السلام عليكم

اشتريت عربية جى ام سى بليزر موديل 1980 5700 سى سى مانيوال من غير تكييف و ده تقييمى ليها بعد 4 ايام من تجربتها :-


1- حجمها ضخم جدا ... بالكاد ارى السيارات عن يمينى ... و بعض انواع السيارات غير مرأية على الاطلاق حتى يمر من جانبى و يصبح امامى .... انا بجد ببقى مش شايف الى جانبى على اليمين .. النهاردة فيه واحد حب يعمل ناصح و يحط بوز عربيته قدامى .... الى شوفته دراع واحد و هو بيشاور خايف انى اخبطه.... انت كنت داخل اشيله عشان انا فعلا مكنتش شايفه خالص
دى مش مشكلة يومية عشان انا جايبها اروح بيها الشغل .... من 6 اكتوبر للقطامية على الدائرى

2- سحبها كويس .... انا كنت فاكرها زى البطة البلدى بس طلعت بتسحب و تجرى ..... الانسر الـ 1300 بتسحب احسن منها

3- صوت الموتور عالى حبتين .... المالك السابق كان واخد كل فرن (مخرج كل 4 سلندر ) على شكمان مستقل لآخر العربية ... يعنى فيه فى العربية عدد 2 شكمان مستقليين .... صوت العربية عامل زى الاتوبيس النصر القديم

4- العربية فيها فتيس غرز ... و العجل بيتعمل له لوك يدوى من سرة العجل الامامى .... انا لسه مجربتوش على الرمل عشان احس بيه

5- استهلاك البنزين ...... شلمنتيفى .... من المعادى لـ 6 اكتوبر على الدائرى ... 10 لتر

6- الفتيس يدوى 3 سرعات فقط ( كفاية عليها 3 نقلات بس ) و فيها نقلة اسمها العجوز ... دى للغرز
الدبرياج تقيل حبتين عشان ميكانيكال .... الدبريجات العادية اما بسلك او بزيت هيدروليك ... الميكانيكال بقى عبارة عن مجموعة ميكانيكية لنقل الحركة للديسك و الاسطوانة

- احساس جميل جدا انك ترمى على ميكروباص و انت مش خايف منه
- العفشة مفيهاش مقصات , فيه 2 مساعد على كل عجلة امامية , سوست ورقية امامية و خلفية , العربية ناشفة حبتين فى المطبات
- قطع الغيار مش غالية ... ترس البندكس الى فى المارش بـ 65 جنيه .... تيل الفرامل بـ 90 جنيه

انا بشكر مينا و أدهم لمساعدتهم لى
و فى انتظار الردود والآراء