الموضوع: اخبار حلوة اخيرا احمدك يااا رب (:

بما اني شاركتكو قبل كدة في موضوعين الاتنين كانو اخبار مش حلوة اولهم لما عملت حادثة و خسرت العربية كلها و عملت عمليتين و قعدت 6 شهور عشان ارجع امشي طبيعي تاني الحمد لله

و التاني كان بعد ما خلصت علاجي و كان المفروض ارجع الشغل بس للاسف استغنو عني لانهم جابو بديل ليا و كمان مادونيش باقي حقوقي المادية المستحقة عندهم - حسبي الله هو نعم الوكيل فيهم بقى

و الحمد لله اخيراااا ماصدقت يبقى في اخبار حلوة عشان اشركم معايا فيها - يمكن حد يفرحلي ولا حاجة - ربنا كرمني بشغل تاني الحمد لله بعد اقل من شهرين من ساعة ما سبت الشغل و كمان في شركة اكبر بكتير و عرض احسن بكتير و الوظيفة و المجال نفسو احسن و اكبر بكتير

و انهاردة كان اول يوم شغل و استلمت و مضيت العقد و اتعرفت على التيم بتاعي اللي طلعو ناس ذوق و محترمين اوي الحمد لله وانا متفائلة جدا جدا ان شاء الله ، ادعولي بقى ربنا يوفقني في الشغل دة و يباركلي في رزقي

و عاوزة اقول لكل الناس اللي مرو او بيمروا بظروف صعبة او وحشة او اي ازمة او ضائقة بجد بجد بجد ماتيأسوش من رحمة ربنا ابداااااااااااااا و خليك متاكد ان ربنا ان شاء الله هاعوضك خير ، بسم الله الرحمن الرحيم " إِنَّ مَعَ الْعُسْرِ يُسْراً" صدق الله العظيم

و ربنا يصبر كل واحد بيمر بضائقة او ازمة و يجازيه عنها خير بأذن الله

امضاء الموظفة
دينا بسيوني