سؤال لو سمحتو عن يونايتد جروب و صيانة 20000

**SeaShark** · 23-09-2010 07:44 PM

انا خلاص علي وشك اني اعمل صيانة الـ 20000 كم و ده هيكون غالبا خلال الاسبوع الجاي

انا حاسس ان في حاجات كتير عايزة تتظبط و عشان كده كنت بفكر اروح السبع المرة دي بس رجعت في كلامي عشان انا متعود علي يونايتد و عشان كمان السبع زحمة اوي و لازم حجز و كمان سمعت ان الزحمة دي خليت التعامل عندهم مش كويس اوي و بيعاملو العربيات مش كويس زي ما الاستاذ hossam_zaky قال في الموضوع بتاعه عن تجربته الاخيره مع السبع ( http://www.nilemotors.net/Nile/182087-a.html ) و ده غير اللي ممكن يحصل جوا و الناس مش بتشوفو.

انا قررت اروح يونايتد جروب خلاص بس انا مش عارف هيعملوها زي ما انا عايز ولا لا يعني هما بيكشفوا بالكومبيوتر ولا بالبركة انا عايز اظبط الاتي:
1. مراجعة كهرباء العربية و ظبطها
2. ظبط الـ RPM
3. مراجعة الباور (حاسس ان الدركسيون تقيل شوية)
4. عايزهم يبصوا علي الطنابير كويس عشان ساعات و انا علي سرعة لما بدوس فرامل بحس برجة بسيطة اوي في الدركسيون و ده غالبا ممكن يكون بسبب تأكل غير منتظم في الطنابير.

ده طبعا بالاضافة للصيانة الدورية بءي زي:

5. تغيير الزيت و الفلتر
6. تربيط العفشة.
7. مراجعة مستوي جميع الزيوت و مياه الريدياتير.
8. الكشف علي تيل الفرامل.
9. تنظيف فلاتر.
10. الكشف علي حالة البوجيهات (اعتقد لسة شويه عليها طبعا).

المشكلة انهم بيسيبوا الفني يشتغل لوحده و انا مش عارف بءي ده بيعمل ايه و لا عايز يقلب و يخلص و بيمنعوا الناس تدخل الورشة انا بكون باصص من بعيد بس مش عارف ايه اللي بيحصل و ساعات اخليهم يدخلوني لو هبص علي حاجة معينة مثلا و اخرج تاني.

مش عارف بءي يونايتد جروب هيرفعوا راسي في الكلام ده و لا ايه؟

**Bishoy.Girgis** · 23-09-2010 08:27 PM

أولا : بص بقي يا جميل اولا اكتب كل ملاحظاتك علي الكمبيوتر و خلي نسخة معاك و نسخة تدخل مع العربية في الورشة و الزقها علي الزجاج
تاني حاجه حضرتك لازم تعرض مشاكلك بطريقة تانية خالص لأن كده انت بتقولهم راجعوا علي كذا و كذا و بصوا علي الطنابير و راجعوا مستوي الزيت و طبعا كل ده مينفعش لأن بكلامك بالطريقة ديه هتدفع فلوس زيادة ثمن ادخالها علي الكمبيوتر مثلا بحوالي 30 جنيه او 60 مش فاكر اوي
فعشان كده اعرض مشاكلك بطريقة انهم هيستخدموا طريقة مراجعتك للحاجات ديه كلها و هي كالآتي علشان تدخل عليهم صح :

1- العربية بتكركر مع اني بحط 92 و كمان الار بي ام مش زي عربيات اصحابي في القراءة.
2- الدريكسيون تقيل جدا في الحركة.
3- رجرجة غير عادية في العربية و خاصة الدريكسيون لما بدوس فرامل .

أطلب تقرير بكل حاجه حصلت في العربية بعد خروجها من الصيانة .

و أتأكد ان صيانة الـ 20000 هيتعمل فيها كل حاجه من غير متقولهم انت عايز بالظبط عشان متزودش حاجات علي الفاتورة انت في غني عنها
و اي خدمة

**SeaShark** · 23-09-2010 08:39 PM

شكرا يا باشا علي ردك
طبعا انا لازم هيكون معايا ورقة فيها كل الملاحظات.

و كلامك فعلا صح في طريقة عرض المشكلة.

بس ايه موضوع التقرير ده اول مرة اسمع عنه؟

**Bishoy.Girgis** · 23-09-2010 10:09 PM

حضرتك من حقك انك تطلب تقرير وافي عن كل حاجه حصلت في العربية في الصيانة عشان تعرف اللي حصل فيها بالظبط
و ياريت حضرتك بعد ما تستلم العربية تاخدها لفة محترمة بره التوكيل و تتاكد ان كل اللي انت طلبته اتعمل علي اكمل وجه عشان لو في حاجه تبقي انت هناك طبيعي .. عشان كده برجحلك تروح الصبح بدري
و علي فكرة انا شخصيا هستني تقريرك عن 20000 عشان انا داخل علي الصيانة قريب جدا
و اي خدمة

**Ahmed.TV** · 24-09-2010 10:35 PM

معروف من زمان جدا انك ممكن تطلب تاخد تقرير بوضع وحالة العربية واللى اتعمل فيها عادى بس دى ليه حساب خاص وبسيط

المهم
تجربة استاذ حسان زكى ذكر فيها مواقف عن سلبيات حصلت معاه وممكن متحصلش مع غيره
وغير كدا السلبيات اللى حصلت عنده مش سلبيات فى الشغل الميكانيكى وده طبعا الاهم
والشغل اللى اتعمل معاه اتعمل معاه على اكمل وجه وبدليل انه قال انا رايح تانى باذن الله عندهم بردوا , وده ذكره فى تقريره
ومحدش قال قبل كدا انهم بيطلسقوا الشغل ابدا قبل كدا او حد استكى انهم ماشوفوش شغلهم صح الا نادرا وبردوا لما بيعرفوا
ان عميل اشتكى من سوء خدمة ميكانيكية عندهم او حاجة تانية بيعتذروا وبيتداركوا الامر وبيراضوه
انا مش عاوز احكى كتير عن السبع عشان محدش يقول اننا بنتحازى لحد فى الكلام
لكن انا بتكلم من واقع تجارب الناس هنا بحكم التقارير اللى بنطلبها منكم عشان نستفاد من التجارب بتعتكم وقت الصيانات
واذا كنت بتتعامل مع يونايتد ومرتاح معاهم كمل
واذا عاوز تجرب السبع روح واعتقد مش حيقصروا معاك
وطبيعى ان اى مركز خدمة محترم يكون فيه حجز قبلها عشان كل واحد يدخل بوقت وبدوره
وبعدين ما استاذ حسام قال بردوا ان يونايتد لما بيكون فى زحمة الدنيا مش بتمشى كويس
اذا كنت جربت يونايتد ومحدش قصر معاك كمل زى ما قولتلك
واذا كنت عاوز تجرب مكان جديد عشان يكون عندك كذا مكان بتتعامل معاه عشان لو لقدر الله اتخنقت من اى مكان يبقا جرب السبع
عشان يكون فى حوزتك كذا مكان اتعملت معاه
وربنا يوفقك وكل صياناتك تتحل على خير وتتعمل على اكمل وجه يا استاذ محمد
ولو احتجت اى حاجة احنا فى الخدمة
وربنا يوفقك

**Ahmed.TV** · 24-09-2010 11:38 PM

العفو على ايه يا محمد باشا كلنا قلبنا على قلوب بعض
وكلنا اسرة واحدة هدفها المصلحة العامة للكل

بس انا كنت عاوز اقولك على حاجة
معتقدش وصعب انهم حيخلوك تروح تقف جنب العربية وهى بتتعمل
اقولك على حاجة كويسة
بص
لو انت عارف حد هناك واتعملت معاه فى كل مرة بتروح فيها كلمه واحكيله شوف حيقولك ايه على الكلام ده
او عدى عليهم من باب الدردشة وانك كنت معدى فحبيت تحجز معاد للصيانة وكدا
واسال اى مهندس على اللى نفسك تعمله مثلا وانك عاوز كل حاجة من دى او المشاكل اللى عندك تتعمل
وانك عاوز تجرب العربية مع المهندس كمان اللى بيجربها بعد الصيانة وتشيك على حاجة حاجة من اللى بتشتكى منها
وشوف التعامل والرد اخباره ايه
وقولهم انا عاوز تقولولى على معاد يكون المركز رايق فيه عشان تكون منتبهين اكتر وميكنش فى زحمة
وظبط امورك
وربنا يكرمك باذن الله
وتحت امرك فى اى خدمة وربنا يوفقك