الموضوع: حل بسيط لقاعده المرايا

السلام عليكم ورحمة الله وبركاته

لقيت ان فى اعضاء كتير بتحاول تشوف حل لمشكله قاعده المرايا لما تتكسر
وبالصدفه من يومين واحد ابن حلال طيرلى المرايا وكسر القاعده وستر ربنا ان الزجاج كان مفتوح والا كان طار فى وشى
المهم لفيت لفتى كده وعرفت الاسعار
جديده اصليه انا مسالتش عليها بس متاكد انها مش هاتقل عن 1200ج وده حل مستبعد بالنسبالى
واستيراد فى حدود 300ج
وخلع تامين فى حدود 250ج
وجديده فى حدود 100ج وده كمان حل مستبعد بالنسبالى

مسكت المرايا وقلبت فيها كويس وانا على درايا ان القاعده بتكون زهر او انتيمونيا واستحاله لحامها فوجئت ان القاعده بالمثلث عباره عن فايبر مقوى ويمكن اعاده لحامها
بس فى نفس الوقت نوع الفايبر بتاعها مش زى نوع الفايبر بتاع الاكصدامات وبالتالى بتاع الفايبر مش هايفيدنى

وبعد بحث دام يومان والعمل بمقوله مافيش حاجه مستحيله واللى بيتعب يلاقى
ربنا كرمنى وقدرت اوصل لمحل فى المنيل صاحب المحل راجل كبير فوق ال50 سنه ومحل صغير وقديم الراجل ده فاتح المحل الصغير ده علشان تصليح المرايات فقط وممكن تلاقى عنده قاعده موجوده وجاهزه تشتريها لوحدها او يصلحلك مرايتك وكمان عنده الفارغات بتاعت اى مرايه

اتفقت معاه على تصليح المرايا بتاعتى بتكلفت 120ج على شرط انى ماقدرش اطلع فيها اى عيب بعد التصليح وميعادى معاه النهارده

انا صورت المرايا قبل ومستنى اصورها بعد علشان ارفع الصور

والراجل ده مكانه فى شارع المنيل الرئيسى بعد ماكدونالدز على اليمين بحوالى 150 متر واسمه مجدى