من فترة بسيطة رحت أعمل الصيانة الدورية 5000 كم للعربية جاك بى 15
الملاحظات اللى كانت عالعربية اللى بلغت بيها التوكيل كالأتى:

1- تغيير زيت و فلتر
2- تربيط عفشة
3- فتحة التكييف اللى فى ضهر المسند اللى بين الكرسيين الأماميين لا تعمل
4- لمبة انذار نظام العادم منورة بدون سبب (تم تغيير الحساس 3 مرات قبل كده و كل لما أمشى بيها تنور تانى)
5- شراء علامات جديدة للعربية (العلامات اللى قدام و اللى ورا اتسرقت بعد كام يوم من شراء العربية)

الذهاب كان لتوكيل جاك و جيلى أسكندرية الساعة 10

أستلام العربية كان الساعة 4 للأسف استنيت كتير هناك.
تم وضع زيت 10 ألاف و فتحة التكييف اشتغلت و العلامات اتركبت بس سبب التأخير أن لمبة نظام العادم كملت لعبة القط و الفار اياها و ده سبب التأخير.
يكشفوا بالكمبيوتر ...يقول العيب فى السينسور...يركبوا السينسور....يسوقوا العربية اللمبة تنور تانى...يضطروا يسيبوا العربية لما تبرد عشان يركبوا تانى و هكذا.
طبعا أنا قلتلهم يا جماعة استحالة العيب من السينسور ده أتغير 5 مرات مش معقولة الخمسة اللى اتركبوا بايظين بس هم بيمشوا حسب ما كشف الكمبيوتر بيقول.
المهم استلمت العربية على انى أجيبها بعد يومين اسيبها فى التوكيل عشان كهربائى يشوفها (اليومين عدوا و مفضتش أوديها)
الفاتورة الكلية للأسف نسيت هى 298 أو 398 جنيه هتأكد أنا عندي الفاتورة فى البيت.
انا كنت سعيد بسعر العلامات .. العلامة من التوكيل سعرها 44 جنيه كنت خايف يكون رقم بمية و حاجة.
ملحوظة على اداء العربية: و ده حتى قبل ما اروح التوكيل كان أخويا خدها عمل بيها سفرية 400 كم..جيت اركبها بعد كده لقيت العربية اتغيرت.
زمان كنت لما بمشي بيها كنت أحس انها مخنوقة و أن التسارع بطيء دلوقتى لقيتها سلسة و الأر بى ام بقى يجري بجيب 3 نقلات خلال كام ثانية .. يعنى عايز أقول ان التسارع أتحسن كتير و حسيت ان سواقتها بقت أسهل.
ان شاء الله هأبقى أبلغكم بموضوع اللمبة ده هينتهى على ايه