تمت بحمد الله صيانة ال30 ألف و هنا التفاصيل
السلام عليكم و رحمة الله و بركاته يا أهل المنتدى الكرام :)
معلش أعذورونى الموضوع جاى متأخر أسف جدا :) الحمد لله عملت صيانة ال30 ألف لعربيتى الانسر 1600 أتوماتيك موديل 2007 "مصرية" كما حجزت موعد الصيانة يوم 15 مارس 2008 التاسعة صباحا فى فرع جسر السويس أمام سوق القنال , كنت هناك 8:15 كان فى عربيتين لانسر و لحد الساعة تسعة كان فى حوالى 25 عربية لانسر 2006 2007 و أتنين لانسر كريستالة و واحده جالانت و 2 لانسر 2008 الشكل الجديد :eek: صباح الزحمة.
مهندس الأستقبال أستلم العربية حوالى الساعة 9:10 و قلتلوا على بعض الملاحظات منها تربيط العفشة :) تنظيف فلتر التكييف و الهواء , تغيير الزيت "موبيل وان" و فلتر الزيت , و الكشف على تيل الفرامل - لم يتم تغييره من قبل!- تمام تمام أستلم العربية و طلعت الدور التانى و أخدت كرسى وقعدت جنب الشباك و تابعت العربية.
تم رفع السيارة و فك ال4 أطارات و فك التيل الأمامى و الطنابير الخلفية , و تم تربيط العفشة , و تنظيف فلتر الهواء و التكييف , و تغيير الزيت و الفلتر , و كشف عام على السيارة.
لاحظت أن العربية شكلها خلصت , كانت الساعة 10 , سألت المهندس قالى العربية خلصت و بنعملك الفاتورة - طبعا أنا عاملها ألف حساب :) - جت الفاتورة و المطلوب 377,85 :eek: طبعا أنا ماصدقتش لأنى عامل حسابى تيل فرامل المرة ديه و ده لوحده بالضريبة حوالى 400 جنيه , أيه يا جماعة أخبار التيل , لأ تمام مش محتاج يتغير و أول ما يصفر تعالى نعملهولك نفس الرد و نفس الكلام فى صيانة ال10 و ال20 ألف , الحمد لله.
تفاصيل الفاتورة:
100 جنيه مصنعية (فى صيانى ال20 ألف كانت 120) الحمد لله فى حاجة بترخص فى البلد!
42,50 فلتر الزيت
200 جنيه زيت موتور موبيل وان
1 جنيه صنفره (تم أستخدمها فى تيل الفرامل , شكله كده بقى هايتغير فى صيانة ال40 ألف :D يا أنا يا أنت :D)
34,35 ضريبة المبيعات!لاتعليق!
المجموع 377,85 و الحمد لله على كده , ان شاء الله لو كان فى العمر بقية نعمل موضوع عن صيانة ال40 ألف.
ملحوظات: مازالت المعاملة هناك محترمة و مواعيدهم مظبوطة أتوبيس العمال بييجى 9 بالدقيقة و المكان نظيف و الناس الشغالة هناك محترمة و بينجزوا! سمعت و أنا واقف هناك واحد كان عايز يحجز قالولوا تعالى 15 أبريل!! يعنى اللى عايز يحافظ على مواعيد الصيانة يبادر بالحجز بدرى بدرى , أو يروح فرع قليوب اللى سمعت أنه من غير ميعاد!
شكرا جزيلا على وقتكم :) ربنا يكفيكم شر الطريق , السلام عليكم و رحمة الله و بركاته.
شكرا جزيلا لكم جميعا على مروركم الكريم
جزاك الله خيرا يا أخى abulhasan :)
الله يبارك فيك يا كريم :) ان شاء الله فى حياتك , السؤال صيانة ال300 ألف هاتكلف كام :D
الله يبارك فيك يا فهد :) مليون مليون أنا موافق و مستعد أعملها بنفس الموتور :)
الله يبارك فيك يا معاذ :) جزاك الله خيرا. بص يا سيدى أهم حاجة فى الأشارات و الوقوف فى الزحمة ماتحملش على الفرامل و أنت على ال D خليك فى الحالات ديه على ال N و حاول تقدر المسافات يعنى أنت شايف الطريق هايقف أو واقف أبتدى شيل رجلك بدرى بدرى من على البنزين و الفرامل أستخدمها فى المرحلة الأخيرة , ربنا يحفظهالك.
أخى الحبيب أحمد "الدائم السؤال على" شكرا جزيلا على مرورك الكريم , الله يبارك فيك :)
