عايز اعرف كل حاجة عن 307 هاي لاين

**bedo13** · 26-09-2010 05:09 PM

المشاركة الأصلية كتبت بواسطة toot70

مفيش اي حاجة يا باشا وانا في الخدمة

انا اعرف ناس بيشتغلوا فيها برة التوكيل بس مش ميكانيكية النص كم لازم يكون بيفهم وعنده الجهاز ويعرف يمد ايده فيها واي عربية جديدة فيها خوف في التصليح واحب ااقولك ان السيراتو لو عطلت منك في مكان ومش معانا جهاز هتغلب
اي عربية فيها كمبيوتر او كنترول هتتعب في اللف والصيانة برة لو معندكش واحد مضمون

اما موضوع الفيكترا سي فهي نفس تكنولوجيا المواتير اللي نازله في الاسترا من سنة 2007 فهي سهلة في السوق مش معقربة يعني
فلو فيه حد كويس خلاص وبعدين لو الميكانيكي اللي اشتغل في الفيكترا ميفهمش فيها ممكن يطيرلك الكنترول بتاعها لو عك وخلاص
اما عن نظام ايراني واللا لا
فاعتقد فيه كود علي العربية وفيه موقع بتدخل الكود ده يقولك المكان وسنة الصنع
هورلك عليه هو غالبا اسمه
FLW
او حاجة زي كدا مش عاوز افتي كتير
بس اول ما اوصل لمعلومة هديك خبر

وبعدين عاوز افكر حضرتك من كام سنة لم الهيونداي نزلت مصر طلعوا فيها القطط الفاطسة وقعدوا يقولوا معقدة وزفت وبتبوظ
متديش ودنك لحد كتير يا راجل دا الصيني ماشي زي الفل
احنا بلد عجيبة والمطلوب والمعروض فيها اغرب
مكنش العربية الاودي الاولي في المانيا حالها نيله عندنا

ويقولك متشتريهاش دي قطع غيارها نار وسعر بيعها مش عارف ماله
لو عاوز تستمتع وتحمي اللي جوة العربية من بلاوي الطريق وشروره يبقي البيجو مش وحشة وصدقني ش هتندم
معايا كويسة وزي الفل احنا اللي بلد فظيعة وكله يقولك بيقولوا واكتر حاجة تفقعني لما يقولك قطع غيارها ناااااااااار طيب يعني نار ازاي ومقارنة بايه وبتقعد قد ايه يقولك كلام فارغ متفهمش منه حاجة
انت بتشتري نفسك وروحك وكله بايد ربنا بس برضوا بنعمل اللي علينا وبنوفر في تمن الوقت اللي بيضيع في التصليح

كل حاجات العربية موجودة استيراااااد ومتخفش واسعارها معقولة بس انت خليك زبون عند واحد لانهم احيانا بيستهبلوا
وبعدين كل حاجة ليها بديل ومش مضر

ياباشا الف الف شكر ليك انت بجد طمنتني اوي من العربية دي

وان شاء الله هدور على واحدة ياريت لو مافيهاش تعب حضرتك لو في حاجة قدامك تقولي بس ياريت تكون اوتو وياسلام لو فتحة سقف..
بس حضرتك ماقولتليش ال308 بتاعت الوكيل ايراني ولا فرنساوي والعربية بالمواصفات اللي قولت عليها دي سعرها كام؟
بالنسبة للفيكترا سي انا اصلا باشتغل بايدي مع الميكانيكي مش بسيبه لوحده خالص غير في الحاجات البسيطة زي التيل والفلاتر..
واي استفسار عن الفيكترا سي انا تحت امرك ان شاء الله لو كنت عارف يعني..

**Moe86** · 27-09-2010 03:48 AM

أنا كمان متشكر ليك لأنى ناوى عليها قريب ان شاء الله و سمعت نفس الجملة بتاعة "قطع غيارها ناررر" و فى الأخر لقيتك بتقول أسعار قريبة جدا من البونتو بتاعتى
حاجة كمان كنت عايز أسأل عنها, ثباتها فى المنحنيات و الغرز أخباره ايه ؟ لأنى سمعت جملة تانية " العربية بتعوم و ثباتها أى كلام"
شكراااا

**egytamer** · 27-09-2010 11:57 AM

عربية جميلة بس التوكيل كسلان اوي معرفشي لية الصراحة بحس انها زي الالماني مفيهاش غلطة بس التوكيل الله يسمحة

**toot70** · 27-09-2010 12:21 PM

المشاركة الأصلية كتبت بواسطة Moe86

أنا كمان متشكر ليك لأنى ناوى عليها قريب ان شاء الله و سمعت نفس الجملة بتاعة "قطع غيارها ناررر" و فى الأخر لقيتك بتقول أسعار قريبة جدا من البونتو بتاعتى
حاجة كمان كنت عايز أسأل عنها, ثباتها فى المنحنيات و الغرز أخباره ايه ؟ لأنى سمعت جملة تانية " العربية بتعوم و ثباتها أى كلام"
شكراااا

يا باشا اللي بيعوم بس المراكب

هههههههه انا بضحك معاك

هو فيه فرق بين اللي سايق هيونداي واللي سايق اوروبي وخاصة الالماني والفرنساوي

بص يا سيدي العربية عمرك ما هتحس انها بتعوم منك وثباتها حكاية وبعدين مفهوم تعوم ايه بالظبط انها بترمي منك جامد وبتلمها بالعافية واللا بتروح وتيجي واللا بتصرخ وهي بتلف وترد تاني لوحدها ؟ واللا ايه بالظبط

بس هي مبتعملش اي حاجة من ده متقلقش ده اسلوب السواقه والغشم بس

هقولك علي حاجة اخطر
انا كنت سايق علي الطريق الصحراوي الغربي بتاع الصعيد وكنت بسرق حته كده علي السريع (ربنا ما يوريك الطريق ده عليه 6 رادرارات) وكنت سايق علي 150 وباخد ملف وفجأه في الملف لقيت كومة رمل قدامي
عديت عليه وتقولش (سكينة في الحلاوة)

زي ما اللمبي بيقول ولا هزة ولا حدفة ولا عاوزت تتلم

العربيات دي مصروف عليها يا باشا الناس دي مبتلعبش

اقولك علي حاجة تضحك عليها بمناسبة بيقولوا (الكلمة اللي بكرها عمه )

واحد صاحبي كان عاوز يشتري الكورسا سي 2007 السيدان الناس كرهوه فيها قعدوا (يقولوله )يا عم دي بتقلب في الملفات (حسسوني انها معموله علشان تموت الناس) وبعد كدا ساقها مع واحد صاحبنا كان رايح مطروح وساقها علي 160
وهههههههههه قعد يشتم نفسه انه اجل شراها
متديش ودنك لحد

ده لينك عن طريقة تصنيع العربية
YouTube - - - Peugeot 307 Fabrication - -

وده اعلان حلو اوي عنها استرالي
YouTube - Great Australian commercial for Peugeot 307

بمناسبة قطع الغيار
انزل اخطف رجلك لغاية التوفيقية كدا هناك في الممرات وانت جي من ناحية شركة سامسونج والبنزينة هتلاقي فيه ناس بتبيع حاجات البيجو والسيتروين مع بعض اسال عندهم وطمن نفسك وخد قرارك علي معلومة من بياع مش من اي حد واقعد وقارن

يعني اللي غالي عليا ممكن يكون مناسب ليك و
واللي يناسبك ميناسبش غيرك
واحد ممكن لما تقوله البوجيهات ب 120 يجيله صداع لانه بتاع ابو 27 جنيه

اسأل بنفسك
انا بس بحاول اساعد

**Moe86** · 28-09-2010 03:59 AM

ألف شكر ليك, العربية عجبانى من الأول فمش محتاجة فيدوهات (فيديو التصنيع لذيذ قوى), بس أنا طبعا كنت مقلق منها علشان مش منتشرة و ما أعرفش شخصيا حد عنده منها