السلام عليكم ورحمة الله وبركاته

أولا مش عارف هو ده المكان المناسب للموضوع ولا لأ ؟
لأن طبعا الشاهين ملهاش مكان فى أى منتدى سيارات
فلو مكانه مش هنا يبقى الإدارة تنقله مشكورة

نيجى بقى للموضوع

الموضوع بدايته فى شهر 9 / 2009 وطبعا قبله كانت المناقشات والبحث عن حالات جيدة

المهم إِشتريت عربية شاهين 99 فاضية وكان معايا سمكرى صاحبى قاللى العربية 10/10 وبص تحتها وكل الكلام دا وبما أنى دى أول عربية ليا فأنا ماكنتش أعرف ان التجار كتير كدا كان العربية فيها توكيل واحد

وكل اللى يشوفها يقوللى العربية ماشاء الله جميلة سواء الميكانيكى أو أى حد تانى كانت ب36000 ومارضيش ينزل غير 500 جنيه على أساس إنها لقطة يعنى

مشكلتى بقى :

أول لما إشتريت العربية صاحبى السمكرى (دماغه تعبانة فى رأيى) قاللى إغسل العربية علشان تشوف حلاوتها المهم غسلتها راحت العربية حلفت ماهى دايرة يمين شمال وكهربائى وبتنجان طلعت البطارية بالسلامة طبعا جبت بطارية جديدة جافة ب 320 وأخد القديمة السمكرى اللى جابلى العربية طبعا خليته يكلم الراجل الراجل قاله فيما معناه انت عبيط ولا ايه انت كنت نايم وانت بتشترى

جيت بعد كدا لقيت العربية مش مظبطة ( تقريبا كنت فولت 80 )
رحت للميكانيكى صديقى برضو - أصل أنا بقيت صديق الصنايعية - لقى العربية ماشية بموبينة وإسبلاتير 128 وحالتهم كرب أنا حسيت إنه جايبهم إستيراد
طبعا بما إنى فييس ومابحبش أبخل على حاجتى والعربية الشاهين الإسبلاتير بتاعها إلكترونى قمت جيبت إسبلاتير وموبينة جداد لانج أصليين عملوا حوال 1000 جنيه

تمر الأيام وألاقى العربية بتاكل زيت روحت للميكانيكى صاحبى المذكور آنفا ( مع العلم إنه بيشتغل فى مركز خدمة معتمد سكودا وهيونداى ) قاللى العربية عايزة طقم شنبر وأنا طبعا مش فاهم بس فهمت بسيط إن دى معناها نص عمرة كدا المهم أنا قولتله ماتسترخصش وهات أنضف حاجة العربية قعدت من 4 أيام لأسبوع فى طقم الشنبر دا وكل يوم او اتنين أعدى عليه يقوللى عايزين 300 جنيه أديله المهم العملية دى بالمصنعية صفصفت على 1000 جنيه وشوية دا غير إنه كان قاللى إن فى حاجات تانية غير طقم الشنبر مش فاكرها بالظبط تقريبا ( هو الميكانيكى أمين بس هو مصنعيته غالية شوية حوالى 400 جنيه )

والدبرياج كان ناشف جدا روحت غيرت طقم الدبرياج عند ميكانيكى تانى بالمصنعية عمل 500 جنيه

وبعد كدا لقيت الريدياتير بايظ خليت بتاع الريدياتير عمللى واحد نحاس ب 300 جنيه ( لأن تقريبا مفيش جديد مش عارف )

وغيرت غطا التنك ب 75 جنيه الأصلى وغيرت الكونتاكت بحوالى 145 وغيرت المارش بواحد استيراد ب 150 طبعا شغل الكهربا دا كمان الله أعلم بيه لأن أنا غيرت الكهربائى لأنى لقيته بيفتى

ودلوقتى غيرت مفتاح الإشارات ب 85 و جبت علبة فيوسات ب 245 جنيه لسه ماركبتش بس الكهربائية قالولى ان القديمة عايزة تتغير فعلشان كدا جبتها قلت لما القديمة تموت ابقى أغيرها

دا غير إن الكاسيت كان صينى وبايظ وماكانش فيه غير سماعة واحدة شغالة
طبعا غيرت الكاسيت وجبت 4 سماعات عملوا 1000 جنيه

دا غير إن غيرت البلى اللى فى العجل كله والبلية الصغيرة اللى فى الكارونة ( البلية الكبيرة سليمة ) لأنى كل شوية اسمع ونة وطبعا أنا مابسكوتش

وغيرت الاكصدام الخلفى ( واحد ريح عليه ) وقريبا الامامى كمان الواحد ب 100 جنيه - المصرى -

وغيرت طرمبة مية ب 100 جنيه

وغيرت سير الكاتينة والبلية وطبعا سير الدينامو

وأخيرًا غيرت المقصات وكاوتش الميزان بالمصنعية عملوا 360 جنيه

ملحوظة : أنا لحد دلوقتى ماغيرتش زيت الماتور ولكن بزود ( مرة بعد طقم الشنبر ومرة بعد الفلتر لما باظ وهكذا )فهل دا طبيعى بالنسبة للشاهين ولا لأ ( دا غير ان الماتور فى الحر بيسرب زيت بسيط جدا )

أنا عارف إن الموضوع طويل بس أنا تعبان وحاسس إنى إستريحت لما فضفضت

دلوقتى أنا عايز أعرف هل كدا خلاص آخر الأحزان ؟ ولا أنا غلطان والمصاريف دى عادية ؟ ولا ايه ؟

لأن أنا حاسس إنى صرفت 20000 جنيه (طبعا بالبنزين )

ياريت تفيدونى لأنى بفكر جديًا إنى أبيعها علشان زهقت وأرجع تانى لميكروباصات التصادم أو أشترى فيسبا جديدة