الموضوع: مش ممكن اللي بيحصل على الكورنيش ده

ربنا يصلح الحال

حضرتك عارف إيه الأغلس من كده الحركات اللى بيعملوها وهما ماشيين احتفالا بالعريس أنا مرة كنت فى طريق المريوطية ناحية فندق كتراكت رايح فرح و كان فيه شلة أصحاب بيزفوا واحد برده بس بغشامة حبة تخميس و أمريكانى بالعربيات قدامه لزوم المنظرة و الشو فى طريق ما يستحملش تماما اللى هما بيعملوه ده و اللى ماشى حواليهم يولعوا

خد عندك ده

ليا واحد صاحبى ظابط شرطة نقيب فى المرور وفى يوم مخلص شغل بعد خدمة 12 ساعة فى الشارع ومش شايف قدامة ونفسة يروح .. وراكب المكنة بتاعتة وماشى فى مصطفى النحاس مدينة نصر

شارع مصطفى النحاس ها !!!

لقى الشارع وكانة يوم الحشر من عند التوحيد والنور كده وبيضرب بعينة لقى كل الدنيا قدام واقفة وبيقولى وكان الناس بتبصلة واتقولة هو فية اية وهو ميعرفش . راح طالع على الرصيف فى النص وقرص شوية ونقل نفسة الناحية التانية وماشى عكس لحد فين بقى لحد مدرسة المنهل كده هههه !!

لقالك عربية عريس BMW ويجى 5 عربيات شباب قدام تخميس وفرك وخبط ورزع وحاجة زى الفل
ركن المكنة قدام عربية العريس ونزل العريس وباقى الشباب وحتى عربيات اللى مقفلة من ورا على عربية العريس . الرخص لو سمحتم يا اساتذة كلة طلع الرخص وفاكر اخرها 50 جنية .

الفاجر بقى عمل اية طلب النجدة من غير ما حد ياخد بالة وسلك الطريق وركن الزفة على جنب وعمل وكانة بيعمل مخالفات يا عينى هههههههه

جت النجدة قالك اثبت حالة يا عم وعمل حتة محضر ابن حرام

1. السير فى مواكب غير رسمية بدون تصريح
2. السير عكس اتجاة (ده بالنسبة للعربيات اللى كانت بتخمس قدام) الراجل اعتبرها سير عكس اتجاه (حقة بقى يفترى) ههههه

3. سوء ادب والتحدث مع ظابط المرور بأسلوب غير لائق
4. تعمد تعطيل حركة المرور والسير فى شارع حيوى
5. ملصقات غير مثبت على رخصة المرور
6. زجاج ملون غير مثبت على رخصة المرور

كل ده وهو مش فى وقت خدمتة وقعد فى الليلة ده ساعتين معاهم وفى القسم.

واخيرا............

اركب يا نجم الشباب مع النجدة وعلى قسم مدينة نصر والباقى كده يحصلك على مهلة ومحضر حبس للعربيات اللى واخدة سير عكس اتجاة وعرض على النيابة المسائية ههههههههههههههههههه


ظبط ابوهم ههههههههه بيت العريس فى القسم

الغريب انة بيقولى بذمتك ودينك وايمانك لما تلاقى موقف زى ده من شباب المفروض شكلهم ناس متعلمة وشكلهم كلاس وراكبين عربيات زى الفل من الاخر ناس مرتاحة. يبقى اية الوعى عند الباقى الغير متعلم ولا مؤهل متوسط. هستنى اية من سواق ميكروباص ولا تاكسى!! معرفتش ارد علية هههههههه

دى اسمها طبيعة التقليد الاعمى تلاقى و احد اصولة من العشوائيات حيث انعدام الحضارة و انتشار الجهل و عدم الاخلاق قام بتنفيذ الفكرة و بقت عادة عند الناس اللى من نفس العينة (سياسة القطيع) تلاقى ثور و احد فى المقدمة وباقى القطيع بيقلدوة و اتباع لية