السلام عليكم يا جماعه
انا بكتب الموضوع دا من غيظي الصراحه..انا لسه جاي من عند سيتي ستارز و تعمدت اركن بعيد عشان ميطلعليش واحد من اياهم يقولي "ايوا يا باشا!!!" و يتنحلي و الحمد لله محصلش حاجه و انا بركن..و انا خارج بقي لقتلك واحد طالع من تحت الارض" ايوا يا باشا الباركنج بتاعنا"... ازاي مع اني راكن في الشارع و بعيد عن سيتي متعرفش!!..عاوز كام؟؟.. 3 جنيه...المهم ادتهملو بس انا اتخنقت من نفسي جدا بعد ممشيت...مش عشان فلوس..بس حسيت اني اتبطلج عليا..انا ساعات كتير بدي الناس دي فلوس...بس بيكون مثلا وقفلي الطريق او ساعدني و انا بركن او حته بياخد بالو لو الواحد راكن راكنه غلط ....بس المره دي الراجل معملش اي حاجه يبقي دي اسمها ايه؟؟؟ اتاوه....و برضو قدام كليتي هندسه عين شمس...مترشق ناس من دي ...يطلعولك من تحت الارض كل يوم و ياخدو منك جنيه...عشان تطلع اخر النهار تلاقي عربيه قافله عليك و زق انت بقي...و عشان كدا برضو بتعمد اركن بعيد عن الكليه ...انا يمكن مش متعود علي ده لان في المنصوره عندنا مفيش الكلام دا كتير...بس في القاهره هنا مرطرطين في كل منطقه و شكلهم بلطجيه و بيبقو كمان محمين من امناء شرطه لو في منطقه جمب قسم او هيئه حكوميه زي كليتي كدا....انا الصراحه زهقت و مش عارف اعمل مع الناس دي ايه...اخاف اخش فيه شمال يعمل حاجه في العربيه و انا مش موجود او يقل ادبو و طبعا مش هسكتلو بس هبقي بهزاء نفسي مع اشكال.*%^$%...يا ريت تقترحو عليا اتصرف ازاي...و اكيد اهل القاهره اكتر ناس خبره في الموضوع دا