الشنطة الصيني و عم محمود و بلدنا

**Ahmed Anwer** · 19-03-2008 12:12 AM

ليا تجارب سخيفة اوي مع شنط اللاب توب

دايما اجيب الشنطة الصيني ام خمسين جنية

و متقعدش اسبوع و اليد تتقطع و السوستة تتفك و متنفعش كيس خضار

و اطلع علي عم محمود الراجل الطيب يضبطلي السوستة و يخيطلي اليد بمنتهي النضافة انضف من الصيني

و ياخد تلاتة جنيه

اللي مابعتبرهمش فلوس في الزمن ده مقابل فنه و مجهوده و وقته و حرفيته

و يدوب عايش و مش عارف ازاي بيلاحق علي المصاريف و الإيجار

و اخاف اقله زي الإعلان فوترني

مش عارف ليه بلدنا متبقاش زي البلاد دي ايه اللي عندهم زايد عننا

انا عارف انها حاجات كتير بس برده

انا مش عايز نعمل مصانع عربيات و لا مصانع الكترونيات

ليه الصناعات البسيطة زي دي مالهاش وجود في مصر

رغم اننا الأنسب ليها ،، يد عاملة ،، موقع متوسط ،، موارد طبيعية و فوق كل ده ذكاء و حرفية فطرية

كان ليا حظ اني ازور الصين

و هاوريك صور و تفاصيل مصنع بيعمل الإكسسوارات بتاعت الآثاث و المقابض و حاجات زي كده

االمصنع البسيط ده بيصدر ل 25 دولة

http://www.leaves-hardware.com/en/index.aspx

ده الويب سايت و لو شفتوه و شفتو الكاتلوج الفخم بتاعه و اجنحته في المعارض

هتقولوا ده مصنع عظيم من الاف الأفدنة

صورة المصنع من الخارج

و زي مانتزا شايفين هوا مش مصنع و لا حاجة ده يدوب ورشة دورين ،،

و الصناعات دي في الصين مالهاش مناطق صناعية ،،

دي بتبقي وسط البيوت

و العمال ييجوا بالعجل ،،

شوفتم التفكير العملي ،،

مش منطقة صناعية و اتوبيسات و مشالات و انتقالات ،، و المصانع جنب بعضها تكمل بعض

ده يعمل بلاستيك و ده حتة حديد و ده الأخير زي اللي بتكلم عليه يجمع

و هتشوفوا امكانيتها متزدش عن اي ورشة حدادة بس الدماغ

مكنة الحقن اجمد مكنة عنده و واضح انها من ايام الهكسوس بس بتشتغل

مكن معفن و واضح انه مش مكن بلدي ده مكن الراجل عامله علي ايده

خطوط الإنتاج بالروبوت

أحدث ماكينات التشكيل و اللحام علي فارمة ههههه

**Ahmed Anwer** · 19-03-2008 12:13 AM

التلميع بأحدث ماكينات الجلخ مع أقصي درجات الأمن الصناعي باجرايد

ثم خطوط التعبئة و التغليف المتطورة

مجلس ادارة المصنع

الاف او ملايين الورش زي دي

بيعملولها معارض فظيعة كل سنةو المستوردين من كل انحاء العالم بيتهافتوا عليها
و الكلام بالكونترنات مفيش بالحتة
ارض المعارض

**Ahmed Anwer** · 19-03-2008 12:14 AM

و الاف البسطاء الشغاليين زي دول بيبنوا الحضارة و الرخاء

و ترتفع ناطحات السحاب و تتحق المعجزات

ناطحات السحاب

علي فكرة دي بلد صغيرة في الصين حاجة كده زي بني سويف عندنا يعني مش مدينة جامدة زي شنغهاي و لا بكين

و يا عيني عليك يا مصر

بانتظار تعليقاتكم و خاصة الأخوة المهندسين بالمنتدي

**ابوشريف** · 19-03-2008 12:32 AM

موضوع قيم جدا احييك عليه أ احمد

احنا محتاجين موضوعات زى دى كتير توضح الصوره لينا وتحثنا على التحول من الاستهلاك الى الانتاج

بس انا عايز اعرف انت جبت الصور الاستخباراتيه دى ازاى

**Ahmed Anwer** · 19-03-2008 12:37 AM

المشاركة الأصلية كتبت بواسطة ابوشريف

بس انا عايز اعرف انت جبت الصور الاستخباراتيه دى ازاى

أنا اللي مصورها حضرتك

أنا تاني واحد من اليمين في الصورة دي ،،،

و اول واحد من الشمال ده الباشا صاحب المصنع

**Karim_Monir** · 19-03-2008 11:12 AM

المهم وصلك منتج كويس متغلف وشيك ورخيص
احنا فين
بلاش اقول احنا فين كلنا عارفين

**Abo_Lina** · 20-03-2008 05:19 PM

بص التركيز الي في وجوه الناس..يعني انتا نازل تصوير و مع ذلك ولا واحد فيهم رفع عينه من على شغله..

انما لو في مصر هاتلاقي اسطى عويس قاعد مش طايق نفسه و في بقه
سيجارة..و في ايد اليمين سيجارة و في ايده الشمال سيجارة..واول ما ياخد باله ان فيه كاميرا هايبدأ يبتسم ابتسامة بلهاء..وبعدين يصهلل ويبدأ يعمل باي باي للكاميرا..و طز في الشغل
طبعا وهو بيضحك السيجارة هاتقع من بقه..تولع في المصنع بالي فيه..صاحب المصنع هايقفله وياخد فلوسه ع الصين يفتح بيهم مشروع.. و عويس يرجع يقعد جنب والدته تاني..
على فكرة مش بعيد عويس يكون بيقعد ع القهوة بالليل يشيش هو و اصحابه ويتريق ع الصين و الصينيين و الصناعة الصينية..

العبرة من قصة عويس صاحبنا الجميل ده ان الفرق مش كبير..بس هما بيركزو و واخدين حياتهم جد و عايزين يبقو حاجة وبيحاولو

**Ahmed Anwer** · 20-03-2008 08:06 PM

المشاركة الأصلية كتبت بواسطة Tyler_Durden

بص التركيز الي في وجوه الناس..يعني انتا نازل تصوير و مع ذلك ولا واحد فيهم رفع عينه من على شغله..

انما لو في مصر هاتلاقي اسطى عويس قاعد مش طايق نفسه و في بقه
سيجارة..و في ايد اليمين سيجارة و في ايده الشمال سيجارة..واول ما ياخد باله ان فيه كاميرا هايبدأ يبتسم ابتسامة بلهاء..وبعدين يصهلل ويبدأ يعمل باي باي للكاميرا..و طز في الشغل
طبعا وهو بيضحك السيجارة هاتقع من بقه..تولع في المصنع بالي فيه..صاحب المصنع هايقفله وياخد فلوسه ع الصين يفتح بيهم مشروع.. و عويس يرجع يقعد جنب والدته تاني..
على فكرة مش بعيد عويس يكون بيقعد ع القهوة بالليل يشيش هو و اصحابه ويتريق ع الصين و الصينيين و الصناعة الصينية..

العبرة من قصة عويس صاحبنا الجميل ده ان الفرق مش كبير..بس هما بيركزو و واخدين حياتهم جد و عايزين يبقو حاجة وبيحاولو

معاك حق فعلآ

الناس كانوا عاملين زي المكن

بس كل مشكلة و ليها حل

أنا لو فتحت مصنع زي ده هاعمله بالإنتاج ،، بالقطعة ،،،

و خلاص ،،،، هتلاقي المصري زي الصيني ،،

و خلي بالك المنظومة نفسها سليمة ،،

يعني متقسمة صح كل عامل واقف بيعمل خطوة معينة مش زي عندنا لو دخلت ورشة ،، تلاقي العامل فرقع لوز بيعمل كل حاجة