الموضوع: عايز أشترى سيارة عائلية 7 راكب وبافكر فى 307 sw

ازيك يا باشا انت عامل ايه ؟؟؟؟

اخبار 206 cc ايه انا قريت فى اخر مشاركة انك شفتها و كانت ضيقة حبتين من ورا ،،،، ربنا يوفك و تلاقى عربية احلامك ان شاء الله


أنا قصدى انه عنده عربية دلوقتى معاه ،، يجيب معاها عربية زى تيدا او هوندا سيتى و بعد شوية يحدث التانية بنوع زيرو برده فى حدود 100 برده

يعنى فى خلال فترة يكون معاه عربيتين كل واحده 100 و كلهم زيرو

علشان الراجل برده مش حمل مصاريف صيانة ،،، المستعمل كده و لا كده هيصرف شوية

الزيرو هيكون 3 سنين فى الضمان و الصيانة فى الحنين و ربينا يكفيه شر الطريق


و أنا شخصيا بحب يكون فى العيلة الكبيرة أكثر من عربية ،،، علشان بتنفع كتير و بتلم كتييير فى السفر و كلام منده

و برده عربيتين يريحوا بعض شوية


،،،، المهم انت اخبار حوار العربيات بتاعك ايه دلوقتى

المشاركة الأصلية كتبت بواسطة walidsamy71

أنا بس عندى كام سؤال للأخ shifou أو لباقى أخوانا المجربين :

1- فى حالة وجود الكراسى 6 و 7 طبعا مفيش مساحة للتخزين على الإطلاق وغالبا ده هيحصل معايا وانا مسافر فهل كل العربيات فيها ال 2 راك اللى على السقف وهل بيركب عليهم شبكة أو حاجة ، أو بمعنى آخر فى حل للموضوع ده وهو هيكون أثناء السفر فقط اللى مش كتير أوى؟؟

فعلاً كل العربيات فيها ال 2 راك وبيركب عليهم بارات بالعرض وحمولتها بتكون مش أكتر من 100 كجم.

المشاركة الأصلية كتبت بواسطة walidsamy71

2- هل لما آجى أدور على عربية أركز فى كونها وكيل ولا خليجى ولا دى مش نقطة حاكمة ؟؟

الخليجي غالباً بتكون مواصفاتها أعلى، وهي اللي هتلاقي فيها كل الكماليات، وطبعاً مش هتفرق في الصيانة لأنها هتكون عدت فترة الضمان.

المشاركة الأصلية كتبت بواسطة walidsamy71

3- هل الموديل البانوراما أعلى فئة ده يوجد فيه مشاكل متعلقة بكم الكماليات والتكنولوجيا اللى فيه عن باقى الفئات التانية ولا مش فارقة ؟ يعنى انا مبهور بالبانوراما وكماليتها بس هل مشاكلها أكتر من الفئات الأقل ؟؟

سيارتي هي بانوراما مع ملاحظة أن ده مش معناه وجود كل الكماليات فيها وممكن تلاقي موديل بانوراما بدون Cruise Control, Blue Tooth و مشاكلها مش أكتر من الفئات الأقل ولا حاجة، وبصراحة البانوراما وكماليتها تبهر فعلاً.

المشاركة الأصلية كتبت بواسطة walidsamy71

4- أفضل وأرخص مركز خدمة وأكثرهم أمانة فى القاهرة أو الجيزة ؟

الصيانة الدورية بعملها في مركز صيانة معتمد (ميكانيكا وكهرباء) في ميدان السواح بالقاهرة، أو في مركز صيانة أباظة في رشدي بالأسكندرية، لكن ممكن تبدأ موضوع جديد بالمنتدى لعمل قائمة بالمراكز الجيدة.

المشاركة الأصلية كتبت بواسطة walidsamy71

هو فين رقم خمسة ؟؟

المشاركة الأصلية كتبت بواسطة walidsamy71

6- أنا أتمنى إنى ألاقى العربية دى البانوراما أعلى فئة لون أسود وحالتها ممتازة ويكون صاحبها أمين فن وصفه لحالتها وتاريخها معاه ويكون سعرها فى حدود ميزانيتى 90 ألف ؟ تفتكروا أدور فين ؟؟؟ ولو حد عنده ترشيحات لعربيته أو عربية حد يعرفه يبقى كتر خيره ...

عندي إقتراح يفيدك قبل الشراء، مراكز الصيانة بتقدم خدمة كشف إسمها (PDI: Pre Delivery Inspection) ودي الغرض منها فحص السيارة قبل تسليمها للعميل، وسعرها مش غالي (في حدود 200 جنيه) ودي أكيد أحسن من إنك تاخد واحد ميكانيكي معاك، ولكن مش متأكد هل هي للزيرو فقط أم للمستعمل أيضا بس ممكن أسأل وأرد عليك.

المشاركة الأصلية كتبت بواسطة walidsamy71

7- فى حالة لقيت طلبى رقم (6) يبقى اختارها ولا اختار الكيا سيراتو 2010 وعاملة 55000 كم ؟؟

الكيا سيراتو هايلة جداً وأنا بحبها لكن مش هتحقق طلبك في عدد الركاب، كمان موديل2010 وعاملة 55000 كم (مش كتير شوية؟)

المشاركة الأصلية كتبت بواسطة walidsamy71

وانا هاصلى استخارة وأفكر كويس وربنا يجيب الخير إن شاء الله

أفضل شيء تعمله وربنا يوفقك للخير إن شاء الله، ولو محتاج أي مساعدة إحنا دايماً تحت أمرك.

محمود عبد الشافي
سبحانك اللهم وبحمدك ، أشهد أن لا إله إلا أنت أستغفرك وأتوب إليك

ماشاء الله .....

فى الحقيقة لما أضفت الموضوع ده كنت متخيل إن أنا هاطرح فيه تساؤلاتى وحيرتى وفين وفين ... على ما حد يرد عليا ، لكن تعجبت كثيرا من كل هذا الكم من الإهتمام والحرص والتعاون والمساعدة والمبادرة بالنصيحة مع ان كثير من إخوانى الأفاضل اللى ردوا أو بمعنى أصح كلهم ما يعرفونيش ولا أنا اعرفهم لكنهم كلهم اهنموا وردوا وننصحونى بإخلاص ودعولى بالخير ........ هو ده عادى كدة يا جماعة ؟؟ ولا علشان أنا جديد شوية فى موضوع المنتديات ده فلسة مش واخد على كدة ؟؟؟؟
انا تقريبا نسيت موضوع العربية ده !! وكل تركيزى وتفكيرى وخواطرى أثناء قراءة ردود إخوتى الأفاضل هو الإعجاب بالروح الجميلة اللى بتسيطر عليكم ..
وتذكرت حديث الرسول صلى الله عليه وسلم "إن لله عبادا اختصهم بقضاء حوائج الناس ، حببهم فى الخير وحبب الخير إليهم ، أولئك الآمنون من عذاب الله يوم القيامة" جعلنا الله جميعا منهم..

وبارك الله فيكم .....

يعد تفكير مرة ثانية و ثالثة ورابعة

انا احترت ما لقيتش عربية فى حدود 100 ألف ،،، تكفى عيلة كبيرة 7 راكب او ستة راكب

كله عالى

فباءََ عليه أعتقد تغير الإستراتجية هيكون حل احسن ،، سواء

1- جبت عربية عالية فى السعر و إمكانياتها تكفى العدد بتاعك
2- أو تجيب عدد عربيتين واحدة زيروا و التانية مستعملة او الأثنين زيرو

بس إبعد عن المستعمل قدر المستعمل لأن المستعمل كده و لا كده هيصرف و بيكون نصيب و قرف و انت و حظك البطيخك حمراء و لا قرعة انت و نصيبك

و لما تيجى تفكر فى حاجة زيرو فكر فى اليابانى ( مش معنى الكلام ان الباقى وحش و مش كويس ) ميزة اليابانى انه عملى جدا من جميع النواحى ( استهلاك - تقفيل - صيانة - قطع غيار - سحب - موتور - الأهم تكييف ) فى توازن بالنسبة للعيلة الكبيرة

الكورى قشطة عليه و ميه ميه و سوقه فى التمام ( كارنيز انا ارشحها )
الأوربى هيكون موتور اكتر منه وسع ( يعنى عندك 308 سعرها قريب من سعر التويوتا كرورلا فى كل حاجة بس ضيقة عنها شوية فى حين ان التويوتا واسعة قوى من وراء ) بس موتور 308 أستاذ

الموضوع عندك هيكون صعب فى الإختيار بس اللى أقدر اساعدك بيه هو

إنك تحاول توسع الأختيارات و متحصرش نفسك فى حاجة واحدة ،،، يعنى خلى كل الخيارات موجودة و مفتوحة

و كل أختيار هيكون له عيب و ميزة و انت تفاضل بينهم

و نصحيتى فى حالتك ،،،، انك تسأل على التوكيل و قطع الغيار الأول قبل ما تجيب العربية
و تحاول على قد ما تقدر تجيب زيرو ( صيانة بتكون كويسة ) أو كسر زيروا انت واثق فيه 500%
و برده التكييف ما فيش تنازل عنه يعنى يكون من أساسيات العربية لان الحر مع عدد الركاب الكبير بيكون حاجة صعبة قوى و مفيش تنازل عنه

أخي الفاضل

أنا تقريبا في نفس حيرتك وبدور علي سيارة تكون بنفس المواصفات تقريبا
وبعد بحث طويل لمدة أشهر

إنحصرت المقارنة في ثلاث سيارات ( البيجو 307sw , سيتروين بيكاسو أو جراند بيكاسو- وفي واحدة معروضة في كونتاكت تيريو ديزل- , الكيا الكارينز)

وطبعا أكثرهم إنتشارا هي الكارينز

ياريت لو حد من خبراء المنتدي يقارن لنا بين السيارات الثلاثة من جميع النواحي (السعر, وقطع الغيار, الصيانة,.....)

وجزاكم الله خيرا

نصيحة لوجه الله ابعد عن العربية دي البيجو 307 عربية اعطالها كتيير جداااااااااا امان و ثبات و فرامل ملهاش حل تحفه بس اعطالها كتيير جدااا و كما مبتصلحش غير في التوكيل و الاسعار نار كلامي عن تجربة فضلت معايا سنتين ونص عملت بيها 58 الف و بعتها قبل ما الضمان ما يخلص علشان كل العيوب اللي فيها كانت بتتصلح في التوكيل علشان عيوب صناعة و كل و كذا مرة اسئل و المهندس هناك يقول احمد ربنا انك في الضمان لو كنت برة الضمان كانت هتكلفك فلوس كتيير اوي .
علي فكرة موش عربيتي انا بس اللي كانت كدة فيه 3 اصحابي معاهم نفس العربية و كلهم كل واحد ظهر عنده عيب مختلف