الموضوع: هتشارك ولا هتقاطع ؟؟

إحنا داخلين اليومين دول على أيام $#%$# ما يعلم بيها إلا ربنا

والسبب انتخابات مجلس الشعب ، أو بمعنى أصح .. "حرب مجلس الشعب"

واختلفت الأحزاب والقوى السياسية .. فمنهم من يرى أن المقاطعة هي الحل ، ومنهم من يرى وجوب المشاركة !

فهل أنت مع المشاركة أم المقاطعة ؟

رجاء حار .. يرجى الالتزام بآداب الحوار ، وعدم التعصب أو الإساءة لأي فئة ، وفي البداية والنهاية نحن أخوة في الدين والوطن ، واختلاف الرأي لا يفسد للود قضية

أحب أشارككم برأيي

أنا في البداية كنت مع قرار المقاطعة للانتخابات ، لأن دي معدتش انتخابات بعد إلغاء الإشراف القضائي

يعني أصبحت مجرد مسرحية تديرها الحكومة ، لكن ليس لها أي جدوى أو معنى

وتقريباً كانت جبهة القوى الوطنية اتفقت جميعها على مقاطعة الانتخابات بما فيهم حزب الوفد والإخوان

وفوجئنا من عدة شهور بحملة تلميع في صفوف حزب الوفد ، كل يوم خبر في جريدة "الأهرام" عن توقيع شخصية عامة لحزب الوفد

أنا ساعتها حسيت إن الموضوع مش طبيعي ؟؟!!

حزب الوفد مسمعناش عنه من أيام الملك .. وفجأة وبدون أي مقدمات نلاقي أخباره في جريدة الحزب الحاكم

ولم تدم حيرتي طويلاً .. لنجد بعدها بفترة أن حزب الوفد قرر المشاركة في انتخابات مجلس الشعب بكامل قوته

كده الحكاية بانت ، الحكومة عايزة معارضة صورية ، وتعمل انتخابات يبقى فيها حزبين ، ويتصوروا شوية صور ، ويقسموا الكعكة ، ويبقى شكلنا زي الفل قدام العالم

بعد قرار حزب الوفد .. حصل انقسام بين صفوف جبهة القوى الوطنية

الإخوان هيشاركوا في الانتخابات .. حزب التجمع هيشارك ببعض الأعضاء .. البرادعي يدعوا إلى المقاطعة

وبالتالي أنا رأيي اختلف تماماً دلوقتي

أنا دلوقي مع المشاركة .. ليه ؟؟

مش بغرض الفوز بكراسي أو كده .. لأ بغرض فضح النظام ، يعني لما كل الناس تروح وتنتخب الشخص الي شايفينوه مناسب ، وتيجي بعد كده تلاقي مرشح الحزب هوا الي فاز !! يبقى كده الناس كله شافت الفساد عيني عينك وحصلها ضرر منه ، وبالتالي أكون قدرت أنشر فساد الحكومة

أما لو قررنا المقاطعة في الوقت الحالي .. فالسيناريو هيكون كالتالي :

انتخابات هادئة .. ناخبين سعداء (بالعشرين جنيه) .. فيه حزب أغلبية ، وحزب معارضة (الوفد) .. وتطلع النتيجة في الآخر حزب الوطني 95 % والوفد 5 %

ويطلع المسئول الهمام يشيد بالانتخابات المصرية وجو الديموقراطية الفظييع الي كان فيها ، وتبقى كده الحكومة كسبت نقطة ، مش نقطة واحد بل نقاااط كثيرة

آسف للإطالة ومنتظر آراء حضرتكم