الموضوع: واخيرا" الوزه نايمه تحت البيت

اخيرا وبعد طول انتظار تسلمت عربيتي النهارده العصر وقبل ما ابدأ وأقؤل انطباعاتي وتقيمي للعربيه أحب اشكر وبشده الاستاذ مروان اللي ساعدني على الحصول على العربيه في وقت أسرع حيث ذكر لي مدير مبيعات عيسى-الموزع المعتمد-أن الاسبيرانزا الذهبي جايه برقم الشاسيه والماتور بأسمي فجزاه الله كل خير.

نبدأ بقى بتقييمي للعربيه اولا" التابلوه وانا من رأيي انه معقول جدا يعني لاهو بالفخم ولا هو بالرديء وان كان يعيبه الأزرار المصنوعه من البلاستيك السيء خصوصا" زر الانتظار واللي جانبه تشعر من ملمسه وشكله انه من النوع الرديء وأن كان يعمل بكفاءه وباقي التابلوه معقول جدا وجميل جدا وأجمل بمراحل من تابلوه الفيرنا أو اللانوس وللعلم أنا عرفت ان اللانوس ب66 الف بالحجز لذلك لما نقارن الاسبيرانزا باللانوس او الفيرنا . الاسبيرانزا تكتسح في كل شيء ثانيا" اتساع الصالون وده بجد فعلا" واسع جدا" ومقارب لحجم النوبيرا اذا مكنش اكبر كمان والقعده سواء في الأمام أو الخلف مريحه يعني الكراسي من النوع المريح ثالثا"الأوبشن ودي كتيره ومتنوعه وكلها بتشتغل عندي لحد الان بكفاءه عاليه يعني المرايا الكهرباء رائعه وتستجيب بسهوله والسنتر كذلك ووحدات الرفع وفتح الشنطه بالريموت ومخرج شاحن الموبايل الأضافي وتعديل وضع الأنوار-النور قوي جدا- كلها ولله الحمد تعمل بكفاءه رابعا" الصاج من بره كويس جدا وتقيل والدهان معتني به جدا ومن النوع الممتاز وعلى فكره أنا حصلت اليوم على دليل جديد على قوة صاج الاسبيرانزا وهو أني اثناء تجولي في مركز الصيانه لقيت حته حديده كانت سياره سابقه المهم أعرف مهندس ثقه وبسؤاله عن الموضوع أفاد انها سياره اسبيرانزا كان صاحبها يسير على سرعه 160وانقلب بيها عده قلبات بعد ما طلع على الرصيف المهم اشتعلت النيران في السياره لمده تزيد عن الست ساعات ومع ذلك وبالطرق على الصاج بعد ماراح كل الدهان تجد الصاج قوي بالأضافه انها فضلت مقلوبه على سقفها ومع ذلك ولا قايم انكسر ولاسقف دخل على الركاب والسائق خرج من الحادث وخد تلات غرز فقط وسياره جديده من شركه التأمين عموما" يقينا الله وأياكم شر الحوادث يارب بس عموما أنا اقتنعت اليوم بأن صاج الاسبيرانزا أحسن بكتير من الدايو والفيرنا على الأقل خامسا" المحرك موش قادر أحكم عليه لحد دلوقتي لأني مسقتهاش لسه كتير وطبعا انا موش بقرص عليه خالص سادسا" العفشه لحد الان ممتازه جدا وان كنت هقيمها تاني لما لاقدر الله اكل مطب وساعتها هعرف قوه العفشه(: سابعا" الحاجات بقى اللي اشتكى منها المالكين قبل كده موش موجوده عندي خالص ولله الحمد زي صفاره التيل وزي الخبطه في المطبات........الخ ملاحظتي ان السياره تقيله على الطريق وراسيه موش خفيفه زي اللانوس او الفيرنا وطبعا عاليه عن الأرض الحاجه برده اللي مستغربها هي سخونه الماتور فرغم ان المؤشر لايرتفع عن تالت شرطه في امبير الحراره الا اني لما احط ايدي على الكبوت وهو مقفول حتي بحس بسخونه ولما افتحه بحس انه سخن شويه فياترى ده عيب ولا ايه؟ وايه هو الحل؟

كلمه حق ممكن حد يقؤلي عربيه بمميزات وسعر الاسبيرانزا ياريت لو فيه تقؤلوا لي على اسم هذه السياره وللأمانه التامه العربيه رائعه جدا وقليل عليها 64 وانا متأكد انها هتغلى عن كده بأذن الله