30 دقيقة كل يوم ... صدقني مش حتندم ! سميه اكسير الصحة و الشباب لو عايز :)

الـــــــــــــسلام عليكم !

حبيت بس اشارك معاكم تجربة ... بمكن سمعتوها و اتحكى عنها 10000 مرة بس برده التكرار ... للشطار :)


---

انا داخل على 27 سنة ... طولي 178 سم ... و وزني ماشاء الله كان وصل 94 كجم يوم مقابلة الفطار بتاعة المنتدى .. يعني كرش و قاعدة و حتى وشي مليان على طولي و على حجمي .

طبعا انا مكنتش كدة .. ايام الكلية ( 7-8 سنين فاتوا ) كنت تقريبا نفس الطول ولكن وزني لم يتعدي في اي حال من الاحوال 75 كجم !

القعدة طول اليوم لو في البيت او في الشغل ... مفيش اي نوع نهائي من انواع الرياضة .. اكل من برة بنسبة 80% من الاسبوع .. و توصل للي انا وصلتله و اكتر .. , و طبعا لما اشتريت العربية من 5 سنين .... !

حتي يا اخي لما الحمد الله ربنا هداني و بقيت اصلي في المسجد .. المسجد تحت البيت !

و القهوة و سنينيها و الشيشة و بلاويها ..

المهم من فترة غير قليلة .. جالي وجع رهييييييييييييييييب جدا في العمود الفقري ... مش وجع دلع .. وجع مكنتش عارف اقوم من السرير او حتى البس هدومي ..

رحت عملت كشف و X-ray

الراجل الدكتور .. هزاني ... والله هزأني .. و مقدرتش افتح بقى ..

قالي اقسم بالله لو مش شايفك قاعد قدامي الان و ببص على ال Xray بتاعة منطقة الرقبة و الكتف ... لاقول ده واحد عنده لا يقل عن 45 سنة !!!

وكتبلي 6 ادوية تقريبا ! !

طبعا اهلي كانوا فرحانين بيا جدا ... تحولت اصبحت شاب في سن الشيخوخة !

و المشكلة ان الواحد لم يتعظ .. و اول مابقيت كويس ... نسيت الموضوع تماما !

طب اعمل ايه :)

--

المهم .. اتكشفت على حقيقتي من اسبوع .. عندما طلب بعض الاصدقاء اننا نروح نلعب كورة في النادي الي بدخله مرة واحدة كل سنة علشان اجدد الكارنيه بس .( النادي الاهلي في مدينة نصر ).

رحنا ... وكانت الفضيحة ... ( انا كنت لعيب كورة بس من زمان اوي يعني ... 15 سنة فاتت ولا حاجة )

نزلت بقى متوقع اني ابهدل الدنية ... وفعلا بهدلت الدنية .. بعد 10 دقائق جري ... وقعت على الارض .. مغما عليا تماما ....

حتقولوا مش واكل ؟؟؟ لا واكل و فاطر و متغدي ..

المهم بعد مالاصدقاء فوقوني .. لقيت نفسي شبه معدوم !

و اصدقائي حتى الاكبر مني ( بس معظمهم رياضين او بيمارسوا هواية فيزيائية :) )
بيجروا .. رايح جاي و تنطيط و ضرب و هتك يا لعب ...

وانا الاصغر سنا . قاعد على العارضة بتاعة الجون .. بتفرج ... و بشجع ...

ساعتها بس ... كنت حنفجر .... كرهت نفسي !

ليه اعمل كدة ؟؟؟؟ انا عندي 26 سنة ولا 27 .. ومش قادر اجري مع ناس عندها 35 و مخلفة و مبتهدلة !

طبعا لعبت تاني ... 15 دقيقة .. ,ونفسي انقطع ..

من ساعتها حلفت بكل حاجة في حياتي ... اني يوميا حروح النادي اجري او امشي في التراك 30 دقيقة على الاقل ....

الكلام ده كون يوم الخميس الي فات ...

يعني انهاردة انا تميت اسبوع .. والحمد الله كدة كملت6 ايام متواصلة ... 30 - 45 دقيقة كل يوم مابين مشي او جري خفيف حولين تراك النادي ....

طبعا مش حقول حصل معجزة ! وخسيت 30 كجم ! اتصل الان 19999 شركة البطة المرتاحة للياقة و السباحة !

بس يكفيني اني لعبت كورة تاني امبارح ... لمدة 45 دقيقة كاملة دون ان اسقط ... دون ان اغمي عليا ...
طبعا 45 دقيقة و نفسي انقطع بعدها ..

بس تعالوا نحسبها ...

اثار جلوس بدون رياضة من سنة 2000 الى 2010 = 10 سنوات
اثار تدخين شيشة من نفس المدة = 10 سنوات
اثار جلوس امام الكومبيوتر ان كان عمل او دراسة او ترفيه = 10 سنوات
اثار نوم اقل او يساوي 5 ساعات يوميا = 10 سنوات
اثار اكل زبالة من الشارع بمعدل 5 ايام في الاسبوع لمدة = 10 سنوات ...

كل الاثار دي .... الي خلتني راجل عجوز ... ب6 ايام مشي فقط .. اتغلبت على 50% منها !!!
بدون دايت بدون حتى تبطيل الشيشة ( لو اني بفكر ابطل )


حتقولي انا كدة كدة مش فارق معايا رياضة و مش حلعب كورة .. حقولك سيبك من الكورة !

بقيت اصحى الصبح ... مبسوط !!! ايوا مبسوط !

حاسس اني فايق ... عايز افطر .. عايز اروح الشغل او المشوار الي انا رايحه .. مش متضايق وقرفان و بسب في الدنيا ... و بسب في الشغل و رايح متاخر و بشتم الناس في الشارع و وسع يابني !

بلاش !!

على الاقل لما بجري او بمشي كل يوم 45 دقيقة ... بستحرم اروح اكل برة بعدها ... بستحرم اروح اشيش حتى .. اقول لأ خلينا نضاف انهاردة ... بروح البيت طبعا تعبان شوية .. النتيجة ان الساعة 11 بتيجي ببقى بسقط خلاص ... بقيت انام الساعة 12 بالكتير بدل من الساعة 3 يوميا !


بلاش !!

شفت النادي ! اتعرفت على ناس جديدة .. شميت هواء نضيف .... غيرت جو !


بلاش دي !!

طول الاسبوع ده المدام كانت معايا بتمشي هي كمان .. اي نعم هي الحمد الله لا تعاني من اي اثار او مشاكل مثلي و لكنها بتهوى المشي عامة ...

45 دقيقة يوميا بنتكلم و احنا بنمشي مع بعض ... حاجة مكناش بنعملها الا واحنا قاعديت ادام التلفزيون او خارجين ... على الاقل سيبك من الرياضة .. بس فتحت باب حوار معاها يوميا 45 دقيقة !


كلللللللللللللللللللل الفوائد دي من 30 دقيقة مشي فقط في 6 ايام ..

ومش لازم النادي يعني للي حيتحجج .. لو جنبك جنينة ... حتى فاضية ... خرابة ... شارع واسع او طريق سفر مثلا ... !

جرب .. مش حتندم .. حتقولي ياعم انت معاك المدام مشجعاك !

خد صاحبك ! اخوك ! قريببك ! زميلك ! ز ميلتك ! خطيبتك ! والدتك والدك !

بلاش ! خد موبايلك ... اي بوداك ... اي فوناك ... اي زوقاك يا اخي !

خد اي حاجة .. وجرب ! انا كنت فاكر ان الموضوع اشتغالة ....
http://s4.hubimg.com/u/147399_f520.jpg
بالمناسبة في 6 ايام خسيت 3 كجم بدون دايت .. و بدون ماابطل اي حاجة .. ولا دايت فواكه .. ولا دايت مجفف و لا دايت امه جلمبو .

و ان شاء الله ناوي استمر ... ولو عرفت كمان حزود المدة ... !

قوم ! فز! مش حتندم .. او في الواقع حتندم لو قعدت بس قدام المنتدى طول اليوم .. جاتك ال !!

ولا بلاش :)

ربنا يديكم و يدينا الصحة و يبعد عنا الامراض جميعا يارب .
http://img178.imageshack.us/img178/1050/joggingman.jpg
http://www.samachartoday.com/wp-.......ogging_man.jpg

موضوع ممتاااااااااااااااااااز

بجد كتر خيرك انا حالة مشابهة ليك بالملي بس انا مابدخنش ولا بشيش

بجد كتر خيرك وموضوع ممتاز وشكرا علي الافادة

بس لي سوال انت بتجري في نادي ايه

جيت على الجرح بالظبط

يا باشا متشكرين على النصيحه الغالية ، ربنا يديدم عليك الصحة ، بس مقولتناش عملت اية فى الشيشة

شكرا على الموضوع الرائع

الله ينور عليك
انا 30 سنة والحمد لله رياضى وحتى بعد الزواج كنت مواظب على الرياضة (كورة) مرتين فى الأسبوع
وطبعا للأسف بشيش من زماااااااااااااااااان
بس مكنتش حاسس بأى حاجة لغاية لما فيه فترة انشغلت فيها وبقيت اكسل العب
وبعده فترة وبعد اول مجهود طبعا بقيت بخخخخخخخخخخخ تعب وارهاق جاااامد

والحمد لله رجعت تانى للرياضة وظبطت كل حاجة

طيب انا الحمد لله مش بتخن كتير بس وزني ذاد 5 كيلو السنه اللي فاتت وبعد ما كانت بطني متقسمه بقت فيه بشاير كرش
بس انا بعمل الأتي
باكل كتيير
بشرب حاجات ساقعه كتير
مش بعمل اي تمارين
مش بمشي (من باب العربيه لباب الشقه لباب الشغل حتي السلم فيه اسانسير والشقه في الدور الأول)
طول النهار قاعد قدام الجهاز وفي البيت نفس النظام

زمايلي في الشغل بيحسدوني علي اللي انا فيه عشان مش بتخن بس مش عارف هو انا كده عندي حاجه غلط؟ مع اني الحمد لله مش بشتكي من اي حاجه

اقتباس:

---

المشاركة الأصلية كتبت بواسطة mrwho1982

موضوع ممتاااااااااااااااااااز

بجد كتر خيرك انا حالة مشابهة ليك بالملي بس انا مابدخنش ولا بشيش

بجد كتر خيرك وموضوع ممتاز وشكرا علي الافادة

بس لي سوال انت بتجري في نادي ايه

---

الله يكرمك . في النادي الاهلي بمدينة نصر .

اقتباس:

---

المشاركة الأصلية كتبت بواسطة pharaoh

جيت على الجرح بالظبط

---

و الله انا كنت زيك . . ولسة مفرتش كتير يعني دول كلهم 6 ايام بس صدقني جرب مش حتندم .

اقتباس:

---

المشاركة الأصلية كتبت بواسطة haythamkmal

يا باشا متشكرين على النصيحه الغالية ، ربنا يديدم عليك الصحة ، بس مقولتناش عملت اية فى الشيشة

---

العفو ..

والله لسة منوتيش بس عامة .. انا عمري مابنزل مخصوص علشان اشيش .. يعني لو خرجنا في حتة و فيه مكان فيه شيشة ممكن اشيش .. بس مش بنزل مخصوص علشانها .. مش ادمان يعني الحمد الله .
ممكن يعدي عليا اسبوعين من غير ماشيش مش بحس ان في حاجة نقصاني يعني .

اقتباس:

---

المشاركة الأصلية كتبت بواسطة ams

شكرا على الموضوع الرائع

---

العفو و شكر لمرورك الكريم .

اقتباس:

---

المشاركة الأصلية كتبت بواسطة mido777

الله ينور عليك
انا 30 سنة والحمد لله رياضى وحتى بعد الزواج كنت مواظب على الرياضة (كورة) مرتين فى الأسبوع
وطبعا للأسف بشيش من زماااااااااااااااااان
بس مكنتش حاسس بأى حاجة لغاية لما فيه فترة انشغلت فيها وبقيت اكسل العب
وبعده فترة وبعد اول مجهود طبعا بقيت بخخخخخخخخخخخ تعب وارهاق جاااامد


والحمد لله رجعت تانى للرياضة وظبطت كل حاجة

---

والله كفاية الراحة النفسية الصباحية ... بحس اني نشيط كدة مش كسول زي الاول ...

اقتباس:

---

المشاركة الأصلية كتبت بواسطة shaddadfalcon1

طيب انا الحمد لله مش بتخن كتير بس وزني ذاد 5 كيلو السنه اللي فاتت وبعد ما كانت بطني متقسمه بقت فيه بشاير كرش
بس انا بعمل الأتي
باكل كتيير
بشرب حاجات ساقعه كتير
مش بعمل اي تمارين
مش بمشي (من باب العربيه لباب الشقه لباب الشغل حتي السلم فيه اسانسير والشقه في الدور الأول)
طول النهار قاعد قدام الجهاز وفي البيت نفس النظام

زمايلي في الشغل بيحسدوني علي اللي انا فيه عشان مش بتخن بس مش عارف هو انا كده عندي حاجه غلط؟ مع اني الحمد لله مش بشتكي من اي حاجه

---

صدقني انا كنت زيك .. و كنت باكل اكل " خرتيت " مش فيل .. و عمري مازدت خالص .. لكنها تراكمية يا عزيزي .. يعني حتلاقي نفسك زي الفل و مش بتزيد ... و بعد 4-5 سنوات حتلاقي نفسك فيل :) ( مش قصدي طبعا انا بهرج ) .


ابدا حتى بالمشي علشان على الاقل لو مزيدتش .. تحرق الي انت بتاكله و بتحافظ على ليقاتك .

مبروووك يا كريم باشا و إن شاء الله تكمل و تحافظ على نفسك من الأمراض دى كلها ... عقبالى كده أنا كمان بعد ما أخلص إمتحانات ... أنا ناوى إن شاء الله بجد ضرورى السنة دى.

أنا نفسي أعمل إلي إنت عملته ، أنا تقريباً نفس حالتك مع اختلاف اني 33 سنة و بطلت رياضة من سنه 1998 ،، و طبعاً فيه شيشة بس مش أدمان ، يعني مره ، أخري مرتين بلكتير في الأسبوع حسب الخروج مع أصحابي
و النادي أقل من 5 دقائق مشي من البيت.

موضوع حلو قوي .... وكلامك استفزني اقوم اجري دلوقتي بس المشكلة اني في الشغل

بجد فعلا شكرا ليك مشكلتنا دايما في الرياضه هي الكسل لكن لو حد شجعنا او اتعودنا عليها هتبقى سمه في حياتنا وهتبقى زي الأكل والشرب


طب انت سمعت عن كرنفال العجل

مجموعة من الشباب على الفيس بوك بيتقابلوا كل يوم جمعة من 7- 11 صباحا ويلفوا البلد بالعجل كرياضة جماعية

الموضوع دة اتكلم عنهم بأستفاضه اكتر

http://www.nilemotors.net/Nile/184653-a.html

تحياتى ليك

موضوع ممتاز واصرارك انك تكمل شىء عظيم

ستة ايام فرقو كتير جدا - اشكرك مرة تانية انت شجعت ناس كتير جدا

هقولك على حاجة اى حد لما يبطل رياضة اى كانت ويعود فى البيت كام شهر ونزل يلعب رياضة هيكون مش قادر ياخد نفسة وحرقان فى صدره ده عادى مده يومين او تلاته وبعد كده بيلعب عادى

تخيل معايا كدة عربيه بقالها 10 سنين مرفوعه مبتستخدمهاش خالص واول ماتستخدمها تخش بيها رالى على طول بدون اى تظبيط فيها

الف سلامة على صحتك واستمر على الرياضة

حضرتك بكلامك جيت علجرح

انا بقالي اسبوعين تقريبا مكتئبة جدا

فين ايام مش هقول زمان لانها كانت لحد السنة اللي فاتت

كان همي كله وارفي بطلعه فلتمرين حتي ونا صيمة

وكنت ببقي مفرفشة طول اليوم بدون مبرر فعلا

واتلكك علشان امشي

كنت بمشي من الجيزة للقصر العيني يوميا واحيانا برجع مشي ملقصر للهرم

دلوقتي الكسل بيجيب كسل والخمول بيجيب خمول وحسيت اني بقيت سلبية زيادة عن اللزوم

اجمل احساس في الدنيا لما كنت ببقي طالع من صالة الجيم ولاعب باي وتراي او بنش او رجل
ساعتها كنت ببقي ماشي في الشارع حاسس اني لو دخلت في حيطه هكسرها

اياميها كنا بنبقي بيت وكنت بشيل شيكارة الأسمنت ال 50 كيلو كانها كيلو سكر

من كام شهر جيت اشيل واحده لقيت نفسي مش قادر ارفعها وشيلتها بالعافيه بصراحه زعلت قوي علي نفسي وقتها

انا نفسي اروح اشيل حديد زي الاول بس مكسل ومش لاقي حد يشجعني

ياجماعة أهم من إنك تلعب رياضة، إنك تواظب على لعب الرياضة

جميل قوى موضوعك

فعلا المشى دة شئ مهم جدا وبيعمل لياقة للجسم وبيخليلىك تحس انك خفيف و ععضلاتك بتشتغل و المفاصل بتفرز المادة الطبيعية بتاعتها الى بتمنع الخشونة

دة غير ان نفسيتك و معنوياتك هترتفع جدا

ان شاء الله تحافظ على النظام دة

الله يكرمك.. بصراحه موضوع رائع
الفكره كلها فى ممارسه رياضه وحركه سواء جرى او حتى مشى انا برضه قعدتى كلها فى البيت قدام النت ولو خرجت بيبقى بالعربيه مفيش حركه ولا رياضه.. ان شاء الله هحاول اظبط الامور

على فكرة كلنا كدة ربنا يقوينا

عارف معنى كلامك والله
أنا من 3 سنين تقريبا بطلت ألعب أي نوع من الرياضة البدنية
أنا كنت بلعب ملاكمة وبمارس الجيم بأوزان معقولة بإنتظااااام
دلوقتي بقا .. بقيت بنهج لما بغير فردة الكاوتش وبعرررق بهبل
........
من إسبوع .. مروح بالليل ..قابلت الكابتن بتاع صالة الجيم(صالة على أدها كده)..
بيقولي إيه يادكتور ..مابقتش بتيجي يعني
قولتله والله ياكابتن أنا برجع من الصيدلية الساعة 2 - 3 صباحا..وإنت بتكون قافل
راح مطلع المفاتيح بتاعته .. وإداني نسخة من مفتاح الصالة(وطبعا أخد الاشتراك الشهري هههههه)
المهم
إمبارح كان رابع يوم على التوالي أروح الجيم .. لمدة ساعة يوميا
بدون مبالغة ... إحساس مختلف
نفسي مفتوحة جداااا للأكل .. وعندي إستعداد إني أعمل أي مجهود بحماس
بجد
فرق السما من العما
أنا كنت طووول النهار قاعد في الصيدلية .. أو نايم في البيت .. أو قاعد في العربية
لما الواحد جسمه بدأ يختسع فعلااااااا.. وكان عندي كسل وخموووول شديد

بس الحمد لله ..أنا فعلا حاسس بالفرق..ومش وهم
أنا بقالي 4 أيام ...ماتتخيلوش عرقت أد إيه في الكام يوم دول وأنا بلعب
عرررررررق خرااااااااااافي
وسطي كان بدأ يشيل دهووون ...الحمد لله بدأت ترووووووح خالص

أنا فعلا مبسوط جدا
وحاسس بنشاط غير طبيعي

انا بقى ليا وجهة نظر فى الموضوع ده مؤداها ان اهم حاجة فى الرياضة هى الاستمرارية , و فكرة النزول من البيت لممارسة الرياضة يوميا ببساطة فكرة مستحيلة يعنى باختصار انت هتنزل اول اسبوع او عشرة ايام بكل حماس و بعدين هتزهق , و حتى لو ما زهقتش اكيد هيدخل عليك شتاء و مش هتقدر تنزل من البرد , او هيجيلك ضيوف و مش هتقدر تسيبهم او هيحصلك اى ظرف يمنعك من النزول يوم , و طالما كسرت يوم يا معلم يبقى انسى و كل سنة و انت طيب و نلتقى مع الرياضة بعد 3 او 4 سنين تانى , طب ايه الحل؟

الحل هو المشاية الكهربائية فى البيت اللى انا شايف انها اصبحت من الاساسيات و ليس الكماليات , و بقالها معايا 4 او خمس شهور كل يوم بمشى عليها نصف ساعة و باخد بريك 5 دقايق كل 10 دقايق بعمل فيه 20مرة من تمرين البطن و 50 مرة تويست , بصراحة ماليش اى حجة المشاية فى البيت و حاططها ادام التلفزيون يعنى بتتمشى و انت بتتفرج على المسلسل بتاعك و بتبص تلاقى مدة التمرين بتاعك خلصت و انت مش حاسس , من ساعة ما بدأت و انا حاسس بتغير كلى فى حياتى للافضل جدا , حتى الاكل اتظبط جدا لانه بيصعب عليا انى يبقى نفسى مقطوع على المشاية كل يوم و افضل اكل حلويات و حاجات مش صحية طول اليوم , و مهما كانت المغريات بقنع نفسى ان شعورى و انا واقف على الميزان فى نهاية اليوم بعد التمرين و الاقى نفسى نازل عن اليوم اللى قبله 100 جم و لا 200 جم احسن عندى من 100 شوكلاتاية او حاجة ساقعة , و مش معنى كدة انى حارم نفسى بس كل ما هنالك انى عملت لنفسى حاجة حلوة واحدة بس فى اليوم (شيكولاتة او ايس كريم) و مرة واحدة برده حاجة ساقعة و الحمد لله بخس و صحتى احسن و اخر تمام .

و لصاحب الموضوع احب بعد ما اشكره على الموضوع الجميل انى ادعيله و ادعى لجميع الاخوة انهم ينتصروا على نفسهم و على الشيطان و يمتنعوا تماما عن جميع صور التدخين لانه هو كدة (بالاستمرار فى التدخين) يعتبر مش بيعمل حاجة بل بيقتل نفسه ببطء , فكرة ان التدخين حرام و قاتل ما بقيتش محل خلاف , ربنا يعافينا جميعا , و السلام عليكم.

عند حضرتك حق فعلا فكل اللى قولته. الرياضة شئ تحففة واللى اتعود عليها من الصعب جدا انه يسيبها.انا ببقى طالعة من التمرين معنوياتى مرتفعة جدااا خصوصا لو اديت كويس ببقى طايرة من الفرحة وساعات ببقى تعبانة جدا اول ما التمرين يبدأ بنسى كل حاجة حتى التعب :36_1_34[1]:بجد هتغير حياةكل واحد للاحسن كتيير

ربنا يديك الصحة يا كريم .. تجربةة ممتاز وربنا يكرم وننفذ .. وحشتني مشاركاتك وانبسطت لما شفت موضوع منك :)

ربنا يبارك فيك ويديك الصحه،والله أنت شجعت الواحد أنه برجع يعمل رياضه تانى.

موضوع ممتاااااااااااااااااااز

الله يكرمكم جميعا .. كفاية مروركم الكريم .. و ياريت ياجماعة الي يبدا فعلا يقولنا ايه الاخبار ز حاسس بايه ...

انا زيك بالظبط بس مع الفرق انا مش باكل كتير بس مش بعمل مجهود سني 17 سنه وزني 120 كيلو طولي 175 سنتي مش بعمل حاجه في حياتي كرهت نفسي بجد حاسس اني اتخنقت لا في حد بيبوصلي ولا نيله مش طايق شكلي لو طلعت دورين بنهج طبعا العربيه تحت رجلي مش بلروح في حته غير المنتدي او المزاكرة علي السرير اسف في التشبيه زي البيضه ايوة انا الي بقول عيل نفسي كده و مفيش حد يشجعني ولا ينيلني عيل المشي مفيش حد حوليا مليش اصحاب ولا حاجه و اخويا في وادي و انا في التاني قولي اعمل ايه معنديش اشتراك في نادي مجمبيش حته امشي فيه قولي ايه الحل بعد ازنك و اسف علي الاطاله و وجع الدماغ بس مفيش حد اشتكيلوة غيركو بجد انتو بقيتوة اخواتي و عيلتي

انا لاقيت تمرين أشد

و جااااااااااااامد موت

باطلع السلم بدل الأسانسير

في الأول بدت علي أعراض الذبحة الصدرية في الثالث

و بدأت الأعراض تتأخر دور عن دور

و بقيت باطلع السلم مع وجع في الفخذ

و الوجع بدأ يقل برضه

من شهرين لمبة السلم اتحرقت

:)))))))))))))))))

اقتباس:

---

في الأول بدت علي أعراض الذبحة الصدرية في الثالث

---

ههههههههههههههههههههههههه هههههههههههه

خد معاك شريط نيتروجلسرين ضمان الواحد ميضمنش دي بجد ولا هزار

وعد سأعود.. حتي إن طبعوا في قلبي ختم المفقود

حتي إن جاءوا بمتاعي من اعمق بحر موجود

حتي غن جاءوا بقميصي عليه دماء وقيود

وعد سأعود

------------------

سأعود امشي تاني من النهاردة ان شاء الله 40 دقيقة

يوميا بعد العشا باذن الله... وان شاء الله هغير الاماكن بدون توقف وبدون ملل

واجدد نيتي علشان ربنا يقويني

وعلي رأي اسمه ايه دا بتاع الحكومة...

امشيها صح..تعيشها صح