كنت قد قمت بعمل موضوع بخصوص انى قررت شراء الجميلة byd وذلك بعد اقتناعى بهذه السيارة الرائعة بناء على كلام الاخوة اعضاء المنتدى واقتناعهم بها وثقتى الغالية فى الاخوة الكرام اعضاء المنتدى
انا حقيقة موش عايش فى مصر والمدام والاولاد هما اللى هناك وكانت عملية الشراء صراحة عبئ ثقيل شوية على المدام لكن اتيسرت جدا بامر الله سبحانه وتعالى والدعاء
المدام كما اخبرتكم ذهبت لشركة الامل فرع مصر الجديدة ودفعت عربون الف جنيه ووعدوها السيارة تكون جاهزة على التسليم بعد اسبوعين
فوجئنا امبارح الاربعاء الشركة بتتصل على البيت وبتقول ان السيارة جاهزة تعالى استلميها يا مدام وادفعى باقى الفلوس والكلام ده كان قبل المغرب الاربعاء29/9 قبل الموعد باسبوع كامل
المهم ام العيال على قول السعوديين استعانت بالله واخدت تاكسى وطلعت على الشركة دفعت باقى الفلوس واستلمت السيارة وتاكدت من كل النقاط اللى وصى عليها الاخ الفاضل abojessy لكن اشترطوا عليها لو هتاخد السيارة لازم تييجى الصبح تاخد مندوب من الشركة هيخلص لها التراخيص فى المرور والذى منه
المهم قالت لهم خلى السيارة عندكم وبكرة هو يجيبها بنفسه ولما يوصل عند المرور يتصل بى اروح له (نسيت اقولكم ان احنا ساكنين فى صقر قريش والمرور جنب العمارة على طول يعنى تشوفه من البلكونة)
الساعة 10 صباحا كان الاخ بارك الله فيه بالسيارة عند البيت وراحت معاه المرور وقبل 12 الظهر كان كل شى خالص والرخص والنمر الجديدة وكله كله
الاخ اللى من الشركة وقف لها السيارة تحت البيت وشرح لها كل حاجة وسلم لها الكتيبات والضمان والذى منه بس فى ملحوظة مافيش طفاية حريق وبتقول مافيش كوريك ولا مفتاح جنوط بس موش متاكدة من المعلومة الاخيرة
بكرة الصبح هتنزل تجربها وتلف بيها شوية وهتخلى الولد ياخد لها صور من كل الاتجاهات ومن الداخل ويرسلوها لى على الميل وان شاء الله اختار منها واعرضها لكم فى المنتدى
حتى الان مافيش انطباع معين عن السيارة انها لسة لم تسوقها بعد لكن اول انطباع مبدئى ان السيارة من الخارج شكلها جميل جدا والدهان الخارجى اكثر من رائع (لون رمادى او فيرانى ميتالك) لكن هى موش مبسوطة من نوع البلاستيك اللى مصنوع منه التابلوه وشاعرة انه موش فاخر بالدرجة طبعا للاسف هى بتقارن بينه وبين الكورولا 2010 فول اوبشن يابانى اصلى ودى مقارنة ظالمة تماما
بس هنا فى سؤال هل هناك فارق فى الخامات المستخدمة فى النوع المجمع فى مصر وبين وارد الصين؟
اريد بعض النصائح من الاخوة الكرام بما يتعلق باستخدام السيارة فى الفترة الاولى وهل من الافضل تركيب فرش داخلى للحفاظ على فرشها الاصلى وفين وبكام؟
معلش انا هتقل عليكم فى الاسئلة شوية بس ده من عشمى وبالذات الاخ (abojessy) حبيب الملايين
الانطباع الاول عن الشركة انه التعامل ممتاز والتسليم قبل الموعد وتسهيل الاجراءات زى الفل ونسيت اقول لكم الراجل الطيب اللى خلص كل حاجة فى المرور اخد 200 جنيه ومتهيالى مبلغ موش كبير ولا ايه رايكم؟
كمان الشركة كتبت لنا الموديل 2011 وعلى هذا الاساس تم الترخيص
وتقبلوا تحياتى