صوت غريب في تكييف اللانوس
أنا عندي مشكلة صغيرة في تكييف اللانوس عاوز آخد رأيكو فيها.
العربية عندي الحمد لله زي الفل بس في مشكلة هايفة في التكييف.
المشكلة إبتدت من آخر الصيف اللي فات و هي إن بعد تشغيل التكييف حوالي نص ساعة لما كان ال آر بي إم يوصل 3000 كان في صوت غريب. جربت أطفي التكييف الصوت راح خالص. الصوت كان كأنه صوت بلية خشنة شوية أو تبخير لحاجة باردة على سطح ساخن. إحنا كنا في آخر الصيف فأنا ماهتمتش و قولت أستنا لأن في الشتاء كان ميعاد تغيير طقم السيور و أنا قلت أغير بلية التكييف بالمرة
المهم غيرت طقم السيور و بلية التكييف و جربت البلية القديمة كان فعلا في خشونة و قلت كدة المشكلة إتحلت.
في الصيف ده لما كنت باشغل التكييف كان نفس الصوت بيظهر و ابتدا يظهر في السلانسيه كمان.
الغريب في الموضوع إن العربية الحمد لله زي الفل و التكييف بيسقع كويس بس الصوت هو اللي قالقني خصوصا إنه مابيظهرش غير بعد تشغيل التكييف بحوالي نص ساعه و في الجو السخن أوي.
لو أي حد يقدر يفيدني في الموضوع ده ياريت يقوللي فين المشكلة.