موضوع العيد للمناقشة: 2000 سي سي افضل في استهلاك البنزين من 1600!

**ecybrarian** · 10-09-2010 09:59 AM

من كام يوم كنت قاعد مع ثلاثة اصدقاء منهم واحد قادم من الإمارات (حيث البنزين رخيص) ويعمل في شركة الفطيم للسيارات وواحد قادم من إنجلترا (حيث البنزين مش رخيص) المهم الحديث تطرق إلي السيارات وكيف إننا في مصر نركب اقل أنواع السيارات وحتى السيارات التي تسير في مصر مواتيرها اقل في السعة الليترية من مثيلاتها في الخارج..يعني مثلا الهوندا السيفيك بتنزل (عموما) 1800 سي سي..ومن هنا احتد النقاش بيننا..الأثنين خارج مصر مقتنعين تماما بأن الـ1600 لسيت افضل في استهلاك البنزين ولا حاجة..وإليكم وجهة نظرهم:
- هناك عوامل كثيرة تتحكم في معدل استهلاك العربية منها وزن وحجم العربية والتصميم الأيرودينامكي ونوع الفتيس (اتوماتيك ولا عادة) والتكييف وظروف الطرق (مفتوح أو داخل المدينة..طريق صاعد أو هابط..إلخ)
- عدم اقبال المشترين على السيارات 1600 سي سي في أوروبا والخليج. في أوروبا يقبل المشترون على السيارات الأقل أو الأكثر في السعة الليترية من 1600 سي سي..بالنسبة للكثير الـ1600 معناه لا أنا وفرت في البنزين ولا أنا استفدت من أداء انعم للسيارة التي تعمل بالبنزين.
- المقارنة لا زم تكون بين نفس العربية في نفس ظروف التشغيل على نفس الطرق والفرق يكون في الموتور فقط
- تعالو نأخذ الميجان مثلا..يعني ها نقول عربيتين ميجان نفس الموديل فيها كل منهما خمسة افراد ومشغلة التكييف وماشيين على نفس الطريق في نفس الوقت..تعالوا نقارن:
-- على الطرق المفتوحة (مصر اسكندرية الصحراوي) وعلى سرعة 100. العربية الـ1600 هايكون RPM فيها معدي 2000 وممكن 2500 لفة كمان..في حين إن الميجان 2000 سي سي هايكون RPM فيها اقل من 2000 لفة أو أكثر قليلا.
-- داخل المدينة (كانت مفاجأة بالنسبة لي) السواقة داخل المدينة تحتاج لنقلات كثيرة تسلتزم تغيرا في عزم الموتور صعودا وهبوطا كتييير..طيب في النقلات الأتوماتيك مش برضة الـ2000 سي سي بتنقل على RPM أقل من الـ1600 سي سي!
-- في حالات التوقف في الزحمة والتحرك البطيئ..زمان كان العربيات 1600 احسن في حالات التوقف لكن العربيات الحديثة (ومنها الميجان) فيها برامج للزحمة يقوم فيها كمبيوتر العربية بتقييد (تكتيف) العربية لتقليل الاستهلاك والانبعاثات فمثلا لو جبت العربية على N هاتلاقي RPM اقل من المعدل الطبيعي (إللي هو تقريبا 850) ومن هنا تكون الميجان 2000 سي سي اكثر استهلاكا ولكن ليس بالنسبة الكبيرة التي يتخيلها البعض.
-- وأخيرا الدوارة start up طبعا الـ2000 سي سي انعم في الدوارة

وعلى هذا الكلام ينطبق على السيارات التالية: أوكتافيا، كورولا، باسات، يتا او جيتا..واللي زيهم

=====
ملحوظة الاستهلاك الاقتصادي للبنزين معناه افضل أداء مقارنة باستهلاك البنزين، ومن المعروف إن العربية 2000 سي سي أدائها انعم relaxed. زي تمام ما تيل الفرامل الأصلي اقتصادي عن التيل المضروب على الرغم من إنه مش ارخص

انت رأيك ايه؟؟؟؟؟

**tutankhamoun** · 10-09-2010 10:42 AM

و الله يا باشا أنا مختلف معاك .

كل لما حجم الموتور يكبر معناه حرق للبنزين أكبر .
و في النهاية هي بتكون حسب طريقة القيادة و عدد لفات الموتور زي ما أنت قلت .
بس ليه تجيب عربية 2000 سي سي علشان تمشي بشويش ؟؟

كان فيه تجربة في برنامج التوب جير
عربية بي أم دبليو 1800 سي سي تقريبا أمام عربية تويوتا 1000 سي سي .
و خلو الأثنين مشيو ورا بعض ( التويوتا الأول و يليها البي أم )
بشرط أن البي أم يرسى على عدد لفات صغير جدا و يوازي سرعة التويوتا .

و في النهاية كان أستهلاك البنزين متساوي

إنما لو ضغطة واحدة من سواق البي أم على الموتور ...... السحب هايزيد و شُرب البنزين هايزيد معاه بالتوازي .

و أنت راكب عربية كبيرة في الفئة الحجمية ..... عمرك ما هاتمشي بشويش لأن الموتور هايكون يناديك ....للأعمق !! على رأي عبد الحليم .

حاجة كمان ........
الموتور الكبير ....... أنظمة العربية بتختلف معاه ( عفشة و أنظمة تعليق و فرامل ووزنه بيكون أعلى من وزن العربية اللي فيها موتور 1600 أو أصغر )

معلومة كمان ....
كان فيه برنامج هندسي مش فاكر شوفته على أي قناة
كانوا بيعملوا محاكاه لموتور العربية ..
الراجل كان بيثبت عدد اللفات ..... و يشوف الأستهلاك و بعدين يزود عدد اللفات حاجة بسيطة و بعدين يشوف الأستهلاك
و لقى أن دوسة صغيرة لتزويد عدد اللفات بتأثر على أستهلاك البنزين بطريقة ملحوظة

و بمناسبة أنجلترا
أغلب الناس هناك بتشتري عربيات مواتيرها صغيرها لأسباب كثيرة
الأنبعاثات منها أقل و دي ضرايبها أقل .
توفير البنزين لأن البنزين هناك غالي قوي .
حجم العربية صغير و بالتالي سهولة قيادتها في شوارع أنجلترا الضيقة جدا و سهولة ركنها .

**ahmed88hassan** · 10-09-2010 10:49 AM

كلامك نظريا صحيح
بس الحوار مش راضي يركب في دماغي .. مش عارف اتخيله

**ecybrarian** · 10-09-2010 12:04 PM

الردود قبلها نجمتين

المشاركة الأصلية كتبت بواسطة tutankhamoun

بس ليه تجيب عربية 2000 سي سي علشان تمشي بشويش ؟؟
* * في مصر يبقى مجبر أخاك..او يبقى عندك عربيتين واحدة منهم city car الف سي سي..ربنا يرزق

كان فيه تجربة في برنامج التوب جير
عربية بي أم دبليو 1800 سي سي تقريبا أمام عربية تويوتا 1000 سي سي .
و في النهاية كان أستهلاك البنزين متساوي
* * يبقى ما اختلافناش

الموتور الكبير ....... أنظمة العربية بتختلف معاه ( عفشة و أنظمة تعليق و فرامل ووزنه بيكون أعلى من وزن العربية اللي فيها موتور 1600 أو أصغر )
* * كلام صحيح 100% لكن على حد علمي الفرق في الميجان فرق موتور وفتيس وكونترولاتهم وقاعدة موتور اليومينوم أكبر حجما فقط ..وصديقي بتاع الفطيم أكد لي إن السيفيك والكورولا نفس الشيئ تقريبا

معلومة كمان ....
كان فيه برنامج هندسي مش فاكر شوفته على أي قناة
كانوا بيعملوا محاكاه لموتور العربية ..
الراجل كان بيثبت عدد اللفات ..... و يشوف الأستهلاك و بعدين يزود عدد اللفات حاجة بسيطة و بعدين يشوف الأستهلاك

و لقى أن دوسة صغيرة لتزويد عدد اللفات بتأثر على أستهلاك البنزين بطريقة ملحوظة
* * برضة ما اختلافناش..في المقارنة في أول مشاركة العربية الـ1600 سي سي هاتزودRPM علشان تحصل على أداء مناسب على الطريق عن الـ2000 سي سي

و بمناسبة أنجلترا
أغلب الناس هناك بتشتري عربيات مواتيرها صغيرها لأسباب كثيرة
* * city cars في أوروبا هي الأفضل..بس أغلبهم عندهم أكثر من عربية لزوم المشاوير الطويلة
.... وشكرا لمشاركتك يا كينج..الجماعة بتوع بروتون هم الأنشط دائما في المنتدى وانت بالذات بتضيف قيمة لأي موضوع تناقشه

[

المشاركة الأصلية كتبت بواسطة ahmed88hassan

كلامك نظريا صحيح
بس الحوار مش راضي يركب في دماغي .. مش عارف اتخيله

.... تعرف حضرتك الموضوع يبقى أكثر إقناعا لو حد معاه عربية 2000 سي سي وياريت لو كان مسقط مكنة كمان ينقل لنا خبرته

**tutankhamoun** · 10-09-2010 12:19 PM

الأستاذ و الأخ الفاضل ecybrarian

أولا تحياتي لحضرتك و كل عام و أنت و أسرتك و أسرة المنتدى كلها بخير و الشعب المصري و العربي و المسلم كله بخير .

بالنسبة لنقطة معينة أحب أعلق عليها من كلام حضرتك

* * city cars في أوروبا هي الأفضل..بس أغلبهم عندهم أكثر من عربية لزوم المشاوير الطويلة

أنا آسف على الكلمة دي و لكن الجملة دي غير صحيحة .
لأن أقتناء عربية هناك غالي جدا ... مش علشان ثمن العربية .... علشان مصاريفها ( تأمين أجباري - ضريبة - ثمن البنزين - مكان الركن ... الخ )

الناس هناك كل واحد عنده عربية واحدة بالكتير ده بالاضافة لضريبة أمتلاك سيارتين بتكون عالية .
حاجة كمان ...... المسافات هناك مش كبيرة ولا حاجة
بالاضافة أن هناك السفر أغلبه بالقطار أو الطائرة و بعدين يأجر عربية يومين أو ثلاثة و الأيجار هايكون بنفس تكلفة اشغيل العربية لو أنت مسافر مسافة طويلة .

**MaZaGAngeE** · 10-09-2010 12:55 PM

أكبر مشكلة تواجه السيارات في مصر جمارك اللي فوق 1600 سي سي

بناء على تجربة و مقارنة 1300 و 1200 ب 2000 شايف ان الفرق مش كبير خالص بالعكس العربية الكبيرة بتديني حرية و مساحة تحميل زي ما انا عايز بدون قلق بالعكس احيانا كتيرة باخد حاجات احتمال ضعيف اني اعوزها و ده مستحيل في الصغيرين ده كمان بسيب حاجات محتاجها عشان المساحة و متنسوش كمان المطبات الكبيرة مش بيهمها لو جبل هتعدي لكن الصغيرة اي مطب بتحك مع التحميل ...

قد تكون مقارناتي مش مناسبة للموديلات الجديدة لأني بقارن
بيتلز مع بطة مع 504 استيشن

**raedegypt** · 10-09-2010 01:14 PM

بصراحه انا اختلف معاك.. والدليل هاتى لى اسم سيارة 2000 سى سى اطلقوا عليها سيتى كار فى بلد مزدحم؟؟؟ كل السيارات التى تطلق عليها سيتى كار او تاون كار من شركتها الام بتكون 1100 سى سى او يمكن اكبر شويه او اقل .. زى بريطانيا اطلقوا على السيارة اى 10 الهيونداى سيتى كار وهى 1100 سى سى وغيرها بيكانتو والفيورا والفولكس و...... الخ لآن سعاتك داخل المدن المزدحمه مع السرعات نظام 10 و20 وتوقف زى مصر لو الماتور كبير الاستهلاك بيزيد ويسخن بسرعه ويؤثر على الاداء وعمر الماكينه ولو اتوماتيك وتكييف يبقى الاستهلاك اعلى . هو افضل فى الطرق المفتوحه والجرى والتحميل لكن جوة البلد لاء

**ecybrarian** · 10-09-2010 03:53 PM

المشاركة الأصلية كتبت بواسطة tutankhamoun

الأستاذ و الأخ الفاضل ecybrarian

أنا آسف على الكلمة دي و لكن الجملة دي غير صحيحة .
.... مرة أخرى عندك حق..أنا جانبني الحق لما عممت المعلومة على أوروبا الحق هو إن الناس الغاوية سواقة وعندهم طرق مفتوحة مثل ألمانيا عندهم أكتر من عربية..طبعا إنت عارف إن في ناس في اوروبا بتجيب عربيات وتروح تجربها على الاتوبان في ألمانيا..جاتنا نيله :-)))))
[/color]

المشاركة الأصلية كتبت بواسطة mazagangee

أكبر مشكلة تواجه السيارات في مصر جمارك اللي فوق 1600 سي سي

بناء على تجربة و مقارنة 1300 و 1200 ب 2000 شايف ان الفرق مش كبير خالص بالعكس العربية الكبيرة بتديني حرية و مساحة تحميل زي ما انا عايز بدون قلق بالعكس احيانا كتيرة باخد حاجات احتمال ضعيف اني اعوزها و ده مستحيل في الصغيرين ده كمان بسيب حاجات محتاجها عشان المساحة و متنسوش كمان المطبات الكبيرة مش بيهمها لو جبل هتعدي لكن الصغيرة اي مطب بتحك مع التحميل ...

قد تكون مقارناتي مش مناسبة للموديلات الجديدة لأني بقارن
بيتلز مع بطة مع 504 استيشن

المشاركة الأصلية كتبت بواسطة raedegypt

بصراحه انا اختلف معاك.. والدليل هاتى لى اسم سيارة 2000 سى سى اطلقوا عليها سيتى كار فى بلد مزدحم؟؟؟ كل السيارات التى تطلق عليها سيتى كار او تاون كار من شركتها الام بتكون 1100 سى سى او يمكن اكبر شويه او اقل .. زى بريطانيا اطلقوا على السيارة اى 10 الهيونداى سيتى كار وهى 1100 سى سى وغيرها بيكانتو والفيورا والفولكس و...... الخ لآن سعاتك داخل المدن المزدحمه مع السرعات نظام 10 و20 وتوقف زى مصر لو الماتور كبير الاستهلاك بيزيد ويسخن بسرعه ويؤثر على الاداء وعمر الماكينه ولو اتوماتيك وتكييف يبقى الاستهلاك اعلى . هو افضل فى الطرق المفتوحه والجرى والتحميل لكن جوة البلد لاء

.... شكرا لاضافتكم للموضوع..بس احنا هنا بنقارن بين عربيتن زي بعض تماما احدها 1600 سي سي والثانية 2000..دي الحالة الوحيد إللي هايبان فيها خدعة الـ1600 سي سي أوفر أو وهم إن 2000 سي سي بلاعة بنزين..ولو احنا بلد بتعتمد على الدرسات الميدانية في قراراتها كان أكيد هايخلوا جمرك وضريبة 2000 سي سي زي الـ1600

**د.محمود صلاح** · 10-09-2010 03:55 PM

لو الجمارك معقولة بالطبع هشتري ال 2000 سي سي

**raedegypt** · 10-09-2010 04:22 PM

المشاركة الأصلية كتبت بواسطة ecybrarian

.... شكرا لاضافتكم للموضوع..بس احنا هنا بنقارن بين عربيتن زي بعض تماما احدها 1600 سي سي والثانية 2000..دي الحالة الوحيد إللي هايبان فيها خدعة الـ1600 سي سي أوفر أو وهم إن 2000 سي سي بلاعة بنزين..ولو احنا بلد بتعتمد على الدرسات الميدانية في قراراتها كان أكيد هايخلوا جمرك وضريبة 2000 سي سي زي الـ1600

خلينا ناس بنحط استراتيجيات للدوله من فوق.ز لو عندك فى مصر 25 مليون عربيه مثلآ معنديش ارقام لازم تضع فى اعتبارك متوسط مساحه السيارات ال بتسوردها او تسمح بانتاجها لانك فى الاخير عند شوارع محدودة المساحه فى العرض ومع الازدحام والعدد الهائل ستتحول شوارع القاهرى الى جراج كبير ودة بدء ظواهرة من معدلات السرعه التى تقل كل يوم وزمن الوصول للعمل اصبح اكثر وهكذا الخلاصه هنا لابد من التركيز على العربيات الصغيرة للدخول للبلد وفرض ضرائب على الكبير للحد من اعدادها جو البلد .

الحاجه التانيه لو انت وزير اقتصاد او ماليه يجب ان تنظر الى حجم الاستهلاك الكلى للمحروقات لهذة السيارات لانها فى الاخير بتسحب من مخزونك الاستراتيجى ويحرمك من المحافظه عليه للاجيال القادمه للاستفاده منه او نفاذة بسرعه ويمكن تضطر الى الاستيراد بعد كدة على حساب خزينه بلدك . الخلاصه يجب التركيز على سيارات سى سى اقل وتشجيع الناس على استبدال القديم لتقليل الحوادث وشلل الطرق وتلوث البيئه وتشجيع التجارب الناجحه فى الدول الاروبيه لسيارات بالكهرباء وخلافه

الموضوع: موضوع العيد للمناقشة: 2000 سي سي افضل في استهلاك البنزين من 1600!

LinkBack

أدوات الموضوع

عرض

موضوع العيد للمناقشة: 2000 سي سي افضل في استهلاك البنزين من 1600! - انشر الموضوع فى :

-

-

-

-

-

-

المواضيع المتشابهه

ما هى افضل سيارة 1600 من حيث استهلاك البنزين

حل اللغز فى استهلاك البنزين للصنى 1600 cc

حصر مشاكل الدايو: استهلاك البنزين. (مشاكل-اسباب-حلول). والموضوع مفتوح للمناقشة.

عداد البنزين فى الديوا بيهيس (موضوع للمناقشة)

استهلاك البنزين في ال 1600 مانيوال

الكلمات الدلالية لهذا الموضوع

المفضلات

المفضلات

ضوابط المشاركة