العاصفة الرملية وكيفية الحفاظ على العربية
يوم الخميس كان عندي واجب عزاء في الفيوم وفي طريق العودة (كان حوالي الساعة 8 مساء) فوجئت بقوة العاصفة لدرجة اني مكنتش شايف قدامي اكتر من 10 متر ومع اني عارف اضرار العواصف دي كويس لأني اتقرصت منها قبل كدا في السعودية الا اني عندت ومشيت حوالي 30 كم لحد الرؤية ما بقت منعدمة ساعتها قررت التوقف للصلاة في المسجد اللي عند الكارتة والانتظار حتى هدوء العاصفة حتى لو انتظرت للصباح ونصيحتي للأخوة اللي تقابلهم عاصفة مثل ذلك (خاصة لو كانت عكس طريق سيرك) والحمد لله انها مش كتير في مصر زي دول الخليج انك لآزم تتوقف فورا وتحاول تركن السيارة في مكان يحميك من الرياح على قدر المستطاع وان لم يتوفر لك المكان ففي الحالة دي تحاول تركن السيارة بميل بحيث تكون مقدمة السيارة في اتجاه عكس الرياح ويكون جانب السيارة المائل هو الذي في اتجاه الرياح وللعلم الاضرار التي تحدث من واقع خبرتي واللي حصل معي قبل كدا هي :
- صنفرة الزجاج والفوانيس لدرجة تمنعك من الرؤية الواضحة بحيث تجد نفسك مضطر لتغيرهم لأنه لا يوجد علاج لهم (ممكن وش الفوانيس البلاستيك يتعالج لكن الزجاج لا يمكن)
- صنفرة الشبكة الامامية لدرجة ذهاب النيكل بحيث تجد نفسك مضطر لتغيرها الا إذا كنت غير مهتم بالشكل
- صنفرة بوية الكابوت من الامام وكذلك بوية كفر المرايات والجزء العلوي من السقف اللي فوق الزجاج الامامي والاكصدام وبالتالي يجب اعادة طلائهم (انا فاكر لما حصل معي الموضوع في السعودية والله بوية الاكصدام اختفت نهائي لدرجة ان نمرة السيارة اصبحت كانها قطعة المونيوم)
- عدم سحب السيارة نتيجة سداد الرمل لفلتر الهواء وفي بعض الاحيان ممكن موتور السيارة يتوقف نهائي
- طبعا دخول الرمل في كل مكان في السيارة لدرجة تكرهك في نفسك وتعد بعدها شهر تلاقي التراب متعرفش جايلك منيين والمشكلة الكبري انك مبتلقيش حد عنده ضمير وصبر علشان ينظف العربية وهو دا اللي حصل معي النهاردة
النهاردة الصبح قولت اروح انظف العربية وطبعا قولت ابدأ بالكابوت ويا دوب بافتح الكابوت وعينكم ما تشوف اللا النور الرمل بينزل من كل الفتحات اللي في في الكابوت وقعدت اقنع في الراجل انه يدخل خرطوم الهواء في كل فتحة علشان ننزل اكبر كمية من الرمل (انا عارف انه استحالة هينزل كله - خبرة بقة)
المشكلة الاكبر في الرمل اللي متكثف على كل مواسير المكيف وماسك فيها ومش راضي يستجيب للهوا وبدأت بمنديل ورق احاول انزل فيه واحدة واحدة وبراحتي وفجأة لقيت الراجل جايب سلك المونيوم وماسك في المواسير دعك وبالعافية اقنعته انه هيدمر المواسير وسبني اكمل بالمناديل الورق بس المشكلة ان فيه اماكن كتير ايدي مش عارفة توصلها والرمل ما زال ماسك عليها والهواء مش نافع معاها بعد كدة طلبت منه ينظف الفلتر وبعد ما نظف الفلتر لقيته جايب خرطوم الهواء علشان ينظف العمة اللي بيركب فيها الفتر لأنها كانت مليانة رمل والحمد لله لحقته قبل ما يبدأ وسديت الفتحة اللي بتدخل الهواء على الموتور والمهم وعلشان انا طولت عليكم بعد ما غسلت العربية من جوه ومن برة ومن تحت (ماعدا الموتور لأني اكتفيت بالهواء) وروحت البيت لقيت العربية من جوة لسه فيها رمل وبعضه اتحول لطين من المية فبصراحة مقدرتيش امسك نفسي ورحت لابس شورت (طبعا كنت في جراج مقفول علي مش في الشارع) وقعدت اغسل في العربية من جوة وبرة لحد الحمد لله ما نظفت
المشكلة اللي مواجهاني دلوقتي هي ازاي انظف الموتور من الرمل اللي مكلبش فيه وخاصة اني مش عايز اجيب مياة عليه علشان متبوظ حاجة والمرة الوحيدة اللي غسلته كان في السبع ولاقيتهم بعد ما رشوا الفوم غسلوه بالمياه وبصراحة بعدها قررت انظف بهواء فقط بس دلوقتي مش عارف ازاي اخلص من الرمل اللي مكلبش في الاماكن اللي مش عارف اوصلها بايدي في الموتور