لسه من شوية فاتحة على فيلم الرسالة و في الفاصل كان فيه تنويه عن فيلم لا تسألني من انا و انه جاي النهاردة الساعة 8 و نص.. لما شفت التنويه افتكرت اني لما آخر مرة شفته على قناة فضاية مش فاكرة ايه لقيت فيه أغنية لشادية في آخر الفيلم أول مرة أشوفها.. مع اني شفت الفيلم اكتر من مرة على القنوات الأرضية لحد آخره.. الأغنية طبعا كلماتها بتشتكي الظروف و اللي حاصل و الفقر و إلى آخره.. اما المناظر اللي كانت بتيجي مع الأغنية في الخلفية هو ده اللي لفت نظري.. المناظر كانت عبارة عن مشاهد مختلفة لأحياء في منتهى الفقر في مصر و ناس بتاكل من الزبالة و ناس عايشين في عشش و اللي عايشين في أوض و ناس بتتسول و حاجات صعبة فعلا.. الرسالة بأه من الفيلم كله بالمشهد الأخير ده بالأغنية هو ان الفقر ممكن يخلي الناس تبيع لحمهم.. يبيعوا ولادهم.. يبيعوا اي حاجة عشان يعيشوا - و الكلام ده برضه جه على لسان شادية في المشهد اللي قبل الأغنية على طول.. المثير بأه ان كووووووووووووول ده كان أول مرة أشوفه.. الأغنية بالمناظر بتاعة الفقر المدقع دي كانت بتتشال من نسخة التليفزيون المصري :eek:
انا فاكرة كويس السنة اللي فاتت كنا بنشوف الفيلم انا و ماما و اخويا و كانت أول مرة نشوفه في الفضائيات.. اللي حصل بالظبط اننا لما جت الأغنية بالمناطر دي و بعد ما خلصت قمنا بصينا لبعض احنا التلاتة في وقت واحد.. هي الأغنية دي بالمشاهد دي كانت في الفيلم أصلا؟ :eek:
طبعا بحذف الأغنية دي و المشاهد المصاحبة ليها من الفيلم كده الرسالة من الفيلم أصلا ما وصلتش - بغض النظر عن اتفاقنا او اختلافنا مع وجهة نظر الكاتب - انما كده القصة بأت سطحية جدا بلا هدف.. اي حاجة و خلاص.. واحدة باعت بنتها لست غنية و دخل في النص مدحت الطماع و حوارات مستهلكة و في الآخر العيلة كلها رجعت لبعدشيها و توتة توتة خلصت الحدوتة. انما الموضوع طلع مش كده خالص و ان الكاتب عايز يقول ان اللي حاصل من فقر متوحش ممكن يوصل الناس في يوم من الأيام انهم يبيعوا ولادهم.
طبعا ساعتها الرقابة كانت خايفة على شكل مصر قدام العالم و سمعة مصر.. مع ان الفيلم كان بيتعرض أرضي.. يعني الناس في مصر محتاجة تشوف الكلام ده عشان تعرف الناس الفقرا عايشين ازاي و عشان اللي معمول لهم الفيلم توصل لهم الرسالة منه.. انما الرقابة طبعا ما بتهزرش.. و مقص الرقيب ما بيرحمش :rolleyes:
آه.. بالمناسبة.. لو حد شاف الرقابة في فيلم زي حين ميسرة اللي لو كل المشاهد الخارجة اتحذفت منه بكاملها ما كانش هايأثر على السياق الدرامي - باقول لو حد شاف الرقابة في الفيلم ده يبقى يسلم لي عليها اوي.. و عجبي :D