ياريت ياجماعه حد يفدني في الماتريكس يعني عاوز اعرف اهم مميزاتها واهم عيوبها؟عربيه بتستحمل الخدمه الشاقه والسفر الطويل ولا لا؟ عاليه عن الارض ولا لا بمعني لو محمل فيها ممكن تحك في المطبات؟ وشكرا لاهتمامكم
عرض للطباعة
ياريت ياجماعه حد يفدني في الماتريكس يعني عاوز اعرف اهم مميزاتها واهم عيوبها؟عربيه بتستحمل الخدمه الشاقه والسفر الطويل ولا لا؟ عاليه عن الارض ولا لا بمعني لو محمل فيها ممكن تحك في المطبات؟ وشكرا لاهتمامكم
هى ماشاء الله معقولة لو محمل الخمسة والشنطة مليانة اكيد هاتحك لو مطب عالى زى بتوع اسكندرية كدة بس ماتقلقش هى عالية ومناسبة للطرق المصرية .
وهى فى السفر ماشاء الله جميلة جدا وعائلية من الدرجة الاولى واسعة جدا من جوة
العيوب ان العفشة بتحتاج تربيط كل فترة
انا تحت امرك فى اى اسفسار تانى
المساعدين اللي في العربيه من نوع Heavy duty dampers يعني مساعدين خدمة شاقه و ده عن تجربة خاصه ... أنا عربيتي لما كانت عامله 50 ألف كيلو رحت كشفت علي كفائة المساعدين عند غبور لقيتها 70 في الميه و أصلا العربيه الجديده الزيرو بتبقي كفائة مساعدينها 80 في الميه مع العلم ان أنا مستخدم سيء ... تبقي مساعدينها كويسين جدا و بيستحملوا ... المساعد بيعتبر محتاج تغيير لما تبقي كفائته 40 في الميه فأقل .. يبقي أنا قدامي كتير علي ما أحتاج تغيير مساعدين ....
بالسنبه لتحملها للسفر الطويل ... مهما كان السفر طويل و مهما كان الجو حر العربيه في أول الطريق زي أخره ... الموتور حرارته استحاله تعلي حتي لو كان الجو حر نار ... أما بالنسبه لكفائة الموتور ... أنا عامل سبعين ألف كيلو و لسه لحد دلوقتي الزيت مش بينقص جرام واحد و الشكمان لسه بينقط ميه كل يوم الصبح صيف و شتاء و السحب ماتغيرش هو هو ... اختيار موفق بكل المقاييس لا تردد و علي مسؤوليتي الشخصية ....
متشكر اوي ياجماعه علي ردودكم انا كان يهمني اعلاف فعلا هل العربيه ي تستحمل الخدمه الشاقه ولا لا
طيب ياقائد بالنسبه للثبات اخباره ايه لح سرعه كام بتكون العربيه ثابته وسحب العربيه اخباره ايه وخصوصا لما بتكون محمل او مشغل التكيف وسؤال اخير بع اذنك انا سمعت ان معل استهلاكها لبنزين عالي هل الكلام ه صح؟ دا اول حاجه تاني حاجه انا سعيد جدا اني اتعرفت بيكم
تيمو احنا أسعد اننا اتعرفنا عليك ... تعالي نمسك كل حاجه واحده واحده ..
1 - الثبات : هاتصدق لو قلتلك ان جبت بعربيتي سرعة 195 و كان ثباتها هايل لدرجة اني كنت مسترخي و ماسك الدريكسيون بيد واحده !!
2- السحب : تصدق ان سرعة ال 195 دي كانت و التكييف شغال !! هو علي العموم سحبها يعتبر معقول بالنسبه لوزنها 1.3 طن ( وزن فارغ ) فالبتالي مش هايكون سحبها زي الجيتز ال 1600 مثلا أم 900 كيلو وللا حتي الالنترا الشكل القديم أم 1100 كيلو علي اعتبار انهم جميعا يحملون نفس المحرك ... هي بتطلع من سرعة 0 لسرعة 100 كيلو في الساعه في زمن 12.7 ثانيه زي ما قايله الشركه .. و أنا جربت الموضوع ده بنفسي ... مقارنة بالالنترا في زمن 11.6 في الثانيه و الجيتز 9.6 في الثانيه متهيقلي تبقي عرفت الفرق .... بس طبعا سحبها معقول و كويس جدا و انت يعني مش هاتسابق بيها و خصوصا وزنها التقيل ده ساعد في ثباتها كتير ...
3- استهلاك البنزين : بص هي بتحرق من 11 ل 12 لتر في ال 100 كيلو جوه البلد و بتحرق حوالي 7 لتر في ال 100 كيلو في السفر .. ده طبعا بسبب وزنها ...
بس لو انت خفيت رجلك من علي البنزين ممكن تعمل معاك 9 لتر في ال100 كيلو جوه البلد .. و تخف رجلك يعني تداديها و تدلعها خالص .....
4- أخر حاجه بقي طبعا أنا عمال أقول وزنها التقيل وزنها التقيل و انت تلقيك بتسأل نفسك يعني هي وزنها تقيل ليه فيها ايه زياده ... الماتريكس عامله زي القفص الفولاذ يعني فيها بارات صلب في كل حته في العربيه .. في الأبواب في السقف في التابلوه من جوه ... هاتقولي ما في عربيات كتير كده هاقولك بس لو قارنت تخانة البارات الصلب دي باخوتها في العربيات التانيه هاتعرف الفرق ... زائد ان مش كل العربيات فيها بارات صلب في كل حته زي الماتريكس .... فتخيل انت محمي من كل الزوايا بفضل الصلب ده .. معلش ده جه علي حساب السحب و استهلاك البنزين و كمان الصوت الموتور العالي نسبيا عن الالنترا مثلا أو الجيتز , بس انت في أمان تام و الحارس ربنا طبعا ...
لو عايز تستفسر عن أي حاجه تانيه اسال و ربنا يقدرني و أقدر أجاوبك ان شاء الله
بارك الله فيك معلومات جبارة و مشرفة.... ولكن قطع الغيار غالية على حد علمى ! التيل ب320 و الأكصدام ب900 ..... هل هذا صحيح ؟؟؟؟ هل لديك قائمة الاسعار ؟؟؟
شكرا mhalawa علي المرور و الاهتمام ...
التيل الأمامي 300 جنيه
التيل الخلفي 335 حنيه
أكصدام أمامي 800 جنيه
أكصدام خلفي 740 جنيه
كبوت أمامي 999 جنيه
شنطه خلفية 1800 جنيه
مراية جنب ( الكوري ) 450 جنيه
زجاج خلفي بدون مساحة 740 جنيه
طقم دبرياج ( ديسك + اسطوانه + بلية ) 1005 جنيه
لو افتكرت حاجه تاني هاقولك ....
الأسعار تعتبر معقوله لو انت عرفت ان تيل الفرامل الأمامي أنا اشتريته أول مره في 2005 ب 470 جنيه يبقي كده نزل كتير و لو عرفت ان بتاع الالنترا الجديده فوق ال 400 جنيه دلوقتي و بتاع الكيا السيراتو في توكيل كيا ب 410 جنيه و تيل البروتون جين 2 ب 500 جنيه ( الأصلي طبعا ) يبقي أسعار قطع غيار الماتريكس هايله طبعا ...
الاخ liquidator
جاب كل معلومات عن العربية والقطع الغيار والثبات والاستهلاك
نقول مبروك ياخ timo_crosswind
بصراحه انا مش عارف اقولكم ايه بس انا عاجز عن الشكر وسعيد جدا بمعرفتكم ويارب تدوم وشكر خاص للباشا الكبير لكيوداتور الله ينور وربنا يباركلك فيها ويكفيك شرها انا اخوكم تامر وفرصه سعيده جدا وياريت الاخ لكيوداتور اعرف رقم تليفونه علشان اكلمه