الحمد لله - النجاة من الاشتغالة باعجوبة !!!!!!!!!!!

**cayman69300** · 28-09-2010 01:44 AM

كنت راجع بالعربية من المنيا قبل العيد - و انا ماشى على الصحراوى على 160 كم / س لقيت فى وشى عربية نقل بتطلع من عربية نقل تانية و طبعا لقيت الطريق بقى ضيق جدا
رحت رامى نفسى على اليمين ( مش قوى ) و كان فى حتة حجر فى غايو من الجمال ( اد كورة القدم الصغيرة )
المهم بعد ما كلت الحجر بالف هنا و شفا رحت واقف و بصيت على الكاوتش و الحمد لله كلة كان تمام و العربية فى المشى زى الفل
و لما وصلت لقيت شفة الجنط متنية شوية - و الطبيعى روحت عند بتاع الكاوتش فور الفردة و حطينا الجنط على المكبس و استعدلناه و رجع زى الاول
بعد كدة روحت لبتاع العفشة ( اساس الاشتغالة ) كنت بقولة على العربية حاسس انها مش مظبوطة و طبعا بدا افتكاسات و قالى احنا لازم نفك العربية من قدام و نفك الاسكاترة و نقل البوش اللى فيها
بصراحة كسلت و قلت اكشف عليها بس و زى ما اتفقت مع طنانى انى اشوف العربية عايز اية و اسافر القاهرة اظبط اللى فيها
و بعيدين قولت فى سرى اروح اشوف واحد تانى بتاع عفشة و دة ابن حلال فعلا
بص على العربية و قالى العربية زى الفل و مفيهاش اى حاجة و الاسكاترة كدة ممتازة - و راح واقف و حرك الدركسيون بسيط جدا و لقى العجلة الشمال و هو باصص عليها بتتحرك معاه و هنا راح قايلى الاسكاترة مفيهاش الهوا و لا بوش و لا دياولوا
و رجعت معاه الورشة و ربط العربية و العربية طلعت زى الفل الحمد لله
عارف انى طولت عليكم بس الصنايعية بقيوا معندهم ضمير و لا ذمة و لا اخلاق و لا اى حاجة فى الدنيا
التكاليف
استعدال الجنط 15 جنية
فك و تركب و نيتروجين 5 جنية
تربيط العفشة 10 جنية
الاجمالى 30 جنية و شكرا على كدة

**فادى محمد** · 28-09-2010 01:47 AM

الحمد لله علي قد كده وسلامتك بالدنيا يا دكتور ..

**mexmarine** · 28-09-2010 03:09 AM

اهم حاجه حمدلله عالسلامه يا دكتور و بالنسبه للصنايعيه فيهم الكويس زى الراجل التانى و فيهم السيئ و دووول كتيييير قوى

**lancerevolution** · 28-09-2010 07:51 AM

حمدلله على سلامتك
و بطل جرى شوية

**tam77** · 28-09-2010 08:09 AM

للأسف هنفضل متأخرين طول مفيش ضمير

حمد الله على السلامة

**kar!m** · 28-09-2010 08:15 AM

و الله يا دكتور فى ناس معندهاش ضمير .. مش عارف الناس دى مش عارفه ان فى حساب ولا ايه.

أنا من خمس سنين كده كان معايا عربية سوزوكى .. رحت اضبط زوايا و أرصص .. المهم رحت بنزينة شل اللى فى المعادى .. الواد اللى هناك قال لى انت عندك جنط معووج عاوز يتعدل .. بس عدل الجنط ده عندى أنا مش هتحاسب عليه البنزينة .. هتحاسبنى انا عليه .. المهم قلت له ماشى و فاكر انه ساعتها خد مبلغ كبير بالنسبه لاستعدال جنط.

المهم وانا بحاسب فى البنزينه .. لقيت عربية تانيه داخله و الواد بيقول لصاحبه " انت عندك جنط معووج عاوز يتعدل .. بس عدل الجنط ده عندى أنا مش هتحاسب عليه البنزينة .. هتحاسبنى انا عليه" نفس الكلام بالضبط

قلت يابن الايه .. دى حركه بأه عشان يطلع له مصلحه ..

الواحد مبيتعلمش ببلاش.