العربية مش راضيه تدور

**Fadl** · 22-09-2010 12:55 AM

لما تيجي تدور العربية الصبح و تلاقيها عماله تعمل صوت تكتكه تكتكه بس و مش راضيه تلقط و تدور خالص و بعدها راح صوت التكتكه خالص و برضه مش راضية تدور...

دا يبقي المشكله فين ???

**jojajo** · 22-09-2010 01:05 AM

طب انت عندك بتسمع صوت المارش اصلا ولا لا ؟ اذا كان لا يبقى شغل كونتاكت العربية واديها تانى وانت دايس دبرياج وخلى حد يزق زقة حلوة وترفع دبرياج مرة واحدة وتدوس بنزين هتلاقى العربية اشتغلت لو اشتغلت ودارت يبقى عيب مارش

**HanyAziz** · 22-09-2010 01:25 AM

الاخ الفاضل
كان عندي نفس الموضوع من يومين وطلعت البطاريه

**engaass** · 22-09-2010 09:56 AM

غالبا البطارية ماتت

**m_kamal** · 22-09-2010 10:59 AM

هى البطارية ..

**Fadl** · 22-09-2010 07:16 PM

متشكر جدا جدا يا رجاله

أنا رحت لواحد كهربائي انهارده الصبح و اخدته علي ايدي شاف الموضوع قاللي دي بطارية ...

اخدنا البطارية و راح قاسها لقاها تقريبا فاضيه خالص...قام شحنها و ركبها العربية دارت الحمد لله

بس طبعا المشكله إنه قاللي إن البطارية تقريبا عاوزه تتغير و يمكن تعمل الحركه دي معايا تاني..لأن فيها معيار كدا لسه بعد ما اتشحنت لونه اسود و مفروض كان يبقي لونه أخضر

**pharonicking** · 22-09-2010 11:31 PM

غير البطارية وريح دماغك"

**Fadl** · 23-09-2010 08:13 AM

هي أحسن نوع بطارية ل لادا 2017 إيه???و تمنه كام تقريبا??

و أظن أكيد بيبقي معاها ضمان صح??

**aymanmaly** · 23-09-2010 08:26 AM

اولا لازم تكشف على الدينمو علشان تتأكد انة مش السبب فى بوظان البطارية ( ممكن يطلع الموضوع عمر افتراضى للبطرية بس تأكد احسن )
و كل عربية ليها المقاس بتاعها ( فية ناس بتفضل تحط مقاس اكبر من الاساسى بتاع العربية بس ان مش مع الرأى دة لانة بيرهق الدينمو
انواع البطاريات كثير جدا
فية منها جافة و فية منها بمياة
الجافة لا تحتاج صيانة تحتاج فقط كشف على الشحن
النوع الاخر يحتاج صيانة كل شهر للتأكد من منسوب المياة فى البطارية و الشحن
و كلها عليها ضمان بيختلف الضمان من شركة الى اخري ( ضمان استبدال 12 شهر او خصم مبلغ شهرى من قيمة البطارية نظير الاستهلاك )
اما عن نفسي فانا شايف ان بطاريات ac delco ممتازة
و تأكدان لولا تعدد الازوق لبارة السلع
و بالتوفيق فى الاختيار الصحيح

**mahmoud5777** · 23-09-2010 09:04 AM

ده ياباشا بيبقى سببه 3 حجات ياما البطارية نايمة
ياما القواطيش مملحة او محلولة ودى تبان بزلطة تخبط عليها خبطتين علشان يثبتوا كويس وتجرب تدور
ياما فيشة الكونتاك ودى هاتفتح كهربة للعربية والتابلوه ينور لكن متدورش وبتعمل صوت تكه كدة من عند الفيشة موش من المارش
ولو عاوز احجة سهلة نور النور الصغير وبص على لمبات التابلوه وحاول تدور لو لقيت النور بيموت تبقى بطارية او قواطيش والفيشة سليمة