تثير مشاعرى ,ايه هيكون ردك
اعتبر انك تمر من امام اى دار عباده ورايت المثل والشوارع مغلقة ولا تستطيع الذهاب الى وجهتك اي ما تكن
ماذا ستفعل
فيديو راااااااائع
بجد رمضان بالليل بيبقى ليه سحر تانى
لما بيخلص بتحس ان فيه حاجة بقت ناقصة
اما بخصوص الفيديو ... التصوير مستواه عالى جدآ و معمول بإحترافية
شكرآ يا ياسر
لو فرح سادد الشارع إلي أي حد ساكن فيه
مابيزعلش...علشان الناس فرحانة
لو عندك ميتم معمول في الشارع إلي إنت ساكن فيه
مابتزعلش .. علشان واجب العزاء
لو واحد بيهد بيته ..ويبنيه
بيسد الشارع بالأسمنت والحديد وخلافه
مابنزعلش ..طالما حاجة فيها خير للناس
.....................................
لو أنا رايح مشوار ..ولقيت الشارع مسدود بالمصلين
هقفل عربيتي وأنزل أصلي
ياريت تكون الفكرة وصلت بدون عصبية..طالما إن الغرض خير
يا سيدى لا خلاف
بس انت بتصلى غيرك مابيصليش
مافيهاش حاجة
حرية العقيدة
بس الطريق بتاع كل الناس
قفل الشارع غير صحيح
فرضا سياره اسعاف مثلا لازم تمر
وايضا مع الاحترام و الحريه لكل الناس
مصر بلد اسلاميه ودينها الرسمى الاسلام
وتكفل حريه العقيده لكل الناس
و معنى كدا ان الناس ليها حق تصلى فى اى مكان و زمان
و ايه المشاعر اللى هتثير حضرتك من الناحيه دى
المعترض على كدا ميعش فيها
انا فعلا اعتبرتك كده ... وانا مش بادعى عليك انا باقول حسبى الله ونعم الوكيل .. لاننا اصبحنا خلاص ضيوف فى وطنا وحتى الصلاة مش عارفين نصليها براحتنا لانى لو اعتبرتك مسلم .. حقيقى مافيش رد عندى ابدا ..
وللمرة التانية باقول ان الطريق مش مقفول ولو شوفت الفيديو هاتلاقى الناس بتصلى على الرصيف ( الكورنيش ) والتركيز فى الشارع الموازى للكورنيش و هاتلاقى العربيات والترام رايح جاى بحرية ودون عوائق
والصلاة دى بتكون اشبه بعيد بننتظره من السنة للسنة والعدد بيكون بهذا الحجم بس ليلة 27 من 12 الى 2 صباحا يعنى ساعتين بس وكل شئ بعد ربع ساعة بيرجع لطبيعته اما باقى ايام التهجد والقيام بيكون التركيز على شوارع مش حيوية ومش بيقفل الكورنيش وكل سنة والجميع بخير ..
فسحه .. همه دول المصريين ... بيحبوا يزيطوا في الزيطه .. بيصلوا بس يوم واحد في السنه ... وصلا واحده بس في اليوم .. والمؤمن منهم بيصلي الجمعة بس .. "أنتم يومئذ كثير ولكنكم كغثاء السيل" وبعد كده تلاقي سب الدين والسرقة والزنا والقتل والفجر ... شعب مريض
فسحة
وانتا اش عرفك انها فسحة
دخلت فى قلب كل واحد علشان تقول كدة
الناس بتستنى فرصة تمحى فيها ذنوبها
وانتا بتقول فسحة
دى حاجة بين العباد وربهم لا انا ولا انتا ولاى حد تانى ليه دخل فيها
هوة وحدة اللى ليه الحكم فى يوم لاريب فيه
مسكتكتر على الناس القيام والطاعة
انا بجد مش عارف اقول ايه
شكرا ليكم
انا منسحب طالما انتوا كفرتونى
مع ان محدش اه حق لان
معتقداتى تخصنى مع ربنا
السلام عليكم ورحمة الله وبركاتة
طبعا كل الشكر لياسر باشا علي الفيديو الرائع
و طبعا كل التقدير للاخ المعترض علي قفل الطرق لان
الاسلام يحث علي الالتزام و عدم الفوضي و الموضوع مش حكاية بلد اسلامي او بلد غير اسلامي الموضوع تحضر و نظام
و النظام لا يزعل منه اي شخص سواء مسلم او غير مسلم فلو افترضنا ان دار عبادة اخر غير المسجد اراد ان يقيم شعائره في الطريق لازدحام الناس بها اكيد احد المسلمين هيقول يعني هيا داقت عليهم بيعملوها في الشارع احنا مش هنعرف نروح اشغالنا و هكذا من صور الامتعاض لان الموضوع لا يخصه و كمان هنلاقي احد افراد العقيدة الاخري برضه لا يعنيه امر الصلاة في دور عبادتة سواء كنيسة او معبد او عنده امر مهم شغله هيقول نفس الكلام
اذن الموضوع في رأيي مش عقيدة خالص ده نوع من انواع ان الموضوع ده لا يخص احدا ما و طبعا في كثير مننا المسلمين يترك طول العام الصلاة المكتوبة المفروضة ويهتم بصلاة التراويح في رمضان فقط ولذا لزم التنويه بأنه حينما يفتح الله علينا ويهدينا الي الحق ويتوب علينا من ذنوبنا ستصبح هذه الكثافات طبيعية اثناء جميع الصلاوات ان شاء الله وبالتالي تصبح المساجد اوسع من الاصل وكذا تختار وحولها اماكن فضاء لاستيعاب الاعداد الزائدة فيارب انعم علينا بأن تسد كل الطرق حول المساجد لانني متوقع لو ان اللي قاعدين مثلا في رمضان امام التلفاز نزلوا الي صلاة العشاء في المسجد والتراويح اقسم ان في مناطق ستغلق كلها مش بس شوارع وطبعا ده غير مقبول لان هناك المريض وذو الحاجة ويحتاج للشارع كي يمر وينعم بالسهولة واليسر في الطريق فاللهم ارزقنا بالهداية الي الطريق الصحيح وفي السعودية علي سبيل المثال تجد النظام ده واضح حتي المباني اللي بتزال كل سنة لتوسعة الحرم لا تجد مشاكل من اي نوع في السير او اختناق مروري بسبب الازالة لكن اثناء المشاعر خلاص الكلام سكت والكل يوسع مفيش غير رجلك هيه اللي هتشيلك علشان تعدي وتروح وتيجي فاللهم ارزقنا بدنا هينا لينا لطاعتك اللهم ارزقنا شوارع واسعة تكفي المصلين والسائرين والمحبين والغير محبين اللهم اهدي الامة لما تحب وترضي واكتبنا مع الصالحين
وبعدين يا جماعة الخير قال الله تعالي لنبيينا صلي الله عليه وسلم
قال تعالي (( "ولو كنت فظًّا غليظ القلب لانفضوا من حولك "))
وقال تعالي (( ادْعُ إِلَى سَبِيلِ رَبِّكَ بِالْحِكْمَةِ ))
اسف جدا للاطالة وكلنا حبايب
م.حاتم السباعي
طبعا حضرتك الدين عمره ماكان صلاة بس
بس حضرتك يعنى اعذر الناس
اكل العيش والغلا والقرف اللى بيشوفوه كل يوم
للاسف نساهم ربنا
فابيستنشقوا فرصة انهم يتوبوا ويكفروا عن ذنوبهم ومين عارف كام واحد ربنا غفرله وتاب عليه
وانا عارف كويس ان الكورنيش ماكانش فيه اختناق ولا حاجة
لان المرور فى اسكندرية بينظم العملية شوية
ممكن تكون زحمة شوية او تقف شوية
دينا دين رحمة ولازم نساعى بعض
وربنا بييسر باذن الله
والله ياريت السنة كلها رمضان الواحد حاسس بفراغ رهيب من بعدة فى كل حاجة
انا واحد من الناس نفسى مصر تكون اعظم دوله فى العالم وافتخر انى مصرى
بس للاسف حاسس بل متاكد انه صعب لانه مفيش مستحيل
الموضوع فعلا بسيط
بس لازم نتعلم نسمع ونختلف حتى لو لم نتلاقى مش معنى كده ان حد غلطان
لا خالص الموضوع وجهات نظر وان كنت انا من وجهة نظرى لوحكمت النظام زى ما حضرتك تكرمت تكون صح
وكمان زى ما انا ذكرت مسبقا علاقتى بربنا لى لوحدى لكن
السلوك المشترك بين وبين الاخرين لازم تحكمة قوانين ونظم
مش عديها وموسم وكل سنه وانت طيب
وعلى ذكر كدة رمضان الماضى كنت فى تركيا
كلهم مسلمين بس فى نظام حتى وقت الفطار ما شفتش واحد راكن صف تانى
ولا غرزة زكنت بسوق
لدرجة انى لما جيت هنا بقيت ممل عن ما فبل فة السواقة على راى اصدقائى
لمجرد انى لما الاقى حد بيهجم بسيارته وعايز يعدى بستناه
كده اكون ممل
:majd(4):
بسم الله ما شاء الله
أنا شفت الفيديو قبل كده ،،، فيديو رائع ما شاء الله
سؤال بس للأخوة الاسكندرانية
مين اللي أخرج الفيديو الرائع ده ؟؟
هل إدارة المسجد ؟؟
لو هيا يبقي ربنا يباركلهم علي الفكرة الجميلة
و اللي أكيد اتكلفت وقت و مجهود و فكر
سبحان الله و بحمده
بجد منظر عظيم نفسي نفسي بجد يكون دة حال المسلمين في كل وقت مش رمضان بس و ربنا يجمعنا على الايمان
بالفعل المشهد ده من اروع ما شاهدت...ويارب يزيد ويبارك بدون اذى..واعتقد انه ماكنشى فيه اذى بدليل الترماى اللى كان ماشى وسط الناس اللى بيصلى منهم الكبير والصغير...وانا لى رأى ان الحياة دنيا ودين...موش لازم يعنى اللى يهتم بدينه وصلاته بينسى دنياه ويكون سئ وبيركن صف تانى وطبعه يبقى صعب!!! وفى حاجة دايما بنغفلها..وهيا انى لو يعنى متحضر وزى الفل وكل الناس بتحبنى من غير ما اصلى واقوم بفرائضى هو ده الصح؟ الحياة لا تستقيم بدون الدين لان الدين هو اللى بيدعونا الى الخلق الحسن وعلى فكرة الذى لا تنهاه صلاته عن منكر يبقى مالوش صلاه اساسا ومنظر زى ده يا شباب الخير لا يثير اى حفيظة على الاطلاق ولا داعى للجدال بشأنه ومشفناش فيه اى عربية اسعاف متعطلة او حد صلى وراح سب الدين يعنى عشان نتجادل فى الموضوع ده...وبالفعل خلونا متفقين كلنا مصريين ونفسنا مصر تبقى احسن بلد فى الدنيا بدون ما نسيب او ننسى تعاليم دينا سواء مسلم او مسيحى لان كل الاديان بتدعو الى الفضيلة وخلينا نتفق لازم اهتم بفرائضى وفى نفس الوقت بأخلاقى وارتقى بوطنى...بس فعلا كليب حلو جدا ومتصور بحرفنة وجودة التصوير عالية اوى..بس يا خسارة رمضان خلص..نفسنا المنظر ده يبقى علطول..
والله بلدنا جميلة بناسها اوي ده كفاية خفة دم اهلها اهو عندك مثلا
هنا في المنتدي انا بخش كتير علشان اضحك من قلبي علي تعليقات الاخوه الافاضل فمثلا اخونا د.احمد سامي وغيره لهم تعليقات تخليك تموت من الضحك من خفة دمهم وده لا تجده الا في مصر
اذكر اني كنت مسافر بلد عربي شقيق وانبهرت بيهم لما شفت عندهم ان مفيش شتيمة في الشوارع ولا في اختلاف جامد زي اللي بيحصل في المرور عندنا وبعدين تلاقي اتنين مثلا اختلفوا علي اولوية المرور تجد احدهم بص من الشباك وقال للاخر سامحني ياه بقيت احلم اني اعيش هناك وبعدين خير اللهم اجعله خير هما
يومين تلاته ورجلي داست في البلد شويه والله الخناق بيبقي بالبلط
مفيش شتيمة بس في ضرب تلاقيهم زنقوا علي بعض وهوب انزل يا باشا من العربية وكأنه والله رايح يحارب ولا تعلم بيطلع الالات اللي بيطلعها دي منين واول ما الضرب يخلص تلاقيهم دورو العربيات ومشيوا تاني ولا كأن فيه حاجه ولا حد يحوش حتي
انا هحكي لك موقف حصل والله معي شخصيا
احنا كنا في البلد الشقيقة دي علشان بنعملهم تحديث للخرائط بتاعة العاصمة علشان التوسعات المستقبلية للخمسين سنة اللي قدام اطال الله عمرك وبعدين طبعا معنا معدات و اجهزة مساحية لزوم اعمال رفع المباني والطرق والمرافق وخلافة وبديهي اننا نقف علي الرصيف او حرف الشارع بعد تأمين الطريق المهم معنا سيارة تتبع الشركة و السائق من نفس البلد حضر للفريق المساحي اللي شغال علشان يعطيهم مياه واكل وبيلف علي الفرق وهكذا في كل الشوارع المهم ركن علي جنب الطريق واخذ الاكل والمياه وعدي الجانب الاخر وجلس يأكل مع الشباب ام ايه اللي بيحصل اتنين بعربيات ماشيين زي المجانين واحد منهم عاوز يعدي من التاني قام لابس في العربية بتاعتنا اللي والله راكنة جنب الرصيف حلو الكلام ايه بقي اللي يحصل
حصل الاتي نزل من العربية بتاعته اعد يبص علي اللي جري في سيارتة طبعا اتعجنت لان سيارتنا كانت ميكروباص وهو كان معاه سيدان عادي المهم اعد يدور مين صاحب السيارة اللي هوه خرشمها برضه فلم يجد حد راح له يلومه معجبهوش الكلام ده اعد يتنطط علي سقف عربيته والله زي ما بقول كده فمحدش سأل فيه مع انه طريق حيوي جدا والشارع كله وقف يتفرج المهم طبعا اخونا السائق اللي من نفس البلد اول ما حصل كل ده ساب الاكل وقال للمهندس واللي معاه محدش يروح ولا نقول ان دي عربيتنا والله العظيم وكأنه يعلم اللي هيحصل المهم موضوع التنطيط ده مجبش نتيجة راح ساحب الكريك بتاع عربيته وبدء في تكسير زجاج الميكروباص محدش منعه ولا حتي من الناس اللي متجمعين راح مكسر العربيه بالكوريك محدش اتكلم راح ماسك ولاعة السجاير وراح عند تانك البنزين وحاول يشعل النار في العربيتين والله هنا بقي الناس ابتدت تجري تحاول تطفي الحريق المهم ساب العربيتين و عدي الطريق وركب تاكسي ومشي و حتي الان لا حس ولا خبر و الشرطة لما جت قالت هوه يعني لازم تركنوا علي جنب مختوش العربية لية اول ما خبطكم ومشيتوا
الحمد لله اني انا في مصر الان و علي فكرة اتنصب عليا في فلوس والله من حكومة هذه البلد وده مش معناه ان كل بلدهم كده ولا معناه ان كلنا كده بس احنا اللي كتير فبتبان مشاكلنا اوي عن غيرنا
وااسف علي الاطالة
م.حاتم السباعي
أنا فى رأيى ان دة غلط
طبعا مش الصلاة بس المنظر دة
سيبكم من الاخراج
دلوقتى لية التكتل فى مكان واحد بينما فى مساجد اخرى قريبة برضوا مافيهاش واحد ؟؟!
لية تصلى وسط العربيات والتراب والترام وفى الازقة وفى مداخل البيوت و المناور ونعترض حرمة البيوت لما بقية بيوت الله فاضية
كل دة عشان الشيخ صوتة جميل ؟؟؟؟؟ !!! مش عذر
فى رأيى دة مش اسلام ابدا
واللى يعترض ويقول عنى كافر والكلام دة يقول
لينا رب يوم القيامة يقولنا مين اللى ع حق ومين اللى ع باطل
السلام عليكم ورحمة الله وبركاتة
فيه ناس بتشوف الصلاة في مجاميع كبيرة أفضل و أكثر تأثيرا
أو ليهم وجهة نظر إن الأعداد الكبيرة دي إحتمالية أكبر أن يكون فيهم حد صالح فربنا يتقبل منهم مع الحد الصالح ده
يعني وجهات نظر ،،،
بس برده تحترم زي وجهة نظرك
و عموما صلي في جامع كبير ، جامع صغير ، لوحدك
الخير كله واحد و كله محمود
ماشاء الله وفيديو رااائع وخلص الكلااام
ومين قال لحضرتك ان بقية بيوت الله فاضية بالذات فى اليوم ده؟ حضرتك اليوم ده بالذات اللى ماكنشى بينزل من بيته عشان يصلى "ويمكن اللى موش بيصلى خالص" بينزل يصلى وبرضه مشفناش اى حرمة بيت اتهدرت ولا كلام كبير من ده خالص لانهم موش بيصلوا من داخل بيوت مايعرفوهاش او موجودين فى الصالون مثلا او بيختلسوا النظرات على حجرات البيوت المحيطة..واعتقد ان البيوت ممكن تفتخر ان المنظر ده ادامها بدليل المصلين اللى على السطح ولا دول كمان اقتحموا العمارة؟ يا شباب الخير ده موش كل يوم مع انى بتمنى انه يبقى كل يوم وساعتها هتشوفوا الفرق فى المعاملة والناس هتحافظ على حرمات بيوت غيرها بالفعل موش كلام ومحدش يملك يكفر حضرتك ابدا لان حساب حضرتك موش بأيد حد وزى ماحضرتك قلت كله عند ربنا هوه اللى هيفصل يوم القيامة وعلى النية كمان وعن نفسى وفى رأيى انا ايضا كليب جميل جدا جدا ومش الاخراج يعنى هوه اللى محليه ولا دى مجموعات جيه تمثل ويارب الناس دى كلها زى ما بتصلى كدة وبتتكبد الوقفة دى وبتبكى من خشية الله فى الصلاة تتقى الله ايضا فى المعاملة وساعتها هينصلح حالنا ان شاء الله وبكرر انا موش متفق مع حضرتك ان المشهد ممكن يثير حفيظتى او اقول عليه موش اسلام طبعا حضرتك تقصد التجمع موش الصلاة نفسها...وشكرا لسعة صدرك اخى العزيز
من غير تعليق على كلامكم وخناقاتكم والتلاكيك اللى بقت موضة الكام أسبوع اللى فاتوا
الفيديو أكثر من رائع
مش هقول غير إنه حسسنى إن لسه فينا أمل ، ودا إحساس نادر .. جدا
فعلا حاجة غلط جدا ومش متحضرة ,, الناس دى تعمل كدة
بس ليا كام طلب كدة للى معترضين على موضوع ان الناس بتصلى فى مكان واحد او متكتلين فى مكان ,,,,
بلاش لو سمتحتوا تتجمعوا انتوا اصحابكوا فى الشارع وتقفوا فية لان دة غلط
و كمان وانتوا بتسوقواا التزموا بالحرات بتاعتكواا لو فكرت تعيدنى فى يوم غصب عنى متزعلش لما اوقفك واقلولك انت انسان مش متحضر طالما زعلان ان الطريق مقفول عشان الصلاة
والطريق اساسا بيكون مقفول من الزحمة
متبقاش تنزل يوم رأس السنة فى الحفلات والهيلمنات الى بتعمل اليوم دة لان الناس بتكون متجمعة زى دول كدة بس الفرق فى العدد طبعا والى بيعملوه
-------------
طبعا انا مش بقول كدة عشان ابان الملاك البريء بس طالما انا مش مضايقكك يبئى ملكش حاجة عندى ولو انت عندك حاجة ضروية اليوم يوم اية الساعتين دول ابئى اجلهاا او انزل واستحمل الناس دى
-----------
انا عايز اقول على مثال حى على حاجة بتحصل عندنا هنا بس بلاش عشان محدش يقفش ف الكلام دة ويقولك حاجات غريبة
بس انا هاقول حاجة واحد بس بتحصل فى الوقت دة ان الامن المركزى بيكون تقربيا شبه قافل المنطقة وكل اما حد يعدى ويمشى بطىء شوية او مشغل التسجيل شوية تلاقى واحد جة يجعر ويقولك امشى او اطفى التسجيل
فيديو راااااااائع .. وأكتر مشهد أثر فيا بتاع العسكري الي بيدعي مع الناس
الناس دي جواها خير أكيد ، بس عايزة الي يطلعه
وربنا يبارك لفريق عمل الفيديو ، شغل احترافي ممتاز
بجد بجد فيديو اكثر من رائع
وردود اكثر من سخيفه للغايه .....................) تم حذف هذا المقطع ليس خوفا من الاداره او من العقوبه بل من الله سبحانه وتعالي
مع الاسف برغم فرحتي بالفيديو إلا اني حزين لان الناس بتعلق علي زحام الصلاه ولم اجد شخص واحد بيعترض ان الاسكندريه كانت في زحام شديد من المصطافين
لاكن ليه الناس تصلي في الشارع ليه الناس تتوب ليه الناس ترجع لربنا ليه ليه ليه
احنا دخلنا في نفوس كل الناس وكل الناس اللي بتصلي في رمضان بتصلي رياء
برغم اني متحفظ دائما في ردودي إلا اني لم استطع ان احتمل هذه المره فالموضوع فاق كل الحدود
بكره الاقي فتوي متصليش في المسجد طالما المسجد مفيهوش مكان
يا ناس ارجوكم تعقلوا فالله يراكم ويرانا ولا تشرعوا ولا تقربوا حدود الله
*=== (( ما يلفظ من قول إلا لديه رقيب عتيد )) ===*
اللهم اعز الاسلام والمسلمين وازل الشرك والمشركين
ما شاء الله ..