divano ممتاز
العفش شيك جدا... يمكن عشان انا بحب المودرن اصلا بس بشكل عام انا مشوفتش عندهم اى موديل وحش او شكلة
الاسعار معقولة جدا مقارنة باستقبال (و فى رواية اخرى استهبال)... السفرة هناك ب 7 و شوية... نفس السفرة فى استهبال ب 16 الف... النوم ب8 و جبت مكتبة ب 2000... الانتريهات مكلفة الصراحة و دى الحاجة الوحيدة اللى فصلتها... محلات living mix و in & out ملاقيش فيها حاجة تشدنى و الاسعار اغلى من استقبال
الناس معاملتها فوق الممتازة... فرع النزهة ماسكة واحد اسمة هيثم و ياعينى الراجل طلعت عينة اسئلة فى زيارتين للمحل و بعد كدة اتكعبلت فيه فى معرض اثاث و استلمتة للمرة التالتة و رابع مرة دفعت مقدم و خامس مرة غيرت حاجات فى الحاجة اللى حشتريها.... مفيش مرة من دول حسيت ان الراجل اتخنق بالعكس... حسيت انة مبسوط و انا بعصرة اسئلة و استفسارات... و بعد ما اشتريت بسنة كلمتة اسالة ان كان عندهم جزامات قالى معنهمش ووصفلى واحد فى مصر الجديدة عندة جزامات
لما اشتريت كان عاجبنى غرفة نوم بس مش عاجنى الكومودينو... و كان فيه غرفة تانية مش حلوة اوى بس الكومودينو حلو جدا... قلت ارخم على الراجل و اشوف لو ينفع اخد السرير و الدولاب من الاوضة فقط و اخد الكومودينو بتاع الغرفة التانية قاللى ينفع و ضبط الدنيا
فى الدفع ممكن تقسط طول ما البضاعة فى مخازنهم... انا دفعت على 4 شهور لحد ما جة ميعاد الاستلام لازم اكون مسدد كامل مبلغ الفاتورة... الراجل اساسا هو اللى اقترح عليا القصة دى عشان تسهيل عملية الدفع و كمان قاللى طالما مش حتركب الحاجة فورا يبقى ملهاش لزمة تخلليها فى البيت على الفاضى ممكن حاجة تتكسر او تتلف بدون داعى (و برضة منها ضمانة مقابل باقى الفلوس اللى لازم اسددها بالنسبة ليه)
موعد التسليم و التركيب كان مضبوط تمام... جة 6 انفار حسب ما افتكر و ركبوا غرفة النوم و السفرة و المكتبة فى ساعة و نص تقريبا و شغلهم منظم و سريع...
انا كنت سالت على الضمان و هيثم قاللى انه مدى الحياه... طبعا حسيت انة بيشتغلنى... بعد 6 شهور اتكسر جزء زجاج من درج الكومودينو (عيب استخدام مش صناعة)... كلمت الزبون و قولتلة اللى حصل بالتفصيل قاللى هات الدرج... وديتهولة و تابعتة فى التليفون و بعد ما خلص قولتلة "حسابك كام؟"... قاللى "هو انت شارى من عندنا عشان نقولك ادفع فلوس تانى... خلاص يا باشا الحساب وصل"... انا مشوفتش معاملة محترمة كدة قبل كدة
لما سالت عن سبب رخص معروضاتهم عن استقبال قال ان استقبال شارى اسم استقبالو بالتالى بيحمل الزبون تمن الاسم دة... ديفانو بيبيع تحت اسمة هو بالتالى التكلفة الزيادة دى مش موجودة
هما بيجيبوا العفش من تركيا... تحديدا من الشركة دى:
Gala Mobilya | Ana Sayfa
MMamdouh