ال128 بتوصل ل140 و ساعات 150 لكن بصعوبة شوية لو قديمة, هى بتوصل لحد 120 دائما بسهولة بالغة بعد كده بيبقى فيه اختناقات اعتيادية.
على فكرة هى ثابتة جدا على السرعات العالية بس فراملها ضعيفة, حاول متجريش قدر الامكان, ده مش فى ال128 بس, فى اى عربية السرعة خطيرة حتى لو كانت مرسيدس.
يعنى السبب الرئيسى اسطوانة الدبرياج فى رأيى, و ديه هتلاحظها من الأتى :
- فى المطالع, هل بتحس العربية طبيعية و ناعمة و لا بتعانى؟
- لما بتنقل العربية ناعمة و لا فيها صدمات؟
- لما تطلع بالعربية هل بيحصل رجرجة؟
لو غيرت الاسطوانة هتفرق معاك جامد فى السحب, على افتراض انو حالة الموتور كويسة.
بالنسبة للحرارة, ال128 عمرها ما بتسخن صيف و لا شتاء الا لو فيها حاجة, زى ما الزملاء الأعزاء قالولك.
اكشف على المياه, هل فيها تسريب؟
معدل فقد المياه الطبيعى نتيجة للتبخير يعادل "فنجان مياه" كل شهر أو شهرين, أكتر من كده يبقى فيه تسريب.
غالبا نصف مشاكل التبريد فى ال128 بتكون بسبب المروحة, حاول تتابع عملها, المفروض تشتغل عند حرارة معينة (80-85) فتابعها مع الأمبير, و ممكن تعملها لمبة عند اى كهربائى تنور مع عمل المروحة, لو المروحة مش شغالة يبقى شوف الكلاكس, لو مش شغال هو كمان يبقى المشكلة فى الفيوزات(علبة الفيوزات هتلاقيها على الشمال تحت الدركسيون).
لو مش شغالة لسبب أخر, يبقى اما الثرموستات, أو موتور المروحة نفسه, افترض الثرموستات أولا و غيره.
المفضلات