دراسة لاتخاذ قرار شراء الرينو لوجان 2011 ارجو التعاون .
السادة اعضاء وملاك الرينو اللوجان الافاضل
السلام عليكم ورحمة الله وبركاته
فكرت اعمل موضوعي لقيامي بدراسة السيارة ومميزاتها وعيوبها حاليا لاتخاذ القرار السليم لنيتي شرائها موديل 2011 لاني اشتري في نفس الفئة السعرية 68500 للسيارة الفول اوبشن
وهدفي ليس اظهارالعيوب لان جميع السيارات في نفس الاسعار بها عيوب بعضها موجود في اللوجان وبعضها لا لكني اريد الوصول لاختيار سيارة مناسبة وكل معرفتي بها انني شاهدتها علي الطبيعة مع زميل وقدتها لمسافة ليست كبيرة والطريق كان مزدحم فلم المس المميزات والعيوب جيدا واعتمدت علي تجميع شكاوي الملاك وبعض المعارف وارجو من السادة الملاك مناقشتي ومساعدتي لاتخاذ القرار بإذن الله وفقنا الله جميعا للخير
المميزات :
صالون متسع موتوراداؤه وعزمه معقول –عفشة سلسة محترمة –شكل جيد -استهلاك بنزين معقول بعض الكماليات وكمبيوتر السيارة والمعلوماات وشكل الصالون واضاءة التابلوه والثبات في السرعات المتوسطه الصوت محترم للسي دي الاوديو وعزل الكابينة المعقول جدا والارتفاع عن الارض لتجنب المطبات جنوط15 كاوتش وبطارية جافة معقولين .
اما العيوب :
- اسعار قطع الغيار في التوكيل غالية وغير متوافرة ولايوجد قطع غيار خارج التوكيل ولا استيراد مستعمل
- سخونة دواسة البنزين والزنة الواضحة المنتقلة من الموتور الي الي الاقدام الملامسة للدواسة
- صوت الموتور خشن وعالي نسبيا
- عدم امكانية فتح تنك البنزين والشنطة من داخل السيارة
- عضة في نقلة المارشدير في الفتيس
- دواسة البنزين ممكن تعلق (تضغط عليها ولا ترجع مكانها ثانية)
- يلزم ضغط دواسة الدبرياج لاخرها ليتم النقل واثناء النقل صوت عالي وتكسير عند التعشيق للتروس
- باور الدركسيون تقيل (كأنهاهاف باور )
- ارتفاع الشنطة وصعوبة ركن السيارة (وهل هذا العيب مؤثر علي الرؤية في المشي للسيارة)
- صوت تكتكة صاجه فرن الشكمان والعربية ساخنة عند تبطيل المحرك
- سعر اعادة البيع ضعيف (ملهاش سوق في المستعمل بحالة الجديد)
- صناعة روماني وتقفيل مغربي وصاجها بيطبق بسهولة شفت كذا سيارة لوجان صاج مطبق والعمر الافتراضي للروماني وصناعة السيارات والمكونات الروماني معروفة تكنولوجيا قديمة وتجربة النوفا داتشيا القديمة اللي نزلت تاكسيات من اكثر من 10 سنين في السوق المصري لم تكن مرضية ابدا
- مكان الكلاكس في دراع الاشارة وصعوبة استعماله في ملف او اثناء تشغيل الفلاشر وصوته السئ والمزعج جدا زي السيارات الاجرة
- مكان ازرار الزجاج الكهربائي بعيد عن الابواب وفي مكان صعب التعامل معه خصوصا الزجاج الخلفي
- السي دي الاوديو بدون ام بي ثري mp3
- وجود فرق بين فتحة الباب والسقف لايوجد جلد حماية يعرض السيارة لدخول اتربة واوراق الشجر
- لايوجد بلاستيك فوق الزجاج يركب عليه المساحات الامامية
- مفتاح تغيير ارتفاع المصابيح الامامية وايرشداد مثل فرامل الدراجات وليس موتور
- المناورات والغرز علي السرعات العالية بتعوم بشدة علي السرعات فوق 120
- تكييف متوسط الاداء والبرودة
علي فكرة اول 12 عيب مهمين ومؤثرين اما من 13 الي 20 ممكن تحملهم والتعامل معهم .ارجو من مسئولي التوكيل ايضا ان يفيدونا اذا كان من الممكن تضبيط اي من المشكلات السابقة عند الاستلام .
السلام عليكم ورحمة الله وبركاته
السلام عليكم ورحمة الله وبركاته...
دي اول مشاركة ليه هنا وحبيت اني اشارك بترجبتي مع اللوجان...
وحاحاول ارد على العيوب اللي ذكرت وتجربتي معاها اذا صادفتها...انا عامل حوالي 10000 كيلو بالعربية لحد دلوقتي في فترة صغيرة 3 شهور بس لانس بسافر بيها كتير شوية..
وحاول ارد على نقطة نقطة باللون الاحمر....
- اسعار قطع الغيار في التوكيل غالية وغير متوافرة ولايوجد قطع غيار خارج التوكيل ولا استيراد مستعمل
- بالنسبة لي الحمد لله لسه ما احتجتش لحاجه فا بالنسبة لي ما عنديش رد عليها بس من الملاحظ ان العربية انتشرت وفيه ناس كتير بدأت تجيب عنواين محلات قطع غيار.
- سخونة دواسة البنزين والزنة الواضحة المنتقلة من الموتور الي الي الاقدام الملامسة للدواسة
- بصراحة انا ما حسيتش بالموضوع ده نهائي ويمكن ما ركزتش فيه وده عيب انك تقعد تق{ا عن المشاكل كتير انك حا تبقى مركز زيادة مع العيوب بحيث انك حتى لو العيب مش موجود الواحد ممكن يتوهم انه موجود.
- صوت الموتور خشن وعالي نسبيا
- الكلام ده فعلا كان موجود اول ما اشتريت العربية بس اختفى تماما مع الاستعمال..
- عدم امكانية فتح تنك البنزين والشنطة من داخل السيارة
- بالنسبة لتانك البنزين دي حاجه يعني فيها مصلحة شوية انك عشان تفتحه لازم تطفي العربية وده اللي بعض محطات البنزين بتطلبه منك وانت داخل المحطه اثناء التموين.. فا مش مشكلة قوي انك تطفي العربية وتدي للراجل المفتاح.. مش متعبة يعني... اما بالنسبة للشطنه فهي كده كده بتقفل مع السنتر بتاع العربية فا يعني انت لو فتحت السنتر اللي واقف بره حا يقدر يفتح الشنطه بمجرد الضغط على الزرار بتاعها من بره فا تعتبر يعني انت برده متحكم فيها من جوة العربية مع السنتر.
- عضة في نقلة المارشدير في الفتيس
- الكلام ده ما ظهرش معايا صراحة.
- دواسة البنزين ممكن تعلق (تضغط عليها ولا ترجع مكانها ثانية)
- الكلام ده ما ظهرش معايا صراحة ولو فيه حاجه زي كده يبقى اكيد ممكن من الدواسات اللي محطوطه ولا حاجه لان صعبة قوي انها تحصل عشان التصميم تحت الدواسة صعب جدا انها تحصل.
- يلزم ضغط دواسة الدبرياج لاخرها ليتم النقل واثناء النقل صوت عالي وتكسير عند التعشيق للتروس.
- بالنسبة للضغط على الدواسة دي مسألة تعود اما صوت عالي والكلام ده مش موجود اطلاقا.
- باور الدركسيون تقيل (كأنهاهاف باور )
- مش تقيل لدرجة الهاف باور يعني انا شايفه معقول.
- ارتفاع الشنطة وصعوبة ركن السيارة (وهل هذا العيب مؤثر علي الرؤية في المشي للسيارة)
- الشنطه فعلا مرتفعه واحيانا بيكون صعب الركن لكن باستخدام المرايات الجانبية في الركنة بتقدر انك تركن مفيش مشاكل لكن العيب ده مش بيأثر على الرؤية في المشي ولا حاجه خالص... وفيه بعض الناس في المنتدى هنا اقترحوا انك تركب بارك سينسور وده حا يحل لك مشكلة الركنة نهائيا..
- صوت تكتكة صاجه فرن الشكمان والعربية ساخنة عند تبطيل المحرك
- الكلام ده ما ظهرش معايا صراحة.
- سعر اعادة البيع ضعيف (ملهاش سوق في المستعمل بحالة الجديد)
- انا وجهة نظري ان سعرها حا يكون كويس خاصة مع انتشار العربية لان الانتشار هو ده اللي بيخلي سعر اعادة البيع عالي لانه بيكون دليل على نجاح العربية.
- صناعةروماني وتقفيل مغربي وصاجها بيطبق بسهولة شفت كذا سيارة لوجان صاج مطبقوالعمر الافتراضي للروماني وصناعة السيارات والمكونات الروماني معروفةتكنولوجيا قديمة وتجربة النوفا داتشيا القديمة اللي نزلت تاكسيات من اكثرمن 10 سنين في السوق المصري لم تكن مرضية ابدا
- مش حاقدر افيدك في النقطة دي لاني ما جربتش الحمد لله الموضوع ده.. بس اللي اقدر اقوله ان كل العربيات الجديدة دلوقتي تقريبا صاجها بقى ضعيف..
- مكان الكلاكس في دراع الاشارة وصعوبة استعماله في ملف او اثناء تشغيل الفلاشر وصوته السئ والمزعج جدا زي السيارات الاجرة.
- الموضوع ده مسألة تعود وانا مش شايف ان فيه صعوبة في التعامل معاه اطلاقا.. وموضوع الصوت المزعج ده برده مسألة زوق.. واحيانا عندنا هنا في مصر بتحتاج ان انت تركب زمارة عربية نقل عشان اللي قدامك يسمع ويتحرك.
- مكان ازرار الزجاج الكهربائي بعيد عن الابواب وفي مكان صعب التعامل معه خصوصا الزجاج الخلفي
- اماكن فتح الزجاج هي نفسها اللي موجودة برده في عربيات سيتروين ( C3 ) تحديدا يعني اعتقد الفرنسي كله كده والله اعلم..
- السي دي الاوديو بدون ام بي ثري mp3
- ممكن برده الموضوع ده ما يفرقش مع حد خاصة لو انت مش من النوع اللي بتسمع اغاني ولا حاجه .. اما ابسط حاجه ممكن تعملها تجيب FM Transmitter وتحطه على الولاعة و تشتري دماغك.
- وجود فرق بين فتحة الباب والسقف لايوجد جلد حماية يعرض السيارة لدخول اتربة واوراق الشجر.
- الكلام ده صعب انه يكون موجود لان لو كده يبقى التكييف عمره ما حا يشتغل عدل
- لايوجد بلاستيك فوق الزجاج يركب عليه المساحات الامامية.
- مش فاهم النقطه دي صراحة ايه المقصود بيها ..
- مفتاح تغيير ارتفاع المصابيح الامامية وايرشداد مثل فرامل الدراجات وليس موتور
- انا مش عارف حا تفرق في ايه...؟؟ المهم الوظيفة.. وانا شايف انها وظيفة ممتازة جدا وبتنفع جدا خاصة في السفر.. وده حاجة بتغنيك نوعا ما عن الفوجات..
- المناورات والغرز علي السرعات العالية بتعوم بشدة علي السرعات فوق 120
- هي مش بتعوم .. هو اللي اقدر اقوله لك ان العربية خفيفة شوية بمعني ان لو عربية نقل كبيرة ماشية بسرعه عالية ولا حاجه الهواء بتاعها بيبقى جامد شوية فا تحس ان عربيتك حد زقها بس بتقدر ببساطه جدا انك تتحكم في عربيتك.. يعني انت لو ما عملتش اي رد فعل للحركة دي حا تلاقي العربية ولا كأن حصلها اي حاجه...
- تكييف متوسط الاداء والبرودة.
- انا لا اتفق على هذه النقطه لان التكيف بجد انا احيانا بسقع منه واوطيه جدا واحيانا كمان اطفيه شوية... بس هو في نقطة بسيطه حصلت ويمكن تكون هي دي المشكلة .. انا كان عندي التكيف في الاول بيشتغل ويفصل لوحده خاصة في الحر... بدون ما يوصل لدرجة التبريد اللي تخليه يفصل وكنت بحس بالموضوع ده قوي وانت ماشي لان بيفرق في سحب العربية اول ما يشتغل يخلي العربية تتأخر شوية واول ما يفصل الاقي العربية جريت مني والكلام ده تحديدا كان بيحصل في الحر والصبح بس لكن بليل ما كانتش بتحصل.. فا اول ما وصلت لصيانة ال 5000 قلت لهم على الموضوع ده قالي دي حاجه بسيطة وحا نظبتها وفعلا الموضوع ده اتظبط من التوكيل... والتكيف بقى تلاجه والعربية بقيت ماشية تمام.. فا لو فيه عندك اي مشكلة في التكيف بلغ بس عنها وانت داخل على اي صيانة..
اتمنى اني يكون كلامي ده في فايدة للناس بناء على تجربتي الشخصية... وشكرا..